Nɛ̌ Mawu ka Nɔ Nyí? Mawu ɖesu ɖɔ: ‘Nyi wɛ nyí Jehovah; mɔ̌ wɛ nyikɔ ce nyí.’ (Ezayíi 42:8) Ðò Biblu Fɔngbe tɔn MAWUXÓWEMA mɛ ɔ, è ɖyɔ nyikɔ Jehovah ɔ kpo tɛnmɛnyikɔ “Mawu Mavɔmavɔ” kpo. (Kpɔ́n Xónusɔ́ɖóte MAWUXÓWEMA tɔn.) Lilɛdógbeɖevomɛ Biblu tɔn gegě wà nǔ ɖokpo ɔ bo sɔ́ tɛnmɛ nyikɔ lɛ, ɖi “Aklunɔ” dó nyikɔ ɔ tɛnmɛ. Amɔ̌, nǔgbo ɔ wɛ nyí ɖɔ nyikɔ Mawu tɔn tɔ́n ɖò nǔwlanwlán dodó ɔ mɛ azɔn 7 000 jɛji. Mawu ba ɖɔ mǐ ni nyí xɔ́ntɔn emitɔn, enɛ wu ɔ, é dó wusyɛn lanmɛ nú mǐ ɖɔ mǐ ni súxó ylɔ́ nyikɔ emitɔn.—Ðɛhan 105:1.

Tɛnmɛnyikɔ Jehovah Tɔn Lɛ. Biblu nɔ ylɔ́ Jehovah kpo tɛnmɛnyikɔ lěhun lɛ kpo: “Mawu,” “Nǔbǐwukpétɔ́,” “Gbɛɖotɔ́,” “Tɔ́,” “Aklunɔ” kpo “Aklunɔ Mavɔmavɔ” kpo. Ðò ɖɛ e mɛ lɛ xò sɛ́dó Jehovah bɔ è wlan dó Biblu mɛ lɛ é gegě mɛ ɔ, ye zán tɛnmɛ nyikɔ e  sísí jɛxa lɛ é kpo nyikɔ Jehovah ɔ lɔ kpo.—Daniyɛli 9:4.

Mɛ Alɔkpa E Mawu Nyí É. Mawu nyí gbigbɔ e nukún ma nɔ mɔ ǎ é ɖé. (Jaan 4:24) Biblu tɛɖɛ̌ jí ɖɔ: “Mɛɖebǔ mɔ Mawu kpɔ́n gbeɖé ǎ.” (Jaan 1:18) Biblu ɖɔ lee nǔ nɔ cí n’i é. Nǔwiwa gbɛtɔ́ lɛ tɔn sixu zɔ́n bɔ é na blawǔ, alǒ hɛn xomɛ hun i.—Nǔnywɛxó 11:20; Ðɛhan 78:40, 41.

Jijɔ Jiwǔ Mawu Tɔn Lɛ. È na bo gosin tò ɖebǔ alǒ ninɔmɛ ɖebǔ mɛ ɔ, Mawu nɔ ɖè mɛɖé ɖó vo ɖò mɛɖé mɛ ǎ. (Mɛsɛ́dó 10:34, 35) É lɛ́ nyí “Mawu nǔblawukúnúmɛtɔ́, Mawu xomɛfátɔ́, [é] nɔ yawǔ sin xomɛ ǎ, [é] nyí Mawu xomɛnyɔtɔ́, [é] nyí Mawu gbejinɔtɔ́.” (Tíntɔ́n 34:6, 7) Amɔ̌, jijɔ Mawu tɔn ɛnɛ lɛ́ dɔn mɛ hugǎn.

Hlɔnhlɔn. Ðó é nyí “Mawu Nǔbǐwukpétɔ́” wutu ɔ, é ɖó hlɔnhlɔn e ma ɖó dogbó ǎ é, bo nɔ wà nǔ ɖebǔ e sín akpá é dó é.—Bǐbɛ̌mɛ 17:1.

Nǔnywɛ. Nǔnywɛ Mawu tɔn zɛ mɛ ɖevo ɖebǔ tɔn wu flaflá tɔn. Nǔ e ɖɔ wɛ Biblu ɖè hwenu e é ɖɔ é nyí “Mawu nǔnywɛtɔ́ ɖokpo géé e tíìn ɔ” é nɛ.—Hlɔmanu lɛ 16:27.

Hwɛjijɔ. Mawu nɔ wà nǔ e sɔgbe é hwebǐnu. “Nǔwiwa tɔn lɛ nyɔ́ bɔ nǔ vɔ ɖ’ewu.”—Sɛ́nflínmɛ 32:4.

Wanyiyi. Biblu ɖɔ ɖɔ “Mawu ɔ, wanyiyi wɛ é nyí.” (1 Jaan 4:8) É nyí wanyiyi kɛɖɛ wɛ Mawu nɔ ɖexlɛ́ ǎ, éɖesu ɔ bǐ wɛ nyí wanyiyi. Wanyiyi tɔn e d’agba é nɔ kúnkplá nǔ e é nɔ wà lɛ é bǐ, bɔ mǐ nɔ ɖu lè tɔn ɖò ali gegě nu.

