Hɛɛ. Nyɔŋmɔ susuɔ etsuji ni bɛ hewalɛ lɛ ahe. Biblia lɛ wie yɛ mɔ fɛɛ mɔ ni ji Nyɔŋmɔ tsulɔ anɔkwafo lɛ he akɛ: “Yehowa baakwɛ lɛ yɛ ehela saa nɔ.” (Lala 41:3) Kɛ́ ooye hela ko ni ehiii tsamɔ lɛ, nibii etɛ ni nyiɛ sɛɛ nɛɛ baanyɛ aye abua bo ni eshɛje omii hu:

1.   Sɔlemɔ koni oná nyɛmɔ lɛ kɛkpee naa. Obaanyɛ oná “Nyɔŋmɔ toiŋjɔlɛ ni fe niiashishinumɔi fɛɛ lɛ,” ni no baanyɛ aye abua bo koni okpee hela lɛ naa, ekɔɔɔ he eko bɔ ni enaa wa hã.—Filipibii 4:6, 7.

2.   Ná jwɛŋmɔ ni ja. Biblia lɛ kɛɛ: “Tsui ni yɔɔ miishɛɛ lɛ, ehãa onáa hewalɛ. Shi kɛ́ oyeɔ otsui be fɛɛ be lɛ, egbeɔ bo fiofio.” (Abɛi 17:22, Good News Translation) Hã efee osu akɛ, obaawo mɛi anaa ŋmɔlɔ loo obaafee nibii ni baahã omii ashɛ ohe, ejaakɛ no baahã ojie ojwɛŋmɔ yɛ onaagba lɛ nɔ, ni ebaahã oná gbɔmɔtsoŋ hewalɛ.

3.   Hã hemɔkɛyeli ni oyɔɔ yɛ Yehowa shiwoi lɛ amli lɛ mli awa. Kɛ́ ohemɔkɛyeli lɛ mli wa lɛ, obaanyɛ oná miishɛɛ yɛ hela ni yeɔ bo lɛ fɛɛ sɛɛ. (Romabii 12:12) Biblia lɛ gba fɔ̃ shi akɛ, be ko baaba ni “mɔ ko ekɛŋ akɛ: ‘Mibɛ hewalɛ.’” (Yesaia 33:24) Nakai beiaŋ lɛ, Nyɔŋmɔ baatsa helai fɛɛ ni jeŋ shikpalɔi ni yɔɔ ŋmɛnɛ lɛ nyɛko atsa lɛ. Akɛ nɔkwɛmɔnɔ lɛ, Biblia lɛ kɛɛ akɛ mɛi ni egbɔlɔ lɛ baatsɔmɔ oblahii kɛ oblayei ekoŋŋ ni amɛbaaná hewalɛ, ewie lɛ nɛkɛ: “Eheloo lɛ afee frɔŋ fe gbekɛ nɔ; eku sɛɛ ená eblahiiaŋ hewalɛ lɛ ekoŋŋ.”—Hiob 33:25.

 Kadimɔ: Eyɛ mli akɛ Yehowa Odasefoi heɔ amɛyeɔ akɛ Nyɔŋmɔ yeɔ ebuaa amɛ moŋ, shi kɛ́ hela ko ebatsɔ amɛshihilɛ lɛ fã, no ji ehiii tsamɔ po lɛ, amɛyaa helatsamɔhe kɛhã tsamɔ. (Marko 2:17) Wɔjieee helatsamɔ gbɛ ko yi wɔhãaa mɔ ko, wɔnuɔ he akɛ, esa akɛ mɔ fɛɛ mɔ akpɛ eyiŋ yɛ helatsamɔ gbɛ ni ebaasumɔ ni ekɔ lɛ he.