“Esa akɛ ofee nibii ni mɛi krokomɛi feɔ lɛ, kɛjeee nakai lɛ, onáŋ nanemɛi, onáŋ miishɛɛ, ni wɔsɛɛ hu lɛ, ehiŋ ehãŋ bo. Mɔ ko mɔ ko susuŋ ohe, ni ohe baafee shoo.”​—Carl.

Ani aawo sane he? Ekolɛ, obaasusu nakai. Mɛi komɛi baafee nɔ fɛɛ nɔ ni amɛbaanyɛ koni amɛkayaje shihilɛ ni Carl wie he lɛ mli. Ani bo hu obaafee nakai? Sane nɛɛ baaye abua bo ni ona gbɛ ni hi fe fɛɛ ni obaatsɔ nɔ oná nanemɛi.

•  Mɛni hewɔ mɛi sumɔɔ ni amɛfee nibii koni mɛi akana akɛ esoro amɛ?

•  Nɔ ni esa akɛ ole

•  Nɔ ni otipɛŋfoi kɛɔ

• Ejaakɛ amɛsumɔɔɔ ni afee nɔ ko ni amɛbɛ mli. “Mina minanemɛi afoto yɛ intanɛt lɛ nɔ ni amɛje kpo ni mifataaa he. Enɛ hã mibi mihe akɛ, ani naagba ko yɛ mihe lo? Ni ehã minu he akɛ amɛsumɔɔɔ misane loo amɛsumɔɔɔ ni amɛkɛ mi bɔɔ.”​—Natalie.

  KƐHÃ HE SUSUMƆ: Ani onu he pɛŋ akɛ mɛi komɛi sumɔɔɔ ni okɛ amɛ bɔɔ? Ani ofee tsakemɔi koni onyɛ okɛ amɛ abɔ?

• Ejaakɛ amɛsumɔɔɔ ni anaa amɛ akɛ amɛyɛ srɔto. “Mifɔlɔi sumɔɔɔ ni mihiɛɔ foŋ. Kɛ́ minanemɛi lɛ bi mi minɔmba ni mikɛɛ amɛ akɛ mibɛ foŋ lɛ, amɛkɛɔ akɛ: ‘Mɛni okɛɛ? Mɛni, gbekɛ ji bo?’ Kɛ́ mikɛɛ amɛ akɛ miye afii 13 lɛ, minii feɔ amɛ mɔbɔ.”​—Mary.

  KƐHÃ HE SUSUMƆ: Mɛni ekolɛ ofɔlɔi baatsĩ onaa yɛ he ni baahã onu he akɛ esoro bo yɛ mɛi krokomɛi ahe? Te obaafee onii yɛ nakai naatsĩi lɛ he ohãa tɛŋŋ?

• Ejaakɛ amɛsumɔɔɔ ni awaa amɛ yi. “Kɛ́ gbekɛ ko efeee enii tamɔ eskulbii krokomɛi, ewieee tamɔ amɛ, loo esoro ejamɔ lɛ, amɛsumɔɔɔ esane. Kɛ́ mɛi na akɛ osumɔɔ ni esoro bo yɛ amɛhe lɛ, amɛnuɔ he akɛ amɛbaanyɛ amɛwa bo yi.”​—Olivia.

  KƐHÃ HE SUSUMƆ: Ani mɛi kɛ bo eye yɛ gbɛ ni esaaa nɔ pɛŋ akɛni esoro bo lɛ hewɔ? Te otsu shihilɛ lɛ he nii ohã tɛŋŋ?

• Ejaakɛ amɛsumɔɔɔ ni amɛnanemɛi lɛ kɛ amɛ kpaa bɔɔ. “Mibɔ mɔdɛŋ koni mafee minii tamɔ mɛi ni mikɛbɔɔ lɛ. Mibɔi wiemɔ tamɔ amɛ. Nɔ ni jeee ŋmɔlɔ hu kɛkɛ lɛ, miiŋmɔ. Mifataa minanemɛi ahe ni wɔyeɔ mɛi ahe fɛo, eyɛ mli akɛ mile akɛ nɔ ni amɛfeɔ lɛ ehiii.”​—Rachel.

  KƐHÃ HE SUSUMƆ: Ani onuɔ he akɛ esa akɛ bɔ fɛɛ bɔ ni fee lɛ, onanemɛi asumɔ osane? Ani otsake bɔ ni owieɔ loo ofeɔ onii ohãa koni onanemɛi asumɔ osane?

• Kɛ́ okwa ofee onii tamɔ mɛi koni amɛsumɔ osane lɛ, naagbee lɛ onine baanyɛ shi. Mɛni hewɔ? Ejaakɛ mɛi baana akɛ kwaa okwaa lɛ. Oblanyo ko ni atsɛɔ lɛ Brian ni eye afii 20 lɛ wie akɛ: “Kɛ́ mikwa mifee nibii koni mɛi ni mikɛyɔɔ klas lɛ asumɔ misane lɛ, bei pii lɛ esoroɔ mi yɛ amɛhe. Mikase akɛ, ehi akɛ mahi shi bɔ ni miyɔɔ lɛ, ejaakɛ kɛ́ okwa ofee ohe tamɔ mɔ ko lɛ, mɛi naa.”

