TOƁERE 3
Oo Kibaaru moƴƴo ko ka Allah o iwri ?
1. Ko miijo hommbo woni ka nder Deftere Allah ?
Kibaaru moƴƴo holluɗo on banii-Aadama wuuray haa poomaa e hoore ndii leydi, no winndii ka nder Deftere Allah (Matta 5:5). Deftere Allah nden no sennditii e defte 66 cewɗe. Allah suɓino yimɓe 40 ɗoftiiɓe fii winndugol Deftere makko nden. Ko annabi Muussa winndunoo deftere aranere nden ko yahata duuɓi 3 500. Yuuhaana winndi deftere sakkitiinde nden duuɓi 1 900 ɓaawo ɗoo. Ko miijooji hommbo ɓe winndi ? Allah feɲɲinaniri ɓe ruuhu makko on (Feɲɲinannde 1:1). Ko miijo Allah ɓe winndi hinaa miijooji maɓɓe. Ko ɗun waɗi, ko daaluyee Allah woni ka nder Deftere makko. — Janngee 2 Timotee 3:16 ; 2 Petruusu 1:20, 21.
Ndaaree vidio on Ko miijo hommbo woni ka nder Deftere Allah ?
2. Fii honɗun hoolantoɗen Deftere Allah nden ko goonga ?
Hiɗen anndi Deftere nden ko ka Allah iwri ɓayri hinde holli ko ɓuri e fanɗude fii ko aroyta. Hay gooto waawataa waɗude ɗun (Yaasuwa 23:14, TMN). Ko Allah Jom Bawgal tun waawata anndude fii ko aroyta. — Janngee Tiituusa 1:2, 3.
Tigi tigi on, deftere iwrunde ka Allah ko bajjere. Guluuji e guluuji ndee Deftere Allah no sennditaa e haalaaji ɓurɗi teemedere. Fii kala Deftere Allah nden wonaa deftere lekol, kono ko nde wi’i kon fow ko haqiiqa. Ɓee yimɓe 40 winnduɓe Deftere Allah nden yeddondiraali. Hinde holli giggol Allah ngol e hinde waawi waylude jikku men ngun fii no waɗiren ko moƴƴi *. Ɗun ɗoo fow no holli ko daaluyee Allah. — Janngee 1 Tesalonii 2:13.
3. Ko honɗun Deftere Allah nden holli ?
Allah daali ka Deftere makko fii pijii moƴƴuɗi ko o miijanii en. Hinde holli honno aljanna majjiri en e honno Allah jonniroyta en aljanna. — Janngee Feɲɲinannde 21:4, 5.
Deftere Allah nden no wondi e sariyaaji, tugaale e waaju. Hinde holli honno Allah huuwondiraynoo e yimɓe ɓen e honno o sifori. Deftere Allah nden no waawi en wallude no anndiren Allah. Hinde holli honno wonirten jiyaaɓe makko. — Janngee Zabuura 19:7, 11, TMN ; Yaaquuba 2:23 ; 4:8.
Ndaaree vidio on Honno hoolortoɗen Deftere Allah nden ko goonga ?
4. Ko honno faamirten Deftere Allah nden ?
Ndee deftere ɗoo wallay en no faamiren Defere Allah nden wano annabaaɓe ɓen waɗirnoo non. Ɓe ɓaarorno aayeeje Deftere Allah nden ɓe sifii. — Janngee Luuka 24:27, 45.
Alaa ko ɓuri e moƴƴude wano Kibaaru iwruɗo ka Allah on. Kono buy alaa jentaade e woɓɓe weltaaki. Wota en aamu ɓayri si hiɗen faalaa wuurugol haa poomaa, ko yo en jento Allah. — Janngee Yuuhanna 17:3.
^ § 3 Si hiɗon faalaa ɓeydugol, on ndaaray nder ndee deftere Un livre pour tous.
