Wěma e è wlán sɛ́dó Titu é 2:1-15
2 Amɔ̌ hwɛ ɔ, nɔ fɔ́n bo nɔ ɖo nǔ e sɔgbe xá nǔkplɔ́nmɛ ɖagbe ɔ é* kplɔ́n mɛ wɛ.
2 Súnnu mɛxómɔ lɛ́ ɖó ná nɔ nɔ jlɛ̌ jí ɖo nǔwalɔ yětɔn lɛ́ mɛ, yě ɖó ná nyí mɛ sísí, yě ɖó ná nɔ ɖó ayi te, yě ɖó ná nɔ gbí dɔn ɖo nǔɖiɖi, wǎnyíyí kpó didɛ kpó mɛ.
3 Mɔ̌ ɖokpó ɔ, nyɔ̌nu mɛxómɔ lɛ́ ɖó ná nɔ ɖó sísí nú Mawu ɖo nǔwalɔ yětɔn lɛ́ mɛ, yě ɖó ná nyí jidómɛtɔ́ ǎ, yě ɖó ná nyí kannumɔ nú vɛ̌ɛn gěgé nunu ǎ, yě ɖó ná nɔ kplɔ́n nǔ ɖagbe mɛ,
4 bo ná dó sixú ɖe wě xá* nyɔ̌nu e ma ko nyí mɛxó ǎ lɛ́ é ɖɔ yě ní yí wǎn nú asú yětɔn kpó vǐ yětɔn lɛ́ kpó,
5 yě ní nɔ ɖó ayi te, yě ní nyí mɛ mímɛ́, yě ní nɔ kpé nukún dó xwégbezɔ́ yětɔn lɛ́ wú, yě ní nyí nyɔ̌nu ɖagbe, yě ní nɔ hwíhwɛ́ yěɖée dó asú yětɔn lɛ́ glɔ́, bónú è ní ma mɔ xó ɖɔ dó mawuxó ɔ wú ó.
6 Mɔ̌ ɖokpó ɔ, nɔ fɔ́n bo nɔ ɖo byɔ̌byɔ́ dɔ̌nkpɛvú lɛ́ wɛ vɛ́návɛ́ná ɖɔ yě ní nɔ ɖó ayi te.
7 Hwiɖésúnɔ ní nɔ ɖe xlɛ́ ɖɔ émí nyí kpɔ́ndéwú nǔɖagbewiwa tɔn ɖo ali bǐ nu. Nɔ kplɔ́n nǔ e nyí nǔ mímɛ́ é mɛ* dó nǔjɔnǔ mɛ bǐ mlɛ́mlɛ́;
8 nɔ ɖɔ xó ɖagbe e wú è ma sixú mɔ nǔɖé ɖɔ dó ǎ é* dó wa mɔ̌, bónú mɛ e nɔ klán gbe xá mǐ lɛ́ é ní dó sixú ɖu winnyá, ɖó yě ná mɔ nǔ nyanya ɖě ɖɔ dó mǐ wú ǎ.
9 Kannumɔ lɛ́ ní nɔ hwíhwɛ́ yěɖée dó gǎn yětɔn lɛ́ glɔ́ ɖo nǔ bǐ mɛ, yě ní nɔ tɛ́n kpɔ́n bo ná nyɔ́ ɖo nukún yětɔn mɛ, yě ní ma nɔ mɔ xó ɖɔ dó xó e gǎn yětɔn lɛ́ ɖɔ lɛ́ é wú ó,
10 yě ní ma nɔ j’ajo dó yě ó, é nyɔ́ wa ɔ, yě ní ɖe xlɛ́ ɖɔ émí nyí mɛ ɖejidéwú bǐ mlɛ́mlɛ́, bo ná dó sixú b’acɔ́ nú nǔkplɔ́nmɛ Mawu Mɛhwlɛ́ngántɔ́ mǐtɔn tɔn ɖo ali bǐ nu.
11 Ðó è ko ɖe fɛ́nú Mawu tɔn xlɛ́, bɔ fɛ́nú énɛ́ hɛn hwlɛngán wá nú gbɛtɔ́ alɔkpa lɛ́ bǐ.
12 Fɛ́nú énɛ́ nɔ kplɔ́n mǐ bónú mǐ ná nyi alɔ nú sísí ma ɖó nú Mawu kpó jlǒ gbɛ ɔ tɔn lɛ́ kpó, bo ná nɔ zán gbɛ kpó ayiɖote kpó, kpódó nǔjlɔ́jlɔ́wiwa kpán, lobo ná nɔ lɛ́ nɔ gbejí nú Mawu ɖo gbɛ* élɔ́ mɛ.
13 Ðo hwe ɖokpó ɔ nu ɔ, mi nú mǐ ní ɖo te kpɔ́n nukúnɖíɖó jí wǔ mǐtɔn, gɔ́ nú ɖe e Mawu ɖaxó ɔ kpó Mɛhwlɛ́ngántɔ́ mǐtɔn Jezu Klísu kpó ná ɖe yěɖée xlɛ́ kpó súsú kpó é.
14 Jezu énɛ́ wɛ sɔ́ éɖée jó dó ta mǐtɔn mɛ, bo ná dó tún kan nú mǐ* sín sɛ́ngbigba alɔkpa bǐ sí, lobo lɛ́ slá wǔ nú togun e nyí nǔɖókan tɔn bǔnɔ, bo nɔ ɖó kan dó azɔ̌ ɖagbe wiwa wú é.
15 Nɔ fɔ́n bo nɔ ɖo nǔ énɛ́ lɛ́ kplɔ́n mɛ wɛ, bo nɔ ɖo wǔsyɛ́n dó lanmɛ nú mɛ wɛ,* lobo nɔ ɖo nǔ gbɛ́ nú mɛ wɛ kpó acɛ e è ná we é bǐ kpó. Ma lɔn bónú mɛ ɖěbǔ ní hu tɛ́ nú we ó.
Tínmɛ e ɖo do lɛ́ é
^ Alǒ “nǔkplɔ́nmɛ e nɔ hɛn le wá é.”
^ Alǒ “kplɔ́n nǔ.”
^ Alǒ vlafo, “Nɔ kplɔ́n nǔ mɛ ɖo ali e mɛ́ é nu.”
^ Alǒ “nɔ ɖɔ xó e nɔ hɛn le wá bɔ è ma sixú mɔ nǔɖé ɖɔ d’é wú ǎ é.”
^ Kpɔ́n Xógbe ɖé lɛ́ sín tínmɛ.
^ Blǔju tɔn, “xɔ gbɛ nú mǐ.”
^ Alǒ “akɔ́nkpinkpan ná mɛ wɛ.”
