NIKASEMƆ 18
Wo Mɛi Hewalɛ Kɛ́ Otee Asafoŋ Kpeei
“Nyɛhãa wɔteŋ mɔ fɛɛ mɔ asusua enyɛmi he . . . , wɔteŋ mɔ fɛɛ mɔ awo enyɛmi hewalɛ.”—HEB. 10:24, 25.
LALA 88 Hã Male Ogbɛi Lɛ
NƆ NI ABAASUSU HE a
1. Mɛni hewɔ wɔhãa saji ahetoo yɛ asafoŋ kpeei ashishi?
MƐNI hewɔ wɔyaa asafoŋ kpeei? Yiŋtoo titri hewɔ ni wɔyaa ji, ni wɔyajie Yehowa yi. (Lala 26:12; 111:1) Yiŋtoo kroko hu ji, koni wɔwowoo wɔhe hewalɛ yɛ be ni mli wa nɛɛ mli. (1 Tes. 5:11) Wɔfeɔ nibii enyɔ nɛɛ fɛɛ kɛji wɔhole wɔniji anɔ ni wɔhã saji ahetoo yɛ asafoŋ kpeei ashishi.
2. Kɛ́ wɔtee asafoŋ kpeei lɛ, mɛɛ hegbɛi wɔnáa ni wɔbaanyɛ wɔkɛhã saji ahetoo?
2 Otsi fɛɛ otsi lɛ, wɔnáa hegbɛ akɛ wɔbaahã saji ahetoo yɛ wɔsafoŋ kpeei lɛ ashishi. Akɛ nɔkwɛmɔnɔ lɛ, kɛ́ wɔtee asafoŋ kpee yɛ otsi lɛ naagbee lɛ, wɔnáa hegbɛ akɛ wɔbaahã saji ahetoo yɛ Buu-Mɔɔ Nikasemɔ lɛ shishi. Ni yɛ otsi teŋ kpee lɛ shishi hu lɛ, wɔnyɛɔ wɔhãa saji ahetoo kɛ́ aafee Pɛimɔ Ŋmalɛi Lɛ Amli Jogbaŋŋ, Asafoŋ Biblia Nikasemɔ, kɛ fai krokomɛi ni abiɔ toibolɔi lɛ saji lɛ.
3. Bei komɛi lɛ, mɛɛ nibii hãa ewaa kɛhãa wɔ akɛ wɔbaahã saji ahetoo? Ni mɛɛ gbɛ nɔ Hebribii 10:24, 25 lɛ baanyɛ aye abua wɔ?
3 Wɔ fɛɛ wɔmiisumɔ ni wɔjie Yehowa yi ni wɔwo wɔnyɛmimɛi lɛ hewalɛ. Shi nibii komɛi yɛ ni baanyɛ ahã ewa kɛhã wɔ akɛ wɔbaahã saji ahetoo. Wɔteŋ mɛi komɛi sheɔ gbeyei akɛ wɔbaahã saji ahetoo, ni wɔteŋ mɛi komɛi hu sumɔɔ waa ni wɔhã saji ahetoo, shi bei pii kɛ́ wɔwó wɔnine nɔ lɛ, atsɛɛɛ wɔ. Mɛni wɔbaanyɛ wɔfee yɛ naagbai nɛɛ ahe? Nɔ ko ni bɔfo Paulo wie yɛ Hebribii awolo lɛ mli lɛ baanyɛ aye abua wɔ ni wɔna nɔ ni wɔbaanyɛ wɔfee. Be ni ewieɔ nɔ hewɔ ni ehe miihia ni wɔkpe kutuu lɛ he lɛ, ewie akɛ esa akɛ “wɔteŋ mɔ fɛɛ mɔ awo enyɛmi hewalɛ.” (Kanemɔ Hebribii 10:24, 25.) Kɛ́ wɔhã ehi wɔjwɛŋmɔ mli akɛ sane hetoo ni wɔbaahã lɛ baanyɛ awo mɔ ko hewalɛ lɛ, ehãŋ wɔshe gbeyei akɛ wɔbaahã saji ahetoo kɛ́ nɔ ko kuku po wɔbaawie. Ni kɛ́ wɔwó wɔnine nɔ shi atsɛɛɛ wɔ hu lɛ, wɔbaanyɛ wɔná miishɛɛ akɛ wɔnyɛmimɛi krokomɛi lɛ ená hegbɛ ni amɛkɛbaahã saji ahetoo.—1 Pet. 3:8.
