Woɓɓe no miijaade si Daaluyee Alla on (Binndi seniiɗi ɗin) waylaama. Annabi Isaaya wi’uno wonndema Daaluyee Alla on « luttay haa poomaa » (Isaaya 40:8). Ko honno fellitirten fodaaje Alla ɗen no marirano no haaniri non ?

Alla no mari bawgal marugol e hiwugol Daaluyee makko on fii wota o ɓoyle. Ɓaawo ɗoo, fewndo winnditooɓe ɓen waɗi egguɗe Binndi seniiɗi ɗin, ɓe wattanno yila e hoore limugol kala alkulal fii wota huunde ɓeyde, waylee maa yejjittee. Ɓay yimɓe ɓen wonaa timmuɓe, woɓɓe e winndituɓe ɓen waɗuno palje ɗe tiiɗaa.

No woodi egguɗe kiɗɗe guluuji guluuji Binndi seniiɗi ɗin. Si eggunde wootere no mari ko seedi seeɗa tun, eɓɓindirgol nde e goɗɗe goo hollay ko sertindini ɗe kon *.

Yewten fii Defte kiɗɗe taggaaɗe bahaaru Mayɗo on ɗe Bédouins (Aarabuuɓe waɗaynooɓe safaari ka jeereende) yi’unoo takko pammeeje bahaaru Mayɗo on e hitaande 1947. Ɗee egguɗe kiɗɗe no mari pecce Binndi seniiɗi ɗin ko ɓuri duuɓi guluuji ɗiɗi. Annduɓe ɓen eɓɓindirno ɗee egguɗe kiɗɗe e Binndi seniiɗi ɗi maruɗen ɗin hannde. Ko honɗun ɓe yi’unoo ?

Ɓe yi’uno ko woni ka nder Binndi seniiɗi ɗi maruɗen hannde ɗin no yaadi e binndi arani ɗin *. Ko ɓe lasindii kon no holli ko wonuɗen e janngude ka nder Binndi seniiɗi ko ka Alla iwri. Hiɗen waawi fellitude wonndema Alla hiwuno moƴƴa Binndi seniiɗi ɗin fii men hannde.

Ko ɗun waɗi, hiɗen waawi hoolaade ko timmi ko wonuɗen e janngude kon ko goonga. E hoore anndugol ɗun, ndaaren ko janngeten kon fii Alla rewrude e annabaaɓe makko ɓen.