Tutoblonunu xɔgbigbá tɔn nukúnɖeji Grande-Bretagne tɔn ɖé kpa Kúnnuɖetɔ́ Jehovah tɔn lɛ ɖó azɔ̌ e ye kplɔ́n nyɔnu lɛ bɔ ye nɔ zán mɔ̌to janginjangin lɛ kpo macinu janginjangin lɛ kpo ɖò fí e alaxɔ yetɔn yɔyɔ̌ ɔ ɖè ɖò malin-malin dó Chelmsford, ɖò Essex é wutu. Tutoblonunu xɔgbigbá tɔn e è nɔ ylɔ ɖɔ Considerate Constructors Scheme * (CCS) é sɔ́ alɔ nú Kúnnuɖetɔ́ lɛ ɖó nyɔnu lɛ e ye kplɔ́n azɔ̌ ɖò xɔgbigbá linu é wu, bo tinmɛ ɖɔ “nǔdówá” ɖé wɛ é nyí. Etɛwu è ka sɔ́ alɔ nú ye mɔ̌?

Ðò Grande-Bretagne ɔ, xɔgbátɔ́ nyɔnu lɛ sín kɛ́n hwe hú 13 ɖò kanweko jí. Sɔgbe xá dobanunǔ azɔ̌xwé Grande-Bretagne tɔn ɖé tɔn ɔ, nyɔnu klewun ɖé jɛn nɔ keya nú azɔ̌ xɔgbigbá tɔn. Nǔ lɛ gbɔn vo ɖò Chelmsford, ɖó nyɔnu 40 mɔ̌ ɖò kanweko jí wɛ ɖò gbɛ̌ta ɔ mɛ. Kɛ́n ɔ lɛ́ jɛji, bo hugǎn 60 ɖò kanweko jí ɖò gbɛ̌ta mɛ e nɔ zán macinu janginjangin lɛ é tɔn mɛ.

Etɛ ka d’alɔ Kúnnuɖetɔ́ nyɔnu enɛ lɛ bɔ é kpa ye? Azɔ̌kplɔnmɛ kpo gudo ninɔ nú mɛ kpo d’alɔ ye tawun. Wlɛnwín taji wè enɛ lɛ wɛ azɔ̌xwé CCS lɔ nɔ zán. Nǔ enɛ lɛ nɔ sísɛ́ xɔgbátɔ́ lɛ bɔ ye nɔ ɖexlɛ́ ɖɔ azɔ̌watɔ́gbɛ́ emitɔn lɛ xɔ akwɛ ɖò nukún emitɔn mɛ gbɔn nǔ elɔ lɛ wiwa gblamɛ: “È nɔ ɖó sísí nú mɛ bǐ ɖò azɔ̌watɛn ɔ, bo nɔ wà nǔ xá mɛ bǐ ɖò ali ɖokpo ɔ nu, lobo nɔ dó wusyɛn lanmɛ nú mɛ, bo nɔ lɛ́ kplɔ́n azɔ̌ mɛ.”

Jade e nyí ɖokpo ɖò nyɔnu ɖěɖee è kplɔ́n azɔ̌ ɖò azɔ̌watɛn ɔ bɔ ye nɔ kun gladɛ́ɛ lɛ kpo kɔ́bɛ́hún lɛ kpo lɛ é mɛ é ɖɔ: “É jiwǔ! Un lin gbeɖé ɖɔ un na kpéwú bo w’azɔ̌ ɔ ǎ. Hweɖelɛnu ɔ, azɔ̌ ɔ nɔ vɛwǔ tawun, amɔ̌, un nɔ ɖò azɔ̌ kplɔ́n d’eji wɛ hwebǐnu, bo nɔ ɖò nǔ yɔyɔ̌ lɛ kplɔ́n wɛ.” Jade ɖɔhun ɔ, macinu janginjangin lɛ wɛ Lucy lɔmɔ̌ nɔ zán dìn. É ɖɔ: “Hwenu e un wá azɔ̌watɛn ɔ tlolo é ɔ, un ɖó nǔwukpikpé ɖebǔ bɔ è na zán ǎ.” Amɔ̌, sín gbè e gbè un wá é ɔ, è jɛ azɔ̌ kplɔ́n mì jí. Sín hwenɛnu ɔ, un w’azɔ̌ xá gbɛ̌ta vovo atɔ́ɔ́n, enɛ wu ɔ, un kplɔ́n azɔ̌ gègě!”

Nyɔnu e ɖò gbɛ̌ta ɔ mɛ lɛ é ɖó nǔwukpikpé lɛ b’ɛ zɛ macinu lɛ zinzan kpowun wu. Gǎn gbɛ̌ta tɔn e nɔ nyí Eric é ɖó ayi nǔ elɔ wu: “Hwɛhwɛ ɔ, nyɔnu lɛ nɔ kpé nukún dó macinu lɛ wu hu sunnu lɛ, bɔ enyi nùɖé jɛ dò ɖò macinu yetɔn wu ɔ, blewun jɛn ye nɔ tuùn, bo nɔ wá ɖɔ.”