4. Mɛɛ nibii etɛ ahe wɔbaasusu yɛ nikasemɔ nɛɛ mli?
4 Yɛ nikasemɔ nɛɛ mli lɛ, klɛŋklɛŋ lɛ, wɔbaakwɛ bɔ ni wɔbaafee wɔwo mɛi hewalɛ kɛ́ wɔyɛ asafo ni mɛi ayi faaa yɛ mli lɛ mli. Yɛ asafoi ni tamɔ nɛkɛ amli lɛ, bei pii lɛ, anáaa mɛi pii ahã saji ahetoo. No sɛɛ lɛ, wɔbaakwɛ bɔ ni wɔbaafee wɔwo mɛi hewalɛ kɛ́ wɔyɛ asafo ni mɛi ayi fa yɛ mli lɛ mli. Yɛ asafoi ni tamɔ nɛkɛ amli lɛ, bei pii lɛ, mɛi pii wóɔ amɛnine nɔ koni amɛhã saji ahetoo. Naagbee lɛ, wɔbaasusu bɔ ni wɔbaafee wɔhã saji ahetoo ni woɔ mɔ hewalɛ waa lɛ he.
KƐ́ OYƐ ASAFO NI MƐI AYI FAAA YƐ MLI LƐ MLI
5. Kɛ́ oyɛ asafo ni mɛi ayi faaa yɛ mli lɛ mli lɛ, mɛni obaanyɛ ofee kɛwo mɛi hewalɛ?
5 Bei pii lɛ, yɛ kui loo asafoi ni mɛi ayi faaa yɛ mli lɛ amli lɛ, anáaa mɛi pii ahã saji ahetoo. Enɛ hewɔ lɛ, bei komɛi lɛ, mɔ ni kwɛɔ nikasemɔ lɛ nɔ lɛ baamɛ aahu dani ebaaná mɔ ko awó enine nɔ ni ehã sane hetoo. Kɛ́ nɔ ko ni tamɔ nɛkɛ ba lɛ, enyɛɔ ehãa asafoŋ kpee lɛ sɛɛ tsɛɔ, ni enɛ wooo mɔ hewalɛ kwraa. Mɛni obaanyɛ ofee kɛwo mɛi hewalɛ? Fɔɔ onine nɔ womɔ. Kɛ́ ofee nakai lɛ, ebaanyɛ ewo mɛi krokomɛi hewalɛ ni amɛ hu amɛfɔ amɛnine nɔ womɔ.
6-7. Mɛni kɛ́ wɔfee lɛ, ehãŋ wɔshe gbeyei tsɔ akɛ wɔbaahã sane hetoo?
6 Shi kɛ́ osheɔ gbeyei akɛ obaahã saji ahetoo hu? Kɛ́ nakai onuɔ he lɛ, belɛ jeee okome. Nyɛmimɛi pii hu nuɔ he nakai. Shi naa nibii komɛi ni obaanyɛ ofee ni baaye abua bo ni okashe gbeyei ni onyɛ ohã saji ahetoo kɛwo onyɛmimɛi lɛ hewalɛ.
7 Obaanyɛ okwɛ ŋaawoi ni akɛhã yɛ Buu-Mɔɔ ni akase be ko ni eho lɛ ekomɛi amli ni kɔɔ bɔ ni ahãa saji ahetoo ahãa lɛ he. b Ŋaawoi nɛɛ eko ji, ni obaasaa ohe jogbaŋŋ. (Abɛi 21:5) Kɛ́ okase nii lɛ jogbaŋŋ lɛ, osheŋ gbeyei akɛ obaawó onine nɔ ni ohã saji ahetoo. Agbɛnɛ hu, kaawie pii. (Abɛi 15:23; 17:27) Kɛ́ nɔ ni owieɔ lɛ faaa lɛ, gbeyei mɔŋ bo tsɔ. Bei pii lɛ, kɛ́ wɔwieee pii lɛ, ewaaa kɛhãaa nyɛmimɛi lɛ akɛ amɛbaanu nɔ ni wɔwieɔ lɛ shishi. Shi kɛ́ wɔwie kakadaŋŋ ni wɔwie otii babaoo ahe lɛ, bei pii lɛ, amɛnaaa nɔ ni wɔtaoɔ wɔtsɔɔ lɛ po. Kɛ́ oohã sane hetoo ni owieee pii, ni okaneee kɛjɛɛɛ wolo lɛ mli tɛ̃ɛ lɛ, ehãa anaa akɛ osaa ohe jogbaŋŋ ni onuɔ sane ni asusuɔ he lɛ shishi jogbaŋŋ hu.
