Akɛni fɔlɔi babaoo ena osharai ni social media baanyɛ ekɛba hewɔ lɛ, amɛŋmɛɛɛ amɛbii lɛ gbɛ koni amɛya nɔ. Kɛ̃lɛ, kɛ́ oŋmɛɔ obi lɛ gbɛ ni eya social media nɔ lɛ, te obaafee tɛŋŋ oye obua lɛ ni ekpoo nibii gbohii ni yɔɔ nɔ lɛ, koni ele bɔ ni ebaafee ekɛ Intanɛt lɛ atsu nii yɛ hiɛshikamɔ mli?

Nɔ ni abaasusu he yɛ sane nɛɛ mli

•  Nibii ni obi lɛ kɛyeɔ klɛŋklɛŋ gbɛhe

•  Bɔ ni obi lɛ nuɔ nii ahe ehãa

•  Bɔ ni obi lɛ feɔ enii ehãa yɛ Intanɛt lɛ nɔ

•  Sanebimɔi kɛhã niiahesusumɔ

 Nɔ ni esa akɛ ole: Akɛni social media kɛnitsumɔ nyɛɔ ekaa mɔ he hewɔ lɛ, ehe baahia ni oye obua obi lɛ koni kɛ́ etee social media nɔ lɛ, ekaye be tsɔ.

 Biblia mli shishitoo mla: “Nyɛkwɛa ni nyɛna nibii ni he hiaa waa lɛ.”​—Filipibii 1:10.

 Kɛhã he susumɔ: Ani obi lɛ kɛ be ni esa akɛ ewɔ, efee homwɛk, ekɛ weku lɛ agba sane, loo ekɛ weku lɛ ashãra lɛ yaa social media nɔ? Niiamlitaolɔi kɛɛ, esa akɛ oblahii kɛ oblayei kɛ aaafee ŋmlɛtswai nɛɛhu awɔ daa gbɛkɛ, shi mɛi ni yeɔ ŋmlɛtswai babaoo yɛ social media nɔ lɛ, náaa wɔ falɛ ni shɛɔ ŋmlɛtswai kpawo po.

 Nɔ ni obaanyɛ ofee: Okɛ obi lɛ asusu nibii ni ekɛyeɔ klɛŋklɛŋ gbɛhe lɛ ahe, ni ohã ena nɔ hewɔ ni esa akɛ egbɔ bei abɔ ni eyeɔ yɛ social media nɔ lɛ nɔ. Wó lɛ mlai ni nilee yɔɔ mli, ni amɛnɔyeli waaa, tamɔ kɛ́ je na lɛ, esaaa akɛ foŋ loo tablɛt hiɔ etsu lɛ mli. Oti ni ma ohiɛ ji, ní oye obua obi lɛ ni ekase henɔyeli; eji su ko ni baaye ebua lɛ kɛ́ etsɔ onukpa.​—1 Korintobii 9:25.

 Nɔ ni esa akɛ ole: Kɛ́ oblayoo loo oblanyo ko yakwɛ enanemɛi mfonirii ni ahã efee fɛo, kɛ mfonirii ni kɔɔ nibii ni amɛfee ni amɛmii shɛ amɛhe lɛ pɛ ahe lɛ, ebaanyɛ ehã enu shoofeemɔ he.

 Biblia mli shishitoo mla: “Nyɛjiea. . . hetsɛ̃ . . . yɛ nyɛhe nyɛshɛrɛa nyɛshwiea.”​—1 Petro 2:1.

 Kɛhã he susumɔ: Ani social media hãa obi lɛ nuɔ he akɛ ehe bɛ fɛo loo etɔ fã yɛ gbɔmɔtso gbɛfaŋ? Ani obi lɛ nuɔ he akɛ mɔ fɛɛ mɔ miiná miishɛɛ, shi lɛ enáaa miishɛɛ?

 Nɔ ni obaanyɛ ofee: Okɛ obi lɛ asusu nii ahe, ni ohã ena nɔ hewɔ ni eyɔɔ oshãra akɛ ekɛ ehe baato mɛi krokomɛi ahe lɛ. Hã ehi ojwɛŋmɔ mli akɛ, yei kɛ amɛjwɛŋmɔ maa amɛ kɛ mɛi ateŋ sharamɔ, kɛ amɛgbɔmɔtsei anɔ waa, shi hii efɔɔɔ nakai feemɔ. Obaanyɛ owo obi lɛ ŋaa po akɛ, yɛ be kɛ beiaŋ lɛ, efo social media nɔ yaa mli fioo. Oblanyo ko ni atsɛɔ lɛ Jacob lɛ wie akɛ: “Midiliti mi-social media app lɛ kɛyashi be ko. Eye ebua mi ni miyɔse nibii ni he hiaa waa yɛ mishihilɛ mli, ni ehã miná jwɛŋmɔ kpakpa yɛ mi kɛ mɛi krokomɛi ahe.”

 Nɔ ni esa akɛ ole: Kɛ́ oyɛ social media nɔ lɛ, etamɔ odamɔ mɛi pii ni ebua amɛhe naa yɛ he ko lɛ ahiɛ. Gbeekpamɔ eyabaŋ, no ji mɛi nuŋ amɛhewɔ shishi, ni bei baanyɛ aba mɛi ateŋ.

 Biblia mli shishitoo mla: “Nyɛjiea mlijoomɔ, kɛ mlila, kɛ mlifu, kɛ bolɔmɔ, kɛ wiemɔ fɔŋ fɛɛ . . . nyɛshɛrɛa nyɛshwiea . . . Nyɛmli ahia ahãa nyɛhe.”​—Efesobii 4:31, 32.

 Kɛhã he susumɔ: Ani social media ehã obi lɛ ebɔi mɛi ahe wiemɔ, ekɛ mɛi ebɔi bemɔ, loo ewieɔ wiemɔi ni esaaa?

 Nɔ ni obaanyɛ ofee: Ye obua obi lɛ ni ele bɔ ni ebaafee eba ejeŋ jogbaŋŋ yɛ Intanɛt lɛ nɔ. Wolo ni ji Digital Kids lɛ kɛɛ: “Akɛ fɔlɔi lɛ, wɔsɔ̃i lɛ eko ji, ni wɔbaatsɔɔ wɔbii lɛ ni amɛle akɛ, esaaa akɛ amɛkɛ mɛi yeɔ yɛ gbɛ gbonyo nɔ yɛ shihilɛ ko kwraa mli, kɛ́ yɛ Intanɛt lɛ nɔ jio, hiɛ kɛ hiɛ jio.”

 Kaimɔ akɛ, social media jeee nɔ ko ni sa akɛ mɔ ko aya nɔ dani enyɛ ehi shi, ni jeee fɔlɔi fɛɛ ŋmɛɔ amɛbii gbɛ akɛ amɛya nɔ. Kɛ́ oŋmɛɔ obi lɛ gbɛ ni eya social media nɔ lɛ, esa akɛ okwɛ kɛji obi lɛ jwɛŋmɔ esa jogbaŋŋ bɔ ni ebaanyɛ ekɛ ebe atsu nii yɛ hiɛshikamɔ mli yɛ nɔ, ebɔ nanemɛi kpakpai, ekwɛŋ mfonirii ni esaaa, ni ekaneŋ saji ni esaaa hu yɛ nɔ lo.