Xɔ́ntɔn E Mawu Nɔ Zun Xá Gbɛtɔ́ lɛ É. Mawu wɛ nyí Tɔ́ mǐtɔn jixwé tɔn wanyiyinɔ ɔ. (Matie 6:9) Enyi mǐ ɖi nǔ n’i ɔ, mǐ sixu nyí xɔ́ntɔn tɔn lɛ. (Ðɛhan 25:14) Nǔgbo ɔ, Mawu byɔ we ɖɔ a ni sɛkpɔ emi gbɔn ɖɛxixo gblamɛ, bo “zlɔ́n nǔ e ɖò linkpɔ́n nyí nú [we] wɛ lɛ bǐ sín agban ɖó jǐ [emi]tɔn, ɖó é ɖò nukún kpé dó [wǔ we] wɛ.”—1 Piyɛ́ɛ 5:7; Jaki 4:8.

Jezu kpo Mawu kpo Nyí Mɛ Ðokpo ɔ Ǎ. Jezu gbɔn vo, é wɛ nyí mɛ ɖokpo e Mawu dá tlɔlɔ é. Nǔ e wu Biblu ylɔ́ ɛ ɖɔ Vǐ Mawu tɔn é nɛ. (Jaan 1:14) Jehovah dá Jezu gudo é ɔ, é zán nukɔngbeví tɔn bɔ é nyí “azɔ̌gán” ɖé, bɔ ye dá nǔ ɖevo kpo mɛ ɖevo e kpò lɛ é bǐ kpo.—Nǔnywɛxó 8:30, 31; Kolosinu lɛ 1:15, 16.

 Jezu Klisu ɖɔ gbeɖé ɖɔ emi nyí Mawu ǎ. É nyɔ́ wà ɔ, é tinmɛ ɖɔ: “Afɔsɔ́ɖótetɔ́ [Mawu] tɔn wɛ un nyí, bɔ É wɛ sɛ́ mì dó.” (Jaan 7:29, nwt) Hwenu e Jezu ɖò xó ɖɔ nú ahwanvu tɔn lɛ ɖokpo wɛ é ɔ, é ylɔ́ Jehovah ɖɔ “Tɔ́ ce e nyí Tɔ́ mi lɔ tɔn é,” “Mawu ce e nyí Mawu mi lɔ tɔn é.” (Jaan 20:17) Ee Jezu kú gudo é ɔ, Jehovah fɔ́n ɛ, b’ɛ na nɔ gbɛ̀ ɖò jixwé, bo na ɛ acɛ ɖaxó ɖò aɖisí lɔ Tɔn mɛ.—Matie 28:18; Mɛsɛ́dó 2:32, 33.

Jezu Klisu Sixu D’alɔ We Bɔ A Na Sɛkpɔ Mawu

Jezu wá ayikúngban ɔ jí bo na dó kplɔ́n nǔ mǐ dó Tɔ́ tɔn wu. Jehovah ɖesunɔ ɖɔ dó Jezu wu ɖɔ: “Vǐ ce vívɛ́ná wɛ nyí mɛ elɔ.” (Maki 9:7) Jezu tuùn Mawu ganji hugǎn mɛ ɖevo ɖebǔ. É ɖɔ: “Mɛɖebǔ . . . tuùn mɛ e Tɔ́ ɔ nyí ɔ zɛ Vǐ ɔ kpodo mɛ e Vǐ ɔ jló na ɖè è xlɛ́ lɛ kpo wu ǎ.”—Luki 10:22.

Jezu ɖè jijɔ Mawu tɔn lɛ xlɛ́ bɔ nǔ bǐ vɔ ɖ’ewu. Jezu ɖè jijɔ Mawu tɔn lɛ xlɛ́ sɔmɔ̌, bo kpéwú bo ɖɔ: “Mɛ e mɔ mì ɔ ko mɔ Tɔ́ ɔ.” (Jaan 14:9) Jezu bló bɔ mɛ lɛ sɛkpɔ Mawu gbɔn wanyiyi Tɔ́ tɔn tɔn ɖiɖexlɛ́ ɖò xó kpo walɔ tɔn lɛ kpo mɛ gblamɛ. É ɖɔ: “Nyɛ wɛ nyí ali ɔ, bo nyí nǔgbo ɔ, bo ka lɛ́ nyí gbɛ̀ ɔ. Mɛɖebǔ sixu yì Tɔ́ ɔ gɔ́n nyɛ mɛvo ǎ.” (Jaan 14:6) É lɛ́ ɖɔ: “Mawu sɛntɔ́ titewungbe lɛ na sɛn Tɔ́ ɔ gbɔn hlɔnhlɔn [gbigbɔ] ɔ tɔn mɛ, bo na sɛn ɛ ɖò nǔgbo mɛ. Ðó Mawu sɛntɔ́ mɔhunkɔ lɛ ba wɛ Tɔ́ ɔ ɖè.” (Jaan 4:23) Dǒ nukún mɛ kpɔ́n! Jehovah ɖò gbɛtɔ́ hwi ɖɔhun e jló na tuùn nǔgbo ɔ dó wǔtu tɔn lɛ é ba wɛ.