8. Te Yehowa naa mɔdɛŋ ni wɔbɔɔ koni wɔnyɛ wɔhã sane hetoo lɛ ehãa tɛŋŋ?
8 Kɛ́ okɛ ŋaawoi nɛɛ ekomɛi etsu nii shi fɛɛ sɛɛ lɛ osheɔ gbeyei akɛ obaahã saji ahetoo fe shi kome hu? Ná nɔmimaa akɛ, Yehowa hiɛ sɔɔ mɔdɛŋ ni obɔɔ koni ohã saji ahetoo lɛ. (Luka 21:1-4) Ekpaaa babaoo gbɛ fe nine yɛ wɔdɛŋ. (Fip. 4:5) No hewɔ lɛ, okɛ oti ko ni obaanyɛ oshɛ he lɛ ama ohiɛ ni osɔle ni Yehowa aye abua bo koni kɛ́ oohã saji ahetoo lɛ okashe gbeyei. Ekolɛ shishijee lɛ, obaanyɛ okɛfee oti ni ma ohiɛ akɛ obaahã sane hetoo kome ni obaahã ohetoo lɛ afee kuku.
KƐ́ OYƐ ASAFO NI MƐI AYI FA YƐ MLI LƐ MLI
9. Mɛɛ naagba mɛi ni yɔɔ asafo ni mɛi ayi fa yɛ mli lɛ baanyɛ amɛkɛkpe?
9 Kɛ́ mɛi ni yɔɔ nyɛsafo lɛ mli lɛ ayi fa lɛ, ekolɛ esoro naagba ni okɛbaakpe lɛ. Ekolɛ nyɛmimɛi lɛ babaoo fɔɔ amɛnine nɔ womɔ, no hewɔ lɛ, bei pii kɛ́ owó onine nɔ lɛ, atsɛɛɛ bo. Akɛ nɔkwɛmɔnɔ lɛ, nyɛmi yoo ko ni atsɛɔ lɛ Danielle lɛ hãa saji ahetoo waa kɛ́ etee asafoŋ kpeei. c Enaa saji ahetoohamɔ akɛ efata ejamɔ lɛ he, eji gbɛ ni etsɔɔ nɔ ewoɔ nyɛmimɛi krokomɛi hewalɛ, ni ehãa hemɔkɛyeli ni eyɔɔ yɛ Biblia mli anɔkwalei lɛ amli lɛ mli waa. Shi be ni eyaje asafo ko ni mli bii lɛ ayi fa lɛ mli lɛ, kɛ́ ewó enine nɔ lɛ afɔɔɔ lɛ tsɛmɔ tamɔ bɔ ni kulɛ enáa lɛ lɛ. Ni bei komɛi po lɛ, enáaa hegbɛ ehã sane hetoo shi kome po yɛ asafoŋ kpee muu lɛ fɛɛ shishi. Ewie akɛ: “Minijiaŋ je wui waa. Minu he tamɔ nɔ ni hegbɛ wulu ko eŋmɛɛ mi. Kɛ́ enɛ tee nɔ shii abɔ lɛ, ekolɛ obaanu he akɛ aje gbɛ ni atsɛɛɛ bo lɛ.”
