Nǔ e Mɛsɛ́dó lɛ́ wa lɛ́ é 9:1-43
9 Amɔ̌, Sólu kán ɖ’é jí bo ná dó ya nú ahwanvú Aklúnɔ tɔn lɛ́, lobo hu yě. Énɛ́ wú ɔ, é yi vɔ̌sánúxwlémawutɔ́ ɖaxó ɔ gɔ́n,
2 bo byɔ́ ɛ ɖɔ é ní bló wěma nú émí, bónú émí ní sɔ́ yi kplɔ́ngbasá e ɖo Damási lɛ́ é, bo ná dó sixú blá mɛ ɖěbǔ e émí ná mɔ ɖo dɔ̌n, b’ɛ ná nyí Ali nǔgbó ɔ* tɔn é, lobo kplá wá Jeluzalɛ́mu, súnnu kpó nyɔ̌nu kpó bǐ.
3 Ée é ɖo ali jí xweyǐgbe bo ko sɛkpɔ́ Damási é ɔ, wěziza ɖé gosín jǐxwé, bo hɔ́n lɛ́ lɛ̌ dó è ajijimɛ,
4 b’ɛ j’ayǐ bo se gbe ɖé, bɔ gbe ɔ ɖɔ n’i ɖɔ: “Sólu, Sólu, étɛ́wú a ka ɖo ya dó nú mì wɛ?”
5 É kanbyɔ́ ɖɔ: “Hwi mɛ̌ ka wɛ, Aklúnɔ?” Gbe ɔ ɖɔ: “Nyɛ Jezu e dó ya ná a ɖe é wɛ.
6 Amɔ̌, sí te bo yi toxo ɔ mɛ; è ná ɖɔ nǔ e a ɖó ná wa é nú we.”
7 Mɛ e kpó é kpó zɔn lɛ́ é cí te, bo sɔ́ sixú kɛ nu ǎ. Yě se bɔ gbe ɖé ɖo ɖiɖi wɛ nǔgbó, yě ka mɔ mɛ ɖěbǔ ǎ.
8 Énɛ́ ɔ, Sólu sí te sín kɔ́mɛ. Nukún tɔn lɛ́ ɖo te có, é sixú mɔ nǔtí ǎ. Énɛ́ wú ɔ, mɛ e kpó é kpó zɔn lɛ́ é hɛn alɔ tɔn, bo kplá ɛ yi Damási.
9 É mɔ nǔtí ǎ, é ka lɛ́ ɖu nǔ alǒ nu nǔtí ǎ, káká nú azǎn atɔn.
10 Ahwanvú ɖé ka ɖo Damási fínɛ́, bo nɔ nyí Ananiyási. Aklúnɔ ylɔ́ ɛ ɖo nǔmimɔ ɖé mɛ, bo ɖɔ: “Ananiyási!” B’ɛ ɖɔ: “Nyi ɖíe, Aklúnɔ.”
11 Aklúnɔ ɖɔ n’i ɖɔ: “Sí te, bo yi toxomɛli e è nɔ ylɔ́ ɖɔ Jlɔ̌jlɔ́ é jí, bo kan nya e è nɔ ylɔ́ ɖɔ Sólu, bɔ é nyí Táasinu é byɔ́ ɖo Judási xwégbe. É ɖo ɖɛ xo wɛ fí e mǐ ɖe din é,
12 bo mɔ nǔmimɔ ɖé, bɔ nya ɖé nɔ nyí Ananiyási bo wá, bo sɔ́ alɔ ɖó jǐ tɔn, bónú é ná dó sixú lɛ́ jɛ nǔ mɔ jí.”
13 Amɔ̌, Ananiyási yí gbe ɖɔ: “Aklúnɔ, un se bɔ mɛ gěgé ɖɔ xó dó nya énɛ́ wú. Mɛ gěgé ɖɔ ya e é dó nú mɛ mímɛ́ towe lɛ́ ɖo Jeluzalɛ́mu é bǐ sín xó.
14 Vɔ̌sánúxwlémawutɔ́gán lɛ́ wɛ ka ná ɛ acɛ bɔ é wá fí, bo ná wlí* mɛ e nɔ ylɔ́ nyǐkɔ towe lɛ́ é bǐ.”
15 Amɔ̌, Aklúnɔ ɖɔ nú Ananiyási ɖɔ: “Yi! Ðó nya énɛ́ ɔ, alyánnú ɖé wɛ é nyí bɔ un sɔ́, bónú é ná jlá nyǐkɔ ce akɔta lɛ́, bo lɛ́ jlá axɔ́sú lɛ́ kpó Izlayɛ́li ví lɛ́ kpó.
