Nyɔŋmɔ Maŋtsɛyeli lɛ ji nɔyeli diɛŋtsɛ ni Yehowa Nyɔŋmɔ to shishi. Atsɛɔ “Nyɔŋmɔ maŋtsɛyeli lɛ” hu akɛ “ŋwɛi maŋtsɛyeli lɛ” yɛ Biblia lɛ mli, akɛni eyeɔ nɔ kɛjɛɔ ŋwɛi lɛ hewɔ. (Marko 1:14, 15; Mateo 4:17) Yɛ gbɛi babaoo anɔ lɛ, Nyɔŋmɔ Maŋtsɛyeli tamɔ adesai anɔyelii lɛ, kɛ̃lɛ, enɔ kwɔ kwraa fe amɛ yɛ nɔ fɛɛ nɔ mli.

•   Nɔyelɔi. Nyɔŋmɔ ehala Yesu Kristo akɛ Maŋtsɛyeli lɛ nɔ Maŋtsɛ, ni ehã lɛ hegbɛ kpelei ni adesa nɔyelɔ ko kwraa nyɛŋ aná eko kɔkɔɔkɔ. (Mateo 28:18) Akɛni Yesu etsɔɔ momo akɛ eji Hiɛnyiɛlɔ ni abaanyɛ akɛ hiɛ afɔ̃ enɔ, ni yɔɔ musuŋtsɔlɛ hu hewɔ lɛ, nibii ni kɛ́ efee lɛ adesai baaná he sɛɛ lɛ pɛ ekɛ hegbɛ nɛɛ tsuɔ. (Mateo 4:23; Marko 1:40, 41; 6:31-34; Luka 7:11-17) Yɛ Nyɔŋmɔ gbɛtsɔɔmɔ naa lɛ, Yesu ehala gbɔmɛi kɛjɛ maji fɛɛ anɔ koni amɛfata ehe yɛ ŋwɛi ‘kɛye shikpɔŋ lɛ nɔ akɛ maŋtsɛmɛi.’—Kpojiemɔ 5:9, 10.

•   Bei ni ekɛbaaye nɔ. Nɔ ni tamɔɔɔ adesai anɔyelii ni bayeɔ nɔ bei kukuoo ko kɛkɛ lɛ ajie amɛ lɛ, Nyɔŋmɔ Maŋtsɛyeli lɛ jeee nɔyeli ko ni abaanyɛ ‘afite lɛ kɔkɔɔkɔ.’—Daniel 2:44.

•   Eshishi bii. Mɔ fɛɛ mɔ ni feɔ Nyɔŋmɔ suɔmɔnaa nii lɛ baanyɛ afee Nyɔŋmɔ Maŋtsɛyeli lɛ shishinyo, ekɔɔɔ he eko weku mli ni ejɛ loo he ni afɔ lɛ yɛ.—Bɔfoi lɛ Asaji 10:34, 35.

•   Mlai. Jeee sui gbohii pɛ Nyɔŋmɔ Maŋtsɛyeli lɛ mlai (loo kitãi) ni ewoɔ lɛ guɔ, eyaa shɔŋŋ fe nakai. Ehãa eshishi bii lɛ hiɔ shi yɛ jeŋba he mlai ni nɔ kwɔlɔ anaa. Ákɛ nɔkwɛmɔnɔ lɛ, Biblia lɛ kɛɔ akɛ: “Suɔmɔ Nuŋtsɔ [Yehowa], o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” Kitãi lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no, akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mateo 22:37-39) Suɔmɔ ni Maŋtsɛyeli lɛ shishi bii lɛ yɔɔ kɛhã Nyɔŋmɔ kɛ adesai lɛ tsirɛɔ amɛ ni amɛfoɔ mɛi krokomɛi anɔ mli.

•   Tsɔsemɔ. Nyɔŋmɔ Maŋtsɛyeli lɛ hãa eshishi bii lɛ hiɔ shi yɛ jeŋba he mlai ni nɔ kwɔlɔ lɛ anaa, ni etsɔɔ mɛi krokomɛi hu bɔ ni amɛbaafee amɛhi shi yɛ nakai mlai lɛ anaa.—Yesaia 48:17, 18.

•   Oti ni ma ehiɛ. Nyɔŋmɔ Maŋtsɛyeli lɛ kɛ eshishi bii lɛ adeŋmegbomɔ efeee enɔyelɔi lɛ niiatsɛmɛi. Moŋ lɛ, ebaatsu Nyɔŋmɔ yiŋtoo he nii, ni nɔ ni fata yiŋtoo nɛɛ he ji Nyɔŋmɔ shiwoo akɛ ebaahã esuɔlɔi lɛ ahi shi kɛya naanɔ yɛ paradeiso shikpɔŋ lɛ nɔ lɛ.—Yesaia 35:1, 5,  6; Mateo 6:10; Kpojiemɔ 21:1-4.