Vakacava e bau va tale ga qori na nomu rai me baleta na iVolatabu ena dua na gauna mani o sega ni wilika? Era nanuma e levu ni dredre na wili iVolatabu. De dua ena veisau na nomu rai ke vakaraitaki vei iko na sala o rawa ni marautaka kina na nomu wiliwili, ke o kila tale ga ni na marautaki qai vakainaki na nomu bula ke o dau wili iVolatabu.

Rogoca mada na ka era kaya eso me baleta na yaga ni nodra wili iVolatabu.

E kaya o Ezekiel e yabaki 20 vakacaca: “E liu, au dau vaka tu e dua na draiva e sega ni kila na vanua e gole tiko kina. Ia e vukei au na iVolatabu me vakainaki na noqu bula. Na ivakasala e tu kina e yaga ena noqu bula e veisiga.”

E kaya o Frieda, e yabaki 20 vakacaca: “Au dau yalototolo. Ia e vukei au na noqu wili iVolatabu meu lewai au vinaka. Qori e vakarawarawataka noqu veimaliwai, sa levu tale ga noqu itokani ena gauna qo.”

E kaya me baleta na iVolatabu o Eunice, dua na marama yabaki 50 vakacaca: “E veisautaka noqu bula, au vakavinakataka rawa kina noqu itovo.”

Eratou vakadinata na le tolu qori kei na milioni tale vakacaca ni o na marautaka na bula ke o dau wili iVolatabu. (Aisea 48:17, 18) Ena vukei iko tale ga na iVolatabu mo vakatulewa vinaka, kunei ira na itokani dina, valuta na lomaocaoca, mo kila tale ga na ka dina me baleta na Kalou. E vinaka qai nuitaki na ivakasala ena iVolatabu ni vakarautaka sara ga na Kalou. O na vakila ga na kena yaga ke o muria.

E dau dredre wale ga me tekivu rawa na wili iVolatabu. Vakacava o via kila eso na vakatutu yaga mo cakava kina qori, qai marautaka nomu wiliwili?