16 Un ná xlɛ́ ɛ wǔvɛ́ tobutóbú e é ɖó ná se, ɖó nyǐkɔ ce wú é céɖécéɖé.”
17 Énɛ́ ɔ, Ananiyási yi bo byɔ́ xwé ɔ gbe lobo sɔ́ alɔ ɖó jǐ tɔn, bo ɖɔ: “Sólu, nɔví ce, Aklúnɔ Jezu e tɔ́n dó jǐ we, hwenu e a ɖo ali jí ja é wɛ sɛ́ mì dó, bónú a ní dó sixú lɛ́ mɔ nǔ, lobonú gbigbɔ mímɛ́ ní wá jǐ we.”
18 Tlóló ɔ, nǔ hwevízá ɖɔhun ɖé lɛ́ flɛ́ j’ayǐ sín nukún tɔn lɛ́ jí, bɔ é lɛ́ jɛ nǔ mɔ jí. Énɛ́ gúdo ɔ, é sí te, bɔ è bló batɛ́mu n’i.
19 É ɖu nǔ, bo vɔ́ hlɔ̌nhlɔ́n mɔ.
É nɔ kpɔ́ xá ahwanvú lɛ́ ɖo Damási nú azǎn kléwún ɖé,
20 bɔ tlóló ɔ, é jɛ jlǎjlá jí ɖo kplɔ́ngbasá lɛ́ ɖɔ Jezu wɛ nyí Vǐ Mawu tɔn.
21 Amɔ̌, é nɔ kpácá mɛ e ɖo xó tɔn se wɛ lɛ́ é bǐ, bɔ yě nɔ ɖɔ: “Nya e tɔ́n ahwan mɛ ɖěɖěe nɔ ylɔ́ nyǐkɔ énɛ́ ɖo Jeluzalɛ́mu lɛ́ é nɛ́ ǎ cé? É ná wlí* yě, bo kplá yě yi jó nú vɔ̌sánúxwlémawutɔ́gán lɛ́ wú wɛ é wá fí ǎ cé?”
22 Sólu ka fɔ́n ɔ, é nɔ ɖo hlɔ̌nhlɔ́n mɔ dó hlɔ̌nhlɔ́n jí wɛ, bɔ lěe é nɔ xlɛ́ ɖɔ Jezu wɛ nyí Klísu ɔ bɔ é nɔ xwe ali gbɔn é nɔ kpácá Jwifu e nɔ nɔ Damási lɛ́ é tawun.
23 Ée azǎn gěgé wá yi gúdo é ɔ, Jwifu lɛ́ nɔ kpɔ́ bo blá gbě, bo ná hu i.
24 Amɔ̌, Sólu wá se gbě tɔn e è blá é. Yě nɔ lɛ́ ɖo hɔntogbó lɛ́ cɔ́ wɛ ganjí zǎn kpó kéze kpó, bo ná mɔ tɛn dó hu i.
25 Énɛ́ ɔ, ahwanvú tɔn lɛ́ sɔ́ ɛ dó xasun mɛ, bo sɔ́ ɛ jɛ te gbɔn dǒ ɔ sín flɛtɛ́li lɛ́ ɖokpó nu zǎnmɛ.
26 Ée é wá Jeluzalɛ́mu é ɔ, é tɛ́n kpɔ́n bo ná nɔ kpɔ́ xá ahwanvú lɛ́, amɔ̌, xɛsi ɖi yě bǐ dó wǔtu tɔn, ɖó yě ko ɖi ɖɔ é ko húzú ahwanvú ǎ.
27 Énɛ́ wú ɔ, Baanabási d’alɔ Sólu bo kplá ɛ yi mɛsɛ́dó lɛ́ gɔ́n, lobo ɖɔ lěe Sólu mɔ Aklúnɔ ɖo ali jí, b’ɛ ɖɔ xó n’i gbɔn é nú yě tɛ́nwín lɛnwín. É lɛ́ ɖɔ lěe Sólu ɖɔ xó kpó adɔgbígbó kpó ɖo Jezu nyíkɔ mɛ ɖo Damási gbɔn é nú yě.
28 Énɛ́ ɔ, é nɔ kpɔ́ xá yě, bo nɔ gbɔn fí bǐ* ɖo Jeluzalɛ́mu, lobo nɔ ɖɔ xó ɖo Aklúnɔ nyíkɔ mɛ kpó adɔgbígbó kpó.
29 É nɔ ɖɔ xó xá Jwifu e nɔ dó Glɛ̌kigbe lɛ́ é, lobo nɔ dɔn nǔ xá yě, amɔ̌, yě tɛ́n kpɔ́n bo ná hu i.
30 Ée nɔví lɛ́ ɖ’ayi énɛ́ wú é ɔ, yě kplá ɛ yi Sezalée, bo sɛ́ ɛ dó Táasi.
31 Énɛ́ gúdo ɔ, agun e ɖo Judée, Galilée kpó Samalíi kpó lɛ́ é bǐ byɔ́ fífá mɛ, bo ɖo dǒ lí wɛ; bɔ ɖó yě xlɛ́ ɖɔ émí ɖó sísí e gɔ́ngɔ́n é nú Jexóva,* bo nɔ zán gbɛ sɔgbe xá gbɔ e gbigbɔ mímɛ́ nɔ dó nú mɛ é wútu ɔ, yě nɔ fɔ́n bo nɔ ɖo jijɛjí wɛ.
32 Piyɛ́ɛ nɔ ɖo gbě lɛ́ bǐ jí gbɔn wɛ, bo wá wá mɛ mímɛ́ e nɔ nɔ Lǐda lɛ́ é lɔ gɔ́n.
33 É mɔ nya e nɔ nyí Enɛ́ɛ é ɖo fínɛ́; nya énɛ́ ko ɖo ayǐmlɔ́mlɔ́ ɖo zan jí sín xwe tántɔn ɖíe, ɖó é xwe ayǐsó wútu.
34 Piyɛ́ɛ ɖɔ n’i ɖɔ: “Enɛ́ɛ, Jezu Klísu gbɔ azɔn nú we. Sí te bo mlá zan towe.” Bɔ é sí te tlóló.
35 Ée mɛ e nɔ nɔ Lǐda lɛ́ é kpó mɛ e nɔ nɔ ayǐkúngban wɛnjɛ Calɔ́ni tɔn jí lɛ́ é kpó bǐ mɔ nya ɔ é ɔ, yě ɖi nǔ nú Aklúnɔ.
36 Ahwanvú ɖokpó ka ɖo Jopée, bo nɔ nyí Tabíta, tínmɛ tɔn dó Glɛ̌kigbe mɛ wɛ nyí “Dɔkási.”* É nɔ wa ɖagbe tawun, bo nɔ lɛ́ hun alɔ dó ná nǔ wamamɔnɔ lɛ́.
37 Hwenu e Piyɛ́ɛ ɖo Lǐda é ɔ, Dɔkási bɛ́ azɔn bo kú. Énɛ́ ɔ, ahwanvú e ɖo toxo énɛ́ mɛ lɛ́ é lɛ wǔ nú cyɔ tɔn, bo sɔ́ mlɔ́ xɔ ɖokpó mɛ ɖo síngbó jí.
38 Ðó Lǐda sɛkpɔ́ Jopée wútu ɔ, hwenu e ahwanvú lɛ́ se ɖɔ Piyɛ́ɛ ɖo toxo énɛ́ mɛ é ɔ, yě sɛ́ mɛ we dó è ɖɔ yě ní byɔ́ ɛ ɖɔ: “Kɛnklɛ́n wá mǐ gɔ́n din tlóló.”
39 Ée Piyɛ́ɛ se mɔ̌ é ɔ, é sí te bo xwedó yě. Bɔ ée é wá é ɔ, yě kplá ɛ yi xɔ ɔ mɛ ɖo síngbó ɔ jí; asúkúsi lɛ́ sɛ yá ɛ, bo ɖo avǐ ya wɛ, lobo xlɛ́ ɛ awu tobutóbú e Dɔkási bló hwenu e é ɖo gbɛ é, gɔ́ nú nǔzínzán ɖěvo* e é bló lɛ́ é.
40 Énɛ́ ɔ, Piyɛ́ɛ ɖe mɛ lɛ́ bǐ tɔ́n, bo jɛ kpo, lobo xo ɖɛ. Énɛ́ gúdo ɔ, é lílɛ́ kpan nukɔn cyɔ ɔ, lobo ɖɔ: “Tabíta, fɔ́n!” É hun nukún, bɔ ée é mɔ Piyɛ́ɛ é ɔ, é fɔ́n jínjɔ́n ayǐ.
41 Piyɛ́ɛ ná ɛ alɔ, bo fɔ́n ɛ sí te, lobo ylɔ́ mɛ mímɛ́ lɛ́ kpó asúkúsi lɛ́ kpó, bo sɔ́ ɛ xlɛ́ yě gbɛɖe.
42 Xó énɛ́ gba kpé Jopée gbé ɔ bǐ jí, bɔ mɛ gěgé ɖi nǔ nú Aklúnɔ.
43 Piyɛ́ɛ nɔ Jopée, ɖo anyǔzɔ́watɔ́ e nɔ nyí Sinmɔ́ɔ é xwé xɔ azǎn.
Tínmɛ e ɖo do lɛ́ é
^ Klisánwun gbɛ zínzán kpó nǔkplɔ́nmɛ klisánwun lɛ́ tɔn kpó wɛ é nɔ dó gesí.
^ Blǔju tɔn, “blá; dó gɛdɛ.”
^ Blǔju tɔn, “blá.”
^ Blǔju tɔn, “nɔ ɖo yiyi wɛ, bo nɔ ɖo wǐwá wɛ.”
^ Nyǐkɔ Glɛ̌kigbe tɔn Dɔkási kpó Alámugbe tɔn Tabíta kpó bǐ sín tínmɛ wɛ nyí “Tɛ́.”
^ Alǒ “awu aga tɔn.”