10. Mɛni kɛ́ wɔfee lɛ, ebaanyɛ ehã wɔná hegbɛi pii wɔhã saji ahetoo?
10 Ani okɛ shihilɛ ni Danielle kɛkpe lɛ eko ekpe pɛŋ? Kɛ́ nakai lɛ, ekolɛ obaanu he akɛ okawó onine nɔ dɔŋŋ, moŋ lɛ, obo kpee lɛ toi kɛkɛ. Shi kaafee nakai. Mɛni obaanyɛ ofee mɔ? Yɛ asafoŋ kpeei lɛ eko fɛɛ eko mli lɛ, saamɔ ohe akɛ obaahã saji ahetoo yɛ hei srɔtoi yɛ nikasemɔ lɛ mli. Kɛ́ ofee nakai lɛ, kɛ́ atsɛɛɛ bo yɛ shishijeegbɛ lɛ, abaanyɛ atsɛ bo yɛ hei krokomɛi be ni kpee lɛ yaa nɔ lɛ. Kɛ́ oosaa ohe kɛmiihã Buu-Mɔɔ Nikasemɔ lɛ, susumɔ bɔ ni kuku fɛɛ kuku kɔɔ saneyitso lɛ he ehãa lɛ he. Kɛ́ ofee nakai lɛ, obaaná otii ni sa ni obaanyɛ owie he be ni nikasemɔ lɛ yaa nɔ lɛ. Kɛfata he lɛ, obaanyɛ osaa ohe ni ohã hetoo kɛ́ ashɛ kukuji ni wieɔ Biblia mli anɔkwalei ni mligbalamɔ wa lɛ anɔ. (1 Kor. 2:10) Mɛni hewɔ? Ejaakɛ ekolɛ mɛi fioo pɛ ni baawó amɛnine nɔ kɛ́ ashɛ hei ni tamɔ nakai. Mɛni esa akɛ ofee kɛ́ okɛ ŋaawoi nɛɛ tsu nii shi fɛɛ sɛɛ lɛ kɛ́ otee asafoŋ kpeei ni owó onine nɔ lɛ atsɛɛɛ bo? Dani abaaje asafoŋ kpee shishi lɛ, obaanyɛ oyana mɔ ni kwɛɔ nikasemɔ lɛ nɔ lɛ ni otsɔɔ lɛ he ni kɛ́ ashɛ lɛ obaasumɔ ni ohã hetoo.
11. Mɛni Filipibii 2:4 lɛ woɔ wɔ hewalɛ ni wɔfee?
11 Kanemɔ Filipibii 2:4. Akɛ mumɔ tsirɛ bɔfo Paulo ni ewo Kristofoi lɛ hewalɛ akɛ amɛtao nibii ni hi hã mɛi krokomɛi shi jeee nibii ni hi hã amɛ pɛ. Mɛɛ gbɛ nɔ wɔbaanyɛ wɔkɛ ŋaawoo nɛɛ atsu nii kɛ́ wɔtee asafoŋ kpeei? Esa akɛ wɔkai akɛ, bɔ ni wɔmiitao wɔhã saji ahetoo lɛ, nakai nɔŋŋ wɔnyɛmimɛi krokomɛi lɛ hu miitao ni amɛhã saji ahetoo.
Bɔ ni kɛ́ wɔkɛ mɛi miigba sane lɛ wɔŋmɛɔ gbɛ ni amɛ hu amɛwieɔ lɛ, nakai nɔŋŋ esa akɛ wɔŋmɛ gbɛ ni wɔnyɛmimɛi lɛ ahã saji ahetoo yɛ asafoŋ kpeei ashishi (Kwɛmɔ kuku 12)
12. Kɛ́ wɔtee asafoŋ kpeei lɛ, mɛni ji gbɛ kome ni hi waa ni wɔbaanyɛ wɔtsɔ wɔwo mɛi krokomɛi hewalɛ? (Kwɛmɔ mfoniri lɛ hu.)
12 Akɛ nɔkwɛmɔnɔ lɛ, kɛ́ okɛ mɛi miigba sane lɛ, ani bo sɔŋŋ owieɔ ni ohãaa amɛwie eko? Dabi, ohãa amɛ hu amɛwieɔ eko. Nakai nɔŋŋ kɛ́ wɔtee asafoŋ kpeei lɛ, wɔsumɔŋ ni wɔ sɔŋŋ wɔwie. Anɔkwa, kɛ́ wɔŋmɛ mɛi krokomɛi gbɛ ni amɛjie amɛhemɔkɛyeli kpo lɛ, eji gbɛ kome ni hi waa ni wɔtsɔɔ nɔ wɔwoɔ amɛ hewalɛ. (1 Kor. 10:24) Shi te wɔbaafee enɛ wɔhã tɛŋŋ? Nyɛhãa wɔkwɛa.
