Biblia lɛ wieɔ gbohii lɛ ahe akɛ: “Amɛsuɔmɔ jio, amɛnyɛɛ jio, amɛwuŋayeli jio, fɛɛ eho etee . . . Nɔ fɛɛ nɔ tsumɔ ni onine aaashɛ nɔ lɛ, okɛ ohewalɛ atsũ; ejaakɛ nitsumɔ loo yiŋshwiemɔ loo nilee loo ŋaa ko bɛ gbohiiaje he ni oyaa lɛ.” (Jajelɔ 9:6, 10; Lala 146:4) No hewɔ lɛ, gbohii nyɛŋ amɛjwɛŋ, amɛfee nɔ ko, loo amɛnu nɔ ko he. Enɛ tsɔɔ akɛ, kɛ́ wɔgbo lɛ, wɔbɛ shihilɛ mli dɔŋŋ.

“Sũ mli oooku osɛɛ kɛaatee”

 Be ni Nyɔŋmɔ kɛ klɛŋklɛŋ gbɔmɔ ni ji Adam wie lɛ, etsɔɔ nɔ ni baa wɔnɔ kɛ́ wɔgboi lɛ. Akɛni Adam eyabooo Nyɔŋmɔ toi hewɔ lɛ, Nyɔŋmɔ kɛɛ lɛ akɛ: “Sũ jio, ni sũ mli oooku osɛɛ kɛaatee!” (1 Mose 3:19) Be ni Nyɔŋmɔ ‘kɛ shikpɔŋ sũ eshɔ̃ko’ Adam lɛ, no mli lɛ Adam bɛ shihilɛ mli. (1 Mose 2:7) Nakai nɔŋŋ be ni Adam gbo lɛ, etsɔ sũ ekoŋŋ, eleee nɔ ni yaa nɔ dɔŋŋ.

 Nakai nɔŋŋ eji yɛ mɛi ni gboiɔ ŋmɛnɛ lɛ agbɛfaŋ. Be ni Biblia lɛ wieɔ adesai kɛ kooloi ahe lɛ, ekɛɛ akɛ: “Amɛ fɛɛ amɛjɛ sũ mli, ni amɛ fɛɛ amɛtsɔɔ sũ ekoŋŋ.”—Jajelɔ 3:19, 20.

Kɛ́ mɔ ko gbo lɛ, no etsɔɔɔ doo akɛ enaagbee ji no

 Bei pii lɛ, Biblia lɛ kɛ gbele toɔ gbɔmɔ ni ewɔ he. (Lala 13:4; Yohane 11:11-14; Bɔfoi lɛ Asaji 7:60) Kɛ́ mɔ ko ewɔ vii lɛ, eleee nɔ ni yaa nɔ. Nakai nɔŋŋ gbohii hu leee nibii ni yaa nɔ. Kɛ̃lɛ, Biblia lɛ tsɔɔ akɛ, Nyɔŋmɔ baanyɛ atsiɛ gbohii lɛ ahiɛ taakɛ atsiɛɔ mɔ kɛjɛɔ wɔ mli lɛ, ni ebaahã amɛ wala ekoŋŋ. (Hiob 14:13-15) Yɛ mɛi ni Nyɔŋmɔ teɔ amɛ shi lɛ agbɛfaŋ lɛ, gbo ni amɛgbo lɛ etsɔɔɔ akɛ amɛnaagbee ji no.