Na iWali Duadua Ga
E milioni nikua era sa muria tiko na ivakavuvuli vakaivolatabu eda sa raica mai ena vica na ulutaga sa oti, qai dua na ka na sasaga era cakava mera cavuraka laivi na veivakaduiduitaki. E macala ga nida na sega ni rawa ni vakaotia vakataki keda na leqa qori. Ena qai wali ga vakacava?
Matanitu e Uasivi
E laurai ni dreve na nodra sasaga na matanitu vakatamata mera tarova na veivakaduiduitaki. Ia na matanitu cava ga ena walia?
Qo na ka me cakava na matanitu e via walia na veivakaduiduitaki
-
1. Uqeti ira na lewenivanua mera veisautaka na nodra rai me baleti ira eso tale.
-
2. Vakaotia vakadua na rarawa e vu mai na veivakaduiduitaki.
-
3. Mera kua ni veivakaduiduitaki na kena iliuliu.
-
4. Vakaduavatataki ira na matatamata kece.
E vakadeitaka vei keda na iVolatabu ni sa tauyavutaka na Kalou e dua na matanitu va qori. E vakatoka me “Matanitu ni Kalou.”—Luke 4:43.
Dikeva mada na ka ena cakava na Matanitu qori.
1. iVakavuvuli Uasivi
“Era na vulica na ivalavala dodonu na lewenivanua.”—AISEA 26:9.
“Na vua ni ivalavala dodonu dina na veiyaloni, na vua ni ivalavala dodonu dina na vakacegu kei na sautu me sega ni mudu.”—AISEA 32:17.
Na cava na kena ibalebale? Na Matanitu ni Kalou ena vakavulici ira na lewenivanua ena ka dodonu. Ena veisautaka na nodra rai nira vulica na ka e donu kei na ka e cala, na ka mera cakava kei na ka me kua. Era na qai kila ni dodonu ga mera lomani ira na kawatamata kece.
2. Veivakabulai
Na Kalou “ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”—VAKATAKILA 21:4.
Na cava na kena ibalebale? Na Matanitu ni Kalou ena vakaotia vakadua na rarawa e vu mai na veika ca. Era na sega tale ni vakila na rarawa o ira na vakalolomataki, ra sega kina ni veicati.
3. Veiliutaki e Vinaka
“Ena sega ni vakatulewa ena ka e raica e matana, se veivunauci ena ka e rogoca e daligana. Ena lewai ira vakadodonu na vakaloloma, ena veivunauci vakadodonu ena vukudra na yalomalumalumu e vuravura.”—AISEA 11:3, 4.
Na cava na kena ibalebale? O Jisu Karisito na Tui ni Matanitu vakalomalagi, ena lewa vakadodonu na vuravura, ena sega ni veivakaduiduitaki. Ena sega ni tovaka e dua na matanitu, ena raica me muri e vuravura taucoko na lawa savasava.
4. Duavata
Ena vakavulici ira na lewenivanua na Matanitu ni Kalou mera ‘duavata ena vakasama, ena loloma, mera lomavata, me tautauvata tale ga na nodra nanuma.’—FILIPAI 2:2.
Na cava na kena ibalebale? Ena sega ni vakarairai ga na nodra duavata na lewe ni Matanitu ni Kalou. Era na “lomavata” nira veilomani dina.