  NƆ NI ESA AKƐ OFEE: Susumɔ nibii ni he hiaa bo waa lɛ ahe ekoŋŋ. Biblia lɛ kɛɛ: “Nyɛkaa nyɛkwɛa ni nyɛna nibii ni he hiaa waa lɛ.” (Filipibii 1:10) No hewɔ lɛ, bi ohe akɛ, ‘Mɛni ji nɔ ni he hiaa mi waa​—ani mafee nibii ni ehiii koni mɛi ni bɛ jeŋba asumɔ misane, aloo mafee nibii ni hi koni esoro mi?’

  “Nilee bɛ mli akɛ obaabɔ mɔdɛŋ ni otamɔ mɛi krokomɛi. No hãŋ mɛi asumɔ osane waa, ni ehãŋ oshihilɛ ahi fe bɔ ni eji bianɛ lɛ hu.”​—James.

• Kɛ́ obɔ mɔdɛŋ koni mɛi asumɔ osane lɛ, onyɛŋ ofee nibii ni obaasumɔ ni ofee. Ebaahã otsɔ mɔ ko ni daa nɛɛ eesumɔ ni efee nibii ni baasa mɛi ahiɛ. Oblanyo ko ni atsɛɔ lɛ Jeremy lɛ wie akɛ, “Be ko ni eho lɛ, misumɔɔ mafee nɔ fɛɛ nɔ kɛkɛ ni baahã mɛi pɔtɛɛ komɛi asumɔ misane ekɔɔɔ he eko kɛ́ no baafite migbɛ́i. Enɛ hã mɛi krokomɛi bɔi mi kudɔmɔ. Mitsɔ tamɔ tsobi yɛ amɛdɛŋ.”

  NƆ NI ESA AKƐ OFEE: Hii shi bɔ ni ale akɛ oyɔɔ, moŋ ni fe ni obaafee onii tamɔ obosumaketeo, ni otsake osu koni mɛi krokomɛi asumɔ osane. Yiŋtoo kpakpa hewɔ Biblia lɛ kɛɛ: “Kaafee nɔ ko akɛni mɛi krokomɛi miifee lɛ hewɔ.”​—2 Mose 23:2, Holy Bible​—Easy-to-Read Version.

  “Mibɔ mɔdɛŋ akɛ masumɔ nibii fɛɛ ni amɛsumɔɔ​—lalai, gemisii, atadei, sinii, hiɛsaamɔ nibii . . . Mibɔ mɔdɛŋ akɛ matsɔ tamɔ amɛ. Efeɔ mi akɛ amɛna akɛ miifee osato. Etamɔ nɔ ni mɔ fɛɛ mɔ na mi nakai, ni mi hu mile nakai. Naagbee lɛ, mimiishɛɛ tã ni mihe fee shoo, ni minaaa mɔ tuuntu po ni miji dɔŋŋ. Minaaa nibii ni misumɔɔ, ni minyɛɛɛ masusu nii ahe hu dɔŋŋ. Miyɔse akɛ mɔ fɛɛ mɔ nyɛŋ asumɔ misane loo ená mihe miishɛɛ. Enɛ etsɔɔɔ akɛ okɛ mɛi akabɔ naanyo; too otsui shi ni ohã ehi ojwɛŋmɔ mli akɛ, ebaahe be dani obaana naanyo kpakpa ni agbɛnɛ hu oda ni otsɔ onukpa kpakpa.”​—Melinda.

• Kɛ́ ofee nibii ni hãaa esoro bo lɛ, ebaanyɛ esa ojeŋba he. Oblanyo ko ni atsɛɔ lɛ Chris lɛ na akɛ nakai ji bɔ ni enyɛkwɛ ko binuu feɔ enii. Chris kɛɛ akɛ: “Ebɔi nibii komɛi ni kulɛ efeee lɛ feemɔ​—eko ji, ekɛ tsofai bɔi nitsumɔ yɛ gbɛ ni ejaaa nɔ​—bɔ ni afee ni ekasoro lɛ yɛ enanemɛi lɛ ahe. Tsofai nɛɛ kɛnitsumɔ ka ehe, ni shwɛ sharao ni eshihilɛ fite kwraa.”

  NƆ NI ESA AKƐ OFEE: Tsi ohe kɛje mɛi ni kɛ amɛwiemɔ kɛ amɛnifeemɔ tsɔɔ akɛ amɛbaaa amɛjeŋ jogbaŋŋ lɛ ahe. Biblia lɛ kɛɛ: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ, shi mɔ ni kɛ kwashiai bɔɔ lɛ, egbeŋ naa ekpakpa.”​—Abɛi 13:20.

  “Bei komɛi lɛ, ehi akɛ obaamia ohiɛ koni ohã mɛi asumɔ osane. Shi esaaa akɛ ofeɔ nakai kɛ́ ebaahã ofee nɔ ko ni ole akɛ ehiii. Nanemɛi kpakpai baasumɔ bo bɔ ni oyɔɔ lɛ.”​—Melanie.

  Ŋaawoo: Kɛ́ ootao naanyo lɛ, okɛ ojwɛŋmɔ akama mɛi ni sumɔɔ nibii ni osumɔɔ lɛ pɛ anɔ. Taomɔ mɛi ni yɔɔ jeŋba kpakpa tamɔ bo ni okɛ amɛ hiɛ hemɔkɛyeli kome ni sumɔɔ Nyɔŋmɔjamɔ waa.