Abɛi 28:1-28
28 Mɛi fɔji lɛ, amɛjoɔ foi be ni mɔ ko enyiɛɛɛ amɛsɛɛ,Shi jalɔi lɛ, amɛfeɔ ekãa tamɔ jata.*+
2 Kɛ́ tɔmɔ* ba shikpɔŋ ko nɔ lɛ, lumɛi babaoo bayeɔ nɔ,+Shi yɛ mɔ ni kɔɔ sane sɛɛ ni eyɔɔ nilee yelikɛbuamɔ naa lɛ, lumɔ sɛɛ tsɛɔ.+
3 Ohiafo ni shishiuɔ* mɛi ni bɛ yelikɛbualɔ lɛ,+Etamɔ nugbɔ ni loɔ niyenii fɛɛ kɛyaa.
4 Mɛi ni yeee mla nɔ lɛ, amɛjieɔ mɔ fɔŋ yi,Shi mɛi ni yeɔ mla nɔ lɛ amli fuɔ amɛ.+
5 Mɛi fɔji nyɛŋ anu jalɛ sane shishi,Shi mɛi ni taoɔ Yehowa sɛɛ gbɛ lɛ baanyɛ anu nɔ fɛɛ nɔ shishi.+
6 Ohiafo ni nyiɛɔ yɛ anɔkwayeli mli lɛ,Ehi fe niiatsɛ ni gbɛi ejaaa.+
7 Bi ni nuɔ nii ashishi lɛ, eyeɔ mla lɛ nɔ,Shi mɔ ni kɛ fufeelɔi bɔɔ lɛ, eshwieɔ epapa hiɛ shi.+
8 Mɔ ni tsɔɔ he kpa+ kɛ sɛɛnamɔ gbonyo nɔ ehãa enii ni eyɔɔ lɛ faa lɛ,Eebua nii anaa eehã mɔ ni naa ohiafoi mɔbɔ lɛ.+
9 Mɔ ni booo mla toi lɛ—Esɔlemɔ po lɛ, nihiinii ni.+
10 Mɔ ni hãa jalɔi duɔ gbɛ kɛyaa gbɛ fɔŋ nɔ lɛ, ebaagbee lɛ diɛŋtsɛ ebu mli,+Shi mɛi ni sane ko bɛ amɛhe lɛ anine baashɛ nɔ kpakpa nɔ.+
11 Yɛ niiatsɛ jwɛŋmɔ mli lɛ, hiɛshikalɔ ji lɛ,+Shi ohiafo ni kɔɔ sane sɛɛ baanyɛ ahã ana bɔ ni niiatsɛ lɛ yɔɔ.+
12 Kɛ́ jalɔi ye kunim lɛ, anunyam babaoo baa,Shi kɛ́ mɛi fɔji baye nɔ lɛ, mɛi yateɔ amɛhe.+
13 Mɔ ni tsimɔɔ etɔmɔi anɔ lɛ, eyeŋ omanye,+Shi mɔ ni jajeɔ ni etsiɔ ehe kɛjeɔ he lɛ, abaana lɛ mɔbɔ.+
14 Mɔ ni hãa ehiɛ hiɔ ehe nɔ be fɛɛ be lɛ,* eyɛ miishɛɛShi mɔ ni kpiliŋɔ etsui lɛ, egbeɔ amane mli.+
15 Bɔ ni jata ni miihũu kɛ oshishibrishi ni hiɛ efee kramakrama ji lɛ,Nakai nɔyelɔ fɔŋ ni miiye mɛi ni nii yɔɔ mɔbɔ lɛ anɔ lɛ ji.+
16 Hiɛnyiɛlɔ ni kɔɔɔ sane sɛɛ lɛ, ekɛ hegbɛ ni eyɔɔ lɛ tsuɔ nii yɛ gbɛ gbonyo nɔ,+Shi mɔ ni nyɛɔ sɛɛnamɔ gbonyo lɛ, ewala sɛɛ tsɛɔ.+
17 Gbɔmɔ ni eye lá yi sɔ yɛ mɔ ko ni egbe hewɔ lɛ* baaya nɔ ejo foi aahu kɛyashi ebaabote gbonyobu lɛ mli.*+
Mɔ ko mɔ ko akaye ebua lɛ.
18 Abaahere mɔ ni nyiɛ ni sane ko bɛ ehe lɛ yiwala,+Shi mɔ ni gbɛi ekɔ̃dɔ̃ lɛ baagbee shi oya.+
19 Mɔ ni huɔ eshikpɔŋ lɛ baaná niyenii* babaoo,Shi mɔ ni tiuɔ nibii ni sɛɛnamɔ bɛ he lɛ asɛɛ lɛ baaye ohia.+
20 Nuu anɔkwafo baaná jɔɔmɔi babaoo,+Shi mɔ ni yeɔ ehe oyai koni ená nii lɛ he baaba sane.+
21 Ehiii akɛ abaakwɛ hiɛiaŋ;+Shi gbɔmɔ baafee efɔŋ yɛ niyenii* fioo hewɔ.
22 Nuu ni hiɛ kɔ̃ɔ nii anɔ lɛ,* eyeɔ ehe oyai ni ená nii,Shi eleee akɛ eeba ebaye ohia.*
23 Mɔ ni jajeɔ gbɔmɔ lɛ,+ sɛɛ mli lɛ, ehiɛ baaba nyam+Fe mɔ ni kɛ elilɛi woɔ mɛi ayiteŋ mulu.
24 Mɔ fɛɛ mɔ ni tswaa epapa kɛ emami ojo ni ekɛɔ akɛ, “Ejeee tɔmɔ” lɛ,+
Enaanyo ji mɔ ni kpãtãa nii ahiɛ.+
25 Amimyelɔ* kɛ mligbalamɔ baa,Shi mɔ fɛɛ mɔ ni kɛ ehiɛ fɔ̃ɔ Yehowa nɔ lɛ, ebaahi ehã lɛ.*+
26 Mɔ fɛɛ mɔ ni kɛ ehiɛ fɔ̃ɔ lɛ diɛŋtsɛ etsui nɔ lɛ, kwashia ni,+Shi mɔ ni nyiɛɔ yɛ hiɛshikamɔ mli lɛ, ebaaje amane mli.+
27 Mɔ fɛɛ mɔ ni hãa ohiafoi nii lɛ, nɔ ko nɔ ko he ehiaŋ lɛ,+Shi mɔ ni ŋaa ehiŋmɛii ewoɔ amɛ lɛ, ebaaná loomɔi babaoo.
28 Kɛ́ mɛi fɔji baye nɔ lɛ, mɛi yateɔ amɛhe,Shi kɛ́ amɛhiɛ kpãtã lɛ, jalɔi ayi faa.+
Shishigbɛ Niŋmaa
^ Loo “jata oblanyo.”
^ Loo “atuatsemɔ.”
^ Loo “lakaa.”
^ Loo “Mɔ ni sheɔ ehe gbeyei lɛ.”
^ Loo “Gbɔmɔ ni tere susuma ko lá lɛ.”
^ Loo “bu lɛ mli.”
^ Hebri sht. ŋm., “blodo.”
^ Hebri sht. ŋm., “blodo.”
^ Loo “Nuu amimyelɔ lɛ.”
^ Loo “akɛ ohia miiba ebanina lɛ.”
^ Shishitsɔɔmɔi komɛi kɛɔ akɛ, “Susuma ni wóɔ ehe nɔ.”
^ Hebri sht. ŋm., “ebaashwi.”
