Wěma Nǔɖexlɛ́mɛ tɔn 7:1-17
7 Énɛ́ gúdo ɔ, un mɔ wɛnsagun ɛnɛ, bɔ yě ɖo te ɖo wɛ̌kɛ́zo ɛnɛ ayǐkúngban ɔ tɔn lɛ́ jí, bo hɛn jɔhɔn ɛnɛ ayǐkúngban ɔ tɔn lɛ́ ɖó te gbánwúngbánwún, bónú jɔhɔn ɖěbǔ ní ma nyi dó ayǐkúngban ɔ, alǒ xu, abǐ atín ɖěbǔ jí ó.
2 Un mɔ wɛnsagun ɖěvo, bɔ é gosín zǎnzǎnhwe jí* bo ɖo jǐ yi wɛ, bo hɛn wuntun Mawu gbɛɖe ɔ tɔn ɖokpó, bɔ é sú xó tlílí sɛ́dó wɛnsagun ɛnɛ e è ná acɛ ɖɔ yě ní wa nǔ dó ayǐkúngban ɔ kpó xu kpó wú lɛ́ é,
3 bo ɖɔ: “Mi ma wa nǔ dó ayǐkúngban ɔ, alǒ xu, abǐ atín lɛ́ wú káká cóbónú mǐ ná ɖó wuntun Mawu mǐtɔn sín kannumɔ lɛ́ ɖó nukɔn fó ó.”
4 Un se mɛ nabí e è ɖó wuntun é sín kɛ́n, mɛ 144 000 wɛ è ɖó wuntun ɖo akɔta Izlayɛ́li ví lɛ́ tɔn bǐ mɛ:
5 Ðo akɔta Judáa tɔn mɛ ɔ, mɛ 12 000 wɛ è ɖó wuntun;ɖo akɔta Hwlibɛ́ni tɔn mɛ ɔ, mɛ 12 000;ɖo akɔta Gadi tɔn mɛ ɔ, mɛ 12 000;
6 ɖo akɔta Acɛ́ɛ tɔn mɛ ɔ, mɛ 12 000;ɖo akɔta Nɛfutáli tɔn mɛ ɔ, mɛ 12 000;ɖo akɔta Manasée tɔn mɛ ɔ, mɛ 12 000;
7 ɖo akɔta Sinmɛnyɔ́ɔ tɔn mɛ ɔ, mɛ 12 000;ɖo akɔta Levíi tɔn mɛ ɔ, mɛ 12 000;ɖo akɔta Isakáa tɔn mɛ ɔ, mɛ 12 000;
8 ɖo akɔta Zabulɔ́ɔn tɔn mɛ ɔ, mɛ 12 000;ɖo akɔta Jozɛ́fu tɔn mɛ ɔ, mɛ 12 000;ɖo akɔta Bɛnjamɛ́ɛ tɔn mɛ ɔ, mɛ 12 000 wɛ è ɖó wuntun.
9 Énɛ́ gúdo ɔ, un mɔ ahwan ɖaxó ɖé, bɔ mɛ ɖěbǔ sixú xa yě ǎ; yě gosín to bǐ, akɔta bǐ, togun bǐ kpó gbe bǐ kpó mɛ, bo ɖo te ɖo axɔ́súzinkpo ɔ kpó Lɛ̌ngbɔ́ví ɔ kpó nukɔn, bɔ yě dó awu gaga wěwé; bɔ děma ɖo alɔ mɛ nú yě.
10 Yě nɔ ɖo xó sú wɛ tlílí ɖɔ: “Mawu mǐtɔn e ɖo ayǐjínjɔ́n ɖo axɔ́súzinkpo ɔ jí é kpó Lɛ̌ngbɔ́ví ɔ kpó gɔ́n wɛ hwlɛngán mǐtɔn gosín.”
11 Wɛnsagun lɛ́ bǐ ɖo te bo lɛ́ lɛ̌ dó axɔ́súzinkpo ɔ kpó mɛxó lɛ́ kpó, kpódó nǔɖogbɛ ɛnɛ lɛ́ kpán, bɔ yě xwe agbɔ̌nnusú do ɖo axɔ́súzinkpo ɔ nukɔn, bo sɛn Mawu,
12 bo nɔ ɖɔ: “Amǐ! Kpikpa, susu, nǔnywɛ́, kúdídó, yɛ̌yi, acɛ kpó hlɔ̌nhlɔ́n kpó ní nyí Mawu mǐtɔn tɔn káká sɔ́yi mavɔmavɔ. Amǐ.”
13 Énɛ́ ɔ, mɛxó lɛ́ ɖokpó ɖɔ nú mì ɖɔ: “Mɛ énɛ́ lɛ́ e ɖo awu gaga wěwé mɛ é ɔ, mɛ̌ mɛ̌ e ka wɛ, bɔ fítɛ́ yě ka gosín?”
14 Bɔ tlóló ɔ, un ɖɔ n’i ɖɔ: “Aklúnɔ ce, hwi wɛ tuun.” Bɔ é ɖɔ nú mì ɖɔ: “Mɛ énɛ́ lɛ́ wɛ nyí mɛ ɖěɖěe xo wǔvɛ́ ɖaxó ɔ zlɛ́ lɛ́ é, bɔ yě nya awu gaga yětɔn lɛ́ dó Lɛ̌ngbɔ́ví ɔ sín hun mɛ, bɔ awu lɛ́ wé.
15 Énɛ́ wú wɛ yě ɖo te ɖo axɔ́súzinkpo Mawu tɔn nukɔn, bo ɖo sinsɛnzɔ́ mímɛ́ wa n’i wɛ zǎn kéze ɖo tɛ́npli tɔn mɛ; bɔ Mɛ e ɖo ayǐjínjɔ́n ɖo axɔ́súzinkpo ɔ jí é ná vlɔ́n goxɔ tɔn dó yě jí.
16 Xovɛ́ sɔ́ ná sin yě ɖě ǎ, kɔ ka sɔ́ ná xú yě ɖě ǎ, mɔ̌ jɛ́n hwesivɔ́ ma ná mɛ yě ǎ é nɛ́, yě ka ná lɛ́ mɔ yǒzo ɖě ǎ,
17 ɖó Lɛ̌ngbɔ́ví ɔ, éé ɖo axɔ́súzinkpo ɔ tɛ́ntin é ná nyí lɛ̌ngbɔ́nyitɔ́ yětɔn, bo ná xlɛ́ ali yě yi jɔtɛn* sin e nɔ ná gbɛ mɛ é tɔn lɛ́ kɔn. Bɔ Mawu ná súnsún ɖasin bǐ sín nukún yětɔn mɛ.”
