Na Cava Oni Kila me Baleti Keimami na iVakadinadina i Jiova?

SARAVA/ROGOCA

Oni dau raica na neimami cakacaka vakaitalatala. Oni rairai wilika na veika me baleti keimami ena so na itukutuku se rogoca nodra veitalanoa eso tale. Ia e vakacava sara mada na levu ni ka oni kila me baleti keimami na iVakadinadina i Jiova?

KILAKILA MADA

Digia na kena e dina se lasu.

DINA LASU

Keimami lotu vaKarisito.
Keimami vakabauta ni se qai vica ga na udolu na yabaki na kena buli na lomalagi, vuravura kei na veika bula tale eso.
Keimami sega ni vakabauti ira na vuniwai.
Keimami vakabauta na iVolatabu kece.
Keimami vakayagataka ga na neimami ivakadewa ni iVolatabu.
Keimami veisautaka na neimami iVolatabu me ganita na neimami vakabauta.
Keimami sega ni dau vakaitavi ena veika e caka ena itikotiko.
Keimami dau beci ira na vo ni veilotu.

Raica na kedra isau ena tabana e tarava.

1 DINA. Keimami dau saga me muri voleka na ivakavuvuli kei na ivakarau ni bula i Jisu Karisito. (1 Pita 2:21) Ia e vica na sala keimami duidui kina vei ira na lotu era kaya nira lotu vaKarisito. Kena ivakaraitaki, keimami vakavulici ena iVolatabu ni Luve ni Kalou o Jisu, e sega ni okati ena Letoluvakalou. (Marika 12:29) Keimami sega ni vakabauta ni bula tale tiko e dua na ka nida sa mate, e sega tale ga na yavu vakaivolatabu e tukuni kina ni Kalou e dau veivakararawataki me tawamudu i eli. Keimami sega ni vakabauta ni dodonu me dua na kedra icavuti na liutaka tiko na neimami cakacaka vakayalo mera cecere kina vei ira eso tale.—Dauvunau 9:5; Isikeli 18:4; Maciu 23:8-10.
2 LASU. Keimami vakabauta ni bulia na ka kece na Kalou. Ia keimami sega ni duavata kei na levu era kaya tiko ni se qai vica ga na udolu na yabaki na buli ni lomalagi, vuravura kei na veika bula tale eso. Na vuna? Ni veisaqasaqa na nodra vakabauta kei na ka e tukuni ena iVolatabu. Kena ivakaraitaki, so era kaya ni buli ena ono wale ga na siga na vuravura kei na ka bula kece e tu kina, me 24 ga na aua kece na dede ni dua na siga. Na vosa “siga” ena iVolatabu e rawa ni dusia e dua na gauna balavu. (Vakatekivu 2:4;Same 90:4) So gona vei ira na vakabauta ni se qai vica ga na udolu na yabaki na kena buli na vuravura era vakavulica sara tiko ga na vakasama qori vei ira eso tale. Ia e kaya na iVolatabu ni sa tu makawa na vuravura ni bera na ono na siga ni bulibuli. ¹—Vakatekivu 1:1.
3 LASU. Keimami dau qaravi vakavuniwai. Eso mada ga vei keimami era vuniwai me vakataki koya na lotu vaKarisito ena imatai ni senitiuri, o Luke. (Kolosa 4:14) Ia keimami cata na veiqaravi vakavuniwai e veisaqasaqa kei na ivakavuvuli vakaivolatabu. Kena ivakaraitaki, keimami sega ni vakadonuya me soli vei keimami na dra ni vakatabuya na iVolatabu.—Cakacaka 15:20, 28, 29.

Keimami dau qara na veiqaravi vakavuniwai e vinaka duadua, me baleti keimami kei ira na neimami vuvale. E laurai ni sa yaga raraba sara na kena dau sagai me taqomaki na dra se maroroi vinaka me kua ni levu e drodro tani ni muri na mataqali veiqaravi keimami vakadonuya na iVakadinadina i Jiova. Levu na vanua sa rawa nira vakatulewataka ga na tauvimate me kua ni soli vei ira na dra. Na vuna? Baleta ni sa kune tiko kina eso na mate, e rawa tale ga ni vakacacana na sotia ni yago, se cala na mataqali veiqaravi e caka vei ira.
4 DINA. Keimami vakabauta ni “vakavuna na Kalou na” iVolatabu kece, qai “yaga.” (2 Timoci 3:16) E okati kina na Veiyalayalati Makawa kei na Veiyalayalati Vou, me vaka e dau kilai levu tu. Ia keimami vakatoka na iwasewase ni iVolatabu qori me iVolatabu vakaIperiu kei na iVolatabu vaKirisi. Keimami na sega kina ni tukuna ni so na tiki ni iVolatabu sa madra se sega ni yaga.
5 LASU. Keimami dau vakayagataka e levu na ivakadewa ena neimami vuli iVolatabu. Ena vosa kece sa tu kina na iVolatabu, keimami taleitaka ga na iVolatabu Vakadewa ni Vuravura Vou ni tiko kina na yaca ni Kalou, e donu qai matata. Vakasamataka mada na vakayagataki ni yaca ni Kalou, Jiova. Ena ikau ni dua na ivakadewa ni iVolatabu, e volai kina na yacadra e le 79 nira vakaitavi ena kena vakadewataki. Ia na iVolatabu sara ga qo e vakalutuka na yaca i koya e vakavuna na kena volai—na Kalou o Jiova! E sega ni cakava qori na Vakadewa ni Vuravura Vou ni biuta tale na yaca ni Kalou ena vica vata na udolu na vanua e dodonu me tiko kina me vaka ga na kena a volai taumada. ²
6 LASU. Na gauna keimami raica kina ni sega ni salavata na neimami vakabauta kei na ka e tukuna na iVolatabu, ena veisau tale ga na neimami rai. Nira se bera ni tekivu tabaki na iVolatabu Vakadewa ni Vuravura Vou ena 1950, keimami dau vakayagataka na vakadewa era sa tu me yavutaki kina na neimami vakabauta.
7 LASU. E yaga vei ira e levu na neimami cakacaka vakaitalatala. Keimami sa vukei ira e levu mera biuta eso na ka era bobula tu kina, me vaka na vakayagataki vakasivia ni wainimate gaga kei na gunu. Era sa kila na wilivola kei na volavola e vica vata na udolu ena vuku ni porokaramu keimami vakayacora tiko e vuravura raraba mera vukei kina. Keimami veivuke tale ga ena gauna ni leqa tubukoso vei ira na iVakadinadina i Jiova kei ira na so tale. Keimami dau saga ena gauna va qori mera vakacegui vakayago, vakayalo tale ga o ira na vinakata dina sara tu ga na veivuke. ³
8 LASU. Keimami dau muria na ivakasala ni iVolatabu me baleta nodra “rokovi na tamata kece” se mani lotu cava era lewena. (1 Pita 2:17, ivakadewa ni iVolatabu na Today’s English Version) Kena ivakaraitaki, keimami le vica vata na udolu ena so na vanua, ia keimami sega ni uqeti ira na veiliutaki vakapolitiki se cikevi ira na daubulilawa mera vakadredretaka se vakatabuya na nodra cakacaka na matalotu tale eso. Sega tale ga ni keimami saga me vakadonui na lawa me vakaukauataka na kena muri ena itikotiko na neimami vakabauta se rai vakalotu. Ia keimami marautaka ga na cakava na ka vei ira eso tale, me vaka na neimami dau marautaka na ka era cakava me baleti keimami.—Maciu 7:12.

Na ulutaga qo e digitaki mai ena neimami website vakadonui, na jw.org. Ke o via kila eso tale na ka, rai ena BALETI KEIMAMI > TARO E TAROGI WASOMA.

^ 1. Ena vuku ni veika qori, keimami sega ni saqata na vakabauta vakasaenisi e dikevi kina ni sa yabaki vica vata na bilioni na vuravura, me vaka era dau cakava o ira era kaya ni se qai vica ga na udolu na yabaki na kena buli na lomalagi, vuravura kei na veika bula tale eso.

^ 2. E dua tale na ka e vakasakiti kina na Vakadewa ni Vuravura Vou: E sega ni saumi. Era rawa gona ni wilika kina e vica vata na milioni na iVolatabu ena nodra vosa sara ga ni sucu. Sa tabaki na Vakadewa ni Vuravura Vou ena rauta na 130 na vosa. O rawa mada ga ni wilika ena Internet ena www.pr2711.com.

^ 3. Dua na sala keimami vakayagataka kina na cau oya na kena vakarautaki na veivuke vei ira na vakalolomataki ena leqa tubukoso. (Cakacaka 11:27-30) Nira sega ni saumi na vakaitavi ena cakacaka qori, na ilavo e soqoni e vakatabakidua sara ga me ka ni veivuke, sega ni kena inaki me dua e saumi kina.