13. Mɛni kɛ́ wɔfee lɛ ebaahã mɛi krokomɛi hu aná hegbɛ amɛhã sane hetoo yɛ asafoŋ kpeei ashishi?
13 Nɔ kome ni wɔbaanyɛ wɔfee ji, kɛ́ wɔmiihã saji ahetoo lɛ, wɔbaahã wɔwiemɔ lɛ afee kuku koni mɛi krokomɛi hu aná hegbɛ amɛwie. Esa akɛ asafoŋ onukpai kɛ mɛi ni etee amɛhiɛ yɛ Yehowa sɔɔmɔ lɛ mli lɛ, afee nɔkwɛmɔnɔ kpakpa yɛ enɛ gbɛfaŋ. Agbɛnɛ hu, kɛ́ abi sane ko, ni hetoo ni yɔɔ mli lɛ fa fe ekome lɛ, kaawie fɛɛ kɛ́ osane hetoo lɛ yɛ kuku po. Kɛ́ owie fɛɛ lɛ, mɔ ko náŋ eko ewie. Akɛ nɔkwɛmɔnɔ lɛ, otii enyɔ ni baafee sane ni abaabi yɛ kuku nɛɛ he lɛ hetoo. Ekome ji, ni wɔhã wɔsane hetoo lɛ afee kuku, ni nɔ ni ji enyɔ lɛ ji, kɛ́ hetoo lɛ fa fe ekome lɛ wɔkawie fɛɛ. Kɛ́ bo ji klɛŋklɛŋ mɔ ni atsɛ lɛ, ebaafee nɔ ni hi akɛ obaawie amɛteŋ ekome pɛ he.
Mɛɛ be ekolɛ ehe ebahiaŋ ni wɔwó wɔnine nɔ wɔhã sane hetoo? (Kwɛmɔ kuku 14) f
14. Mɛni baanyɛ aye abua wɔ ni wɔna shii abɔ ni esa akɛ wɔwó wɔnine nɔ? (Kwɛmɔ mfoniri lɛ hu.)
14 Kɛ́ okɛ ohiɛ fɔ̃ shi lɛ, obaana shii abɔ ni esa akɛ owó onine nɔ. Kɛ́ owó onine nɔ pii lɛ, ekolɛ ebaahã mɔ ni kwɛɔ nɔ lɛ anu he akɛ etsɛ bo shii abɔ be mli ni ekolɛ etsɛko nyɛmimɛi komɛi shi kome po. Enɛ baanyɛ aje nyɛmimɛi lɛ anijiaŋ wui ni amɛholeŋ amɛniji anɔ dɔŋŋ.—Jaj. 3:7.
15. (a) Kɛ́ wɔwó wɔnine nɔ shi atsɛɛɛ wɔ lɛ, te esa akɛ wɔfee wɔnii wɔhã tɛŋŋ? (b) Mɛni mɔ ni kwɛɔ nɔ lɛ baanyɛ afee koni mɔ fɛɛ mɔ aná hegbɛ ehã sane hetoo? (Kwɛmɔ akrabatsa ni ji, “ Kɛ́ Bo Okwɛɔ Nikasemɔ Lɛ Nɔ.”)
15 Kɛ́ nyɛmimɛi babaoo hole amɛniji anɔ yɛ nikasemɔ lɛ mli lɛ, ekolɛ atsɛŋ bo pii tamɔ bɔ ni oshweɔ lɛ. Bei komɛi po lɛ, ekolɛ mɔ ni kwɛɔ nɔ lɛ tsɛŋ bo shi kome po. Kɛ́ eba lɛ nakai lɛ, eyɛ dɔlɛ waa. Shi kaahã omli fu lɛ akɛ etsɛɛɛ bo.—Jaj. 7:9.
16. Mɛɛ gbɛ nɔ wɔbaanyɛ wɔwo mɛi ni hãa sane hetoo lɛ hewalɛ?
16 Kɛ́ atsɛɛɛ bo pii ni ohã sane hetoo tamɔ bɔ ni oshweɔ lɛ, mɛni obaanyɛ ofee