Carl e nɔ kpé nukún dó gbɛ̌ta e nɔ zán macinu janginjangin lɛ é gègě wu é ɖɔ: “Lee nyɔnu lɛ kplɔ́n macinu enɛ lɛ zinzan gbɔn é jiwǔ nú mì tawun.” Ðò ninɔmɛ ɖé lɛ mɛ ɔ, sunnu e ko w’azɔ̌ nú xwè mɔkpan lɛ é nɔ ɖò finɛ có, un nɔ sɔ́ nyɔnu lɛ, bɔ ye nɔ zán macinu lɛ!”

Enyi gǎn gbɛ̌ta tɔn lɛ nɔ gudo nú azɔ̌watɔ́gbɛ́ yetɔn lɛ ɔ, ye nɔ mɔ ganjɛwu. È sixu mɔ enɛ ɖò ninɔmɛ Therese tɔn mɛ. Ðó é nyí mɔ̌to janginjangin kuntɔ́ e ko mɔ nǔ kpɔ́n é ɖé wutu ɔ, é tuùn ɖɔ enyi macinu janginjangin lɛ ɖò fí ɖebǔ ɔ, é nɔ byɔ ɖɔ agban gègě ni nɔ mɛ ta, bɔ gbeta lɛ kɔn wiwa dó ayijayǐ wu ka nɔ vɛwǔ. Therese tinmɛ ɖɔ: “Enyi un tuùn ɖɔ gbɛ̌ta ce sín gǎn ɖò gudo nú mì ɔ, un nɔ kpéwú bo nɔ w’azɔ̌ gègě hú lee un ɖó nukún gbɔn é, ɖó un nɔ mɔ ɖɔ è ɖeji dó wǔ yè wutu. Enyi un flín ɖɔ alɔ e ɖó ɖò azɔ̌ ɔ mɛ wɛ un ɖè é nɔ sù mɛ lɛ nukúnmɛ bɔ ye nɔ ɖó linlin ɖagbe d’ewu ɔ, un nɔ mɔ ɖɔ azɔ̌ syɛnsyɛn e wà wɛ mǐ ɖè é kún nyí vɔ̌tɔ́ ó!”

Mɛ ɖevo nɔ nyí Abigail, bo nɔ kun gladɛ́ɛ lɛ kpo kɔ́bɛ́hún lɛ kpo; gudo e è nɔ nɔ n’i é kpo nǔ e è nɔ wà ɖó kpɔ́ xá ɛ é kpo nɔ sù nukún tɔn mɛ, b’ɛ ɖɔ: “Sunnu e ɖò azɔ̌watɛn ɔ lɛ é nɔ ɖè mì kpò ǎ. Ye nɔ ɖò gbesisɔmɛ bá d’alɔ mì, ye ka nɔ tɛ́n kpɔ́n bá kp’acɛ nú mì ǎ. Ye nɔ na agbɔ̌n mì bɔ un nɔ wà azɔ̌ ce.”

Gbɔn vo nú macinu janginjangin vovo lɛ zinzan ɔ, è lɛ́ kplɔ́n azɔ̌ elɔ lɛ nyɔnu e ɖò Chelmsford lɛ é: Ayikúngban jlɛ́jlɛ́, ayǐ e jí è ɖè é kpo nǔ e ɖ’eji lɛ é kpo zinzan ganji, macinu lɛ biblóɖó, kpo alya e è nɔ ján bo nɔ xá jí dó w’azɔ̌ lɛ é jínján kpo. Robert e w’azɔ̌ xá nyɔnu lɛ ɖò azɔ̌ vovo kɔn é ɖɔ ɖɔ ye nɔ ɖókan dó nǔ wu, akpàkpà nɔ sɔ́ ye dó azɔ̌ wu, bɔ ye nɔ ɖó ayi doyidoslɔ́ lɛ wu. Tom e nɔ wà ayikúngban jlɛ́jlɛ́ sín azɔ̌ é ɖɔ gɔ́ na ɖɔ: “Nyɔnu ɖěɖee ɖò gbɛ̌ta ce mɛ lɛ é sín azɔ̌wiwa nɔ jɛ gan, bɔ ye nɔ lɛ́ ɖókan dó nǔ wu. Ye nɔ jló na wà azɔ̌ ɔ bɔ nǔ na vɔ ɖ’ewu.”

É sɔgbe tawun bɔ gǎn gbɛ̌ta tɔn e nɔ nyí Fergus é ɖɔ kpo akpàkpà sɔ́ mɛ kpo ɖɔ: “É ɖò wɛn ɖɔ nyɔnu lɛ ɖó tɛn yetɔn ɖò xɔgbigbá linu!”