KA ERA TUKUNA ESO

Era nanuma e levu ni sega ni gadrevi me dua na ivakadinadina me qai vakabauti e dua na ivakavuvuli. Kena ivakaraitaki, ena tukuna e dua na daulotu: “Au vakabauta na Kalou.” Ia ke tarogi se “cava e vakabauta kina ya,” ena rairai kaya “ya na ka au vakavulici kina.” O koya e va qori na nona rai e vakabauta tu ga vakamataboko na ka, e sega ni yavutaki vinaka na nona vakabauta.

KA E KAYA NA IVOLATABU

“Na vakabauta oya noda vakadeitaka e lomada ni na yaco dina na ka eda nuitaka,  na noda raica tale ga na ivakadinadina e vakaraitaka ni tiko dina na ka e sega ni raica na matada.” (Iperiu 11:1) E bibi me tiko e dua na ivakadinadina meda vakadeitaka kina ni na yaco dina na ka eda nuitaka. Na vosa taumada e vakadewataki me “vakadeitaka e lomada,” e sega ni vakaibalebaletaka na ivakarau ni lomada se na tatadra. E okati gona ena vakabauta na noda vakadeitaka e dua na ka e tiko na kena ivakadinadina.

“Tekivu mai na gauna a buli kina na vuravura e kilai na veika tawarairai me baleti koya [Kalou], ya na nona kaukaua e sega ni vakaiyalayala, vaka kina ni o koya dina ga na Kalou.”—Roma 1:20.

KA E KAYA NA IVOLATABU

“Ke sega na vakabauta eda na sega ni vakamarautaka rawa na Kalou, ni o koya e torova na Kalou e dodonu me vakabauta ni bula dina tiko o koya, ni na vakaicovitaki ira tale ga era vakasaqarai koya ena yalogu.”—Iperiu 11:6.

Eda sa raica oti mai ni levu era vakabauta ga na Kalou baleta nira susugi se ra vakavulici kina. Ia e vinakata na Kalou vei ira na qaravi koya, mera vakabauta dina ni bula tiko o koya qai dauloloma. Qori na vuna e veiuqeti kina na iVolatabu meda yalogu ni vakasaqara na Kalou, meda rawa ni kilai koya vinaka.

“Toro voleka vua na Kalou ena qai toro voleka mai vei kemuni o koya.”—Jemesa 4:8.

KA E KAYA NA IVOLATABU

E kaya na iVolatabu ni “vakabauti ga na ka ke rogoci na vosa.” (Roma 10:17) Kena ibalebale e bibi mo ‘rogoca’ na ka e kaya na iVolatabu me baleta na Kalou. Qori na imatai ni ka mo cakava mo rawa ni vakabauti koya. (2 Timoci 3:16) Ni o vulica na iVolatabu, o na kila na isau ni taro va qo: O cei na Kalou? Au na vakadinadinataka vakacava ni bula tiko na Kalou? E kauaitaki au dina na Kalou? Na cava na inaki ni Kalou me baleta na veigauna se bera mai?

Era na marau na iVakadinadina i Jiova mera veivakavulici ena iVolatabu. E vakamacalataki ena neimami website na jw.org: “Keimami marautaka na iVakadinadina i Jiova me keimami veivakavulici ena iVolatabu, ia keimami sega ni vakasaurarataka e dua me lewena na neimami lotu. Keimami na vakamacalataka ga ena veidokai na ka e kaya na iVolatabu, ia e tu vua na tamata yadua na dodonu me digia na ka e vakabauta.”

Na nomu vakabauta e dodonu me yavutaki ena ivakadinadina o raica, ni o vakasamataka na ka dina o wilika ena iVolatabu. Ni o cakava qori, o sa vakataki ira eso na lotu vaKarisito ena imatai ni senitiuri, “gauna era rogoca kina na vosa, e gu na lomadra mera dikeva vinaka na iVolatabu e veisiga mera vakadeitaka kina se dina na ka era rogoca se sega.”—Cakacaka 17:11.

“Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.”—Joni 17:3.