Yesaia 21:1-17
21 Sane ni awie ashi ŋshɔnaa ŋa* lɛ nɛ:+
Eeba tamɔ kɔɔyɔɔ ni naa wa ni miitswa kɛmiijɛ wuoyigbɛ,Kɛjɛ ŋa lɛ nɔ, kɛjɛ jeŋmaŋ* ko ni he yɔɔ gbeyei lɛ nɔ.+
2 Ajie ninaa ko ni yɔɔ gbeyei kpo atsɔɔ mi:
Mɔ ni yeee anɔkwa lɛ miimale,Ni hiɛkpatalɔ lɛ miikpãtã nii ahiɛ.
Bo Elam, kwɔɔ kɛya, Bo Media,+ wo ka!
Mahã kɛ̃ɛmɔ ni yoo* lɛ ehã mɛi kɛ̃mɔɔ lɛ fɛɛ sɛɛ afo.+
3 No hewɔ ni miipiŋ waa* lɛ.+
Miipiŋ waa,Tamɔ yoo ni fɔmɔ eta ehe ni miikɔmɔ.
Mihao aahu akɛ, minuuu nii;Mifee basaa aahu akɛ, minaaa nɔ ko.
4 Mitsui miitswa kplakpla; gbeyei emɔ mi.
Gbɛkɛnaashi ni mishweɔ lɛ ehã miikpokpo.
5 Nyɛŋmɛa okpɔlɔ lɛ, ni nyɛtoa sɛii lɛ!
Nyɛyea ni nyɛnua!+
Nyɛ lumɛi, nyɛtea shi, nyɛfɔa tsɛŋ* lɛ mu!
6 Ejaakɛ nɔ ni Yehowa kɛɛ mi nɛ:
“Yaa ni oyahã mɔ ko abu, ni ohã ejaje nɔ ni ebaana.”
7 Ni ena ta shwiili kɛ ehe okpɔŋɔi,Ta shwiili kɛ ehe tejii,Ta shwiili kɛ ehe afukpɔŋɔi.
Egbɛ ehiŋmɛiiaŋ waa, ekwɛ lɛ jogbaŋŋ.
8 Kɛkɛ ni ebo tamɔ jata ekɛɛ:
“Ao Yehowa, midamɔɔ buu mɔɔ lɛ nɔ daa jetsɛremɔ,Ni midamɔɔ mibuuhe lɛ daa jenamɔ.+
9 Kwɛmɔ nɔ ni baa:
Hii tara ta shwiili mli kɛ ehe okpɔŋɔi!”+
Kɛkɛ ni ebo ekɛɛ akɛ:
“Yoo lɛ egbee shi! Babilon egbee shi!+
Etsirɛ yoo lɛ nyɔŋmɔi lɛ ahe amagai lɛ fɛɛ etswia shi ni amɛkumɔ!”+
10 Ao mimaŋ ni anaanaa amɛnɔ,Miŋmaagbeemɔhe lɛ mli yibii,*+Mikɛɛ nyɛ nɔ ni minu kɛjɛ Yehowa, taiatsɛ lɛ, Israel Nyɔŋmɔ lɛ ŋɔɔ.
11 Sane ni awie ashi Duma* lɛ nɛ:
Mɔ ko miibo miitsɛ mi kɛmiijɛ Seir akɛ:+
“Bulɔ, te nyɔɔŋ lɛ mli yɔɔ tɛŋŋ?*
Bulɔ, te nyɔɔŋ lɛ mli yɔɔ tɛŋŋ?”*
12 Bulɔ lɛ kɛɛ akɛ:
“Je miitsɛre, ni je baana hu.
Kɛ́ nyɛbaabi lɛ, nyɛbia.
Nyɛkua nyɛsɛɛ nyɛbaa ekoŋŋ!”
13 Sane ni awie ashi ŋa kpataa lɛ nɛ:
Ao Dedan+ gbɛfalɔi akuu,Nyɛbaaye jenamɔ lɛ yɛ koo lɛ mli yɛ ŋa kpataa lɛ nɔ.
14 Nyɛ mɛi ni nyɛyɔɔ Tema+ shikpɔŋ lɛ nɔ,Nyɛkɛ nu ayakpea mɔ ni kumai yeɔ lɛ lɛ,Ni nyɛkɛ blodo hu ayakpea mɔ ni miijo foi lɛ.
15 Ejaakɛ amɛjo foi kɛje klantei anaa, kɛje klante ni agbala naa,Kɛje gãi ni adɔ mli lɛ naa, kɛje ta ni kpãtãa nii ahiɛ lɛ naa.
16 Ejaakɛ nɔ ni Yehowa kɛɛ mi nɛ: “Biɛ afi pɛpɛɛpɛ, tamɔ bɔ ni apaafonyo buɔ efii lɛ,* Kedar+ anunyam lɛ fɛɛ sɛɛ baafo.
17 Kedar asraafoi lɛ ateŋ gãitsɛlɔi ni baashwɛ lɛ ayi faŋ, ejaakɛ Yehowa, Israel Nyɔŋmɔ lɛ ewie.”
Shishigbɛ Niŋmaa
^ Eeenyɛ efee akɛ, aawie blema Babilonia kpokpaa lɛ he.
^ Loo “shikpɔŋ.”
^ Ni ji, Babilon.
^ Loo “mihɛ mli eyi obɔ kɛ piŋmɔ.”
^ Ni ji, tsɛŋ ni akɛyaa ta.
^ Hebri sht. ŋm., “Miŋmaagbeemɔhe lɛ binuu.”
^ Eshishi ji, “Diŋŋ.”
^ Loo “Bulɔ, nyɔɔŋ mɛɛ be nɛ?”
^ Loo “Bulɔ, nyɔɔŋ mɛɛ be nɛ?”
^ Loo “tamɔ apaafonyo afii lɛ.”
