Hosea 13:1-16
13 “Kɛ́ Efraim wie lɛ, mɔ he kpokpoɔ;Kulɛ gbɔmɔ wulu ji lɛ yɛ Israel.+
Shi eye fɔ yɛ Baal+ hewɔ, ni egbo.
2 Agbɛnɛ lɛ, amɛmiifee esha kɛmiifata he,Ni amɛkɛ amɛjwiɛtɛi lɛ feɔ dade amagai;+Amɛkɛ ŋaalee feɔ amagai, fɛɛ lɛ, ŋaalɔi aninenaa nitsumɔ ni.
Amɛkɛɔ amɛ akɛ, ‘Mɛi ni shãa afɔle lɛ ashɔ tsinabii lɛ anaa.’+
3 No hewɔ lɛ, amɛbaatsɔmɔ tamɔ leebi atatui,Tamɔ bɔ́ ni kpalaa mra,Tamɔ ŋmaa* he totoi* ni ahum etswa lɛ kɛjɛ ŋmaagbeemɔhe,Tamɔ lasu hu ni tsɔɔ tsuyiteŋ fɔlɔ mli kɛyaa.
4 Shi miji Yehowa, o-Nyɔŋmɔ lɛ, kɛjɛ Ejipt shikpɔŋ lɛ nɔ beebe;+Oleee Nyɔŋmɔ ko Nyɔŋmɔ ko, ja mi,Ni kɛjɛ misɛɛ lɛ, yiwalaherelɔ ko bɛ.+
5 Mile bo yɛ ŋa lɛ nɔ,+ yɛ shikpɔŋ ni nɔ egbi lɛ nɔ.*
6 Amɛshikpɔji ni kooloi yeɔ nii yɛ nɔ lɛ hã amɛtɔrɔ,+Amɛtɔrɔ, ni amɛtsui wó ehe nɔ.
Ni no hewɔ lɛ, amɛhiɛ kpa minɔ.+
7 Matsɔ tamɔ jata* mawo amɛ,+Tamɔ kootsɛ ni etee ehe yɛ gbɛ toi.
8 Matutua amɛ tamɔ oshishibrishi ni bii elaaje,Ni magbá amɛtsitsi mli.*
Maye amɛ yɛ jɛmɛ tamɔ jata;Ŋa mli kooloo awuiyelɔ ko baatserɛ amɛmli dukuduku.
9 Israel, ebaakpãtã ohiɛ,Ejaakɛ ote shi owo mi, ote shi owo oyelikɛbualɔ lɛ.
10 Agbɛnɛ, nɛgbɛ omaŋtsɛ lɛ yɔɔ, koni ehere bo yɛ omaji lɛ fɛɛ amli,+Kɛ onɔyelɔi* lɛ, mɛi ni owie yɛ amɛhe akɛ,‘Hã mi maŋtsɛ kɛ lumɛi lɛ’?+
11 Mihã bo maŋtsɛ yɛ mimlifu lɛ mli,+Ni maŋɔ lɛ kɛya yɛ mimlila lɛ mli.+
12 Afĩ Efraim tɔmɔ lɛ;*Akɛ ehe esha lɛ eto.
13 Fɔmɔ mli kɔ̃ɔmɔi baaba enɔ.
Shi bi ni hiɛ kãaa shi ji lɛ;Kɛ́ shɛ be ni abaafɔ lɛ lɛ, ebaaa.
14 Makpɔ̃ amɛ kɛaaje Gbonyobu* lɛ hewalɛ lɛ dɛŋ;Makpɔ̃ amɛ kɛaajɛ gbele mli.+
Gbele, nɛgbɛ nibii ni okɛtsɛ̃rɛ̃ɔ mɔ lɛ yɔɔ?+
Gbonyobu, nɛgbɛ nɔ ni okɛkpãtãa nii ahiɛ lɛ yɔɔ?+
Mimusuŋ etsɔŋ mi.
15 Kɛji eshwere yɛ gãlãi lɛ ateŋ po lɛ,Bokã kɔɔyɔɔ baaba, Yehowa kɔɔyɔɔ lɛ,Ebaajɛ ŋa lɛ nɔ eba ní ebahã enubu lɛ mli agbi, ní ehã enuhiŋmɛi lɛ mli nu aŋa.
Nakai mɔ lɛ baaloo ojarawa nibii fɛɛ ni eyɔɔ yɛ jwetritoohe lɛ.+
16 Samaria baaye fɔ,+ ejaakɛ etse e-Nyɔŋmɔ lɛ hiɛ atua.+
Amɛbaanyɔnyɔi yɛ klante naa,+Akɛ amɛbii lɛ baatswiatswia shi ni amɛbaakumɔ dukuduku,Ni abaagbála amɛyeihɔlɔi lɛ amli.”
Shishigbɛ Niŋmaa
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “Tamɔ tutuu.”
^ Loo “yɛ shikpɔŋ ni nugbɔ enɛɛɛ yɛ nɔ be kplaŋŋ lɛ nɔ.”
^ Loo “jata oblanyo.”
^ Hebri sht. ŋm., “magbá nɔ ni amɛtsui hɔ mli lɛ mli.”
^ Hebri sht. ŋm., “okojolɔi.”
^ Loo “Abaa Efraim tɔmɔ lɛ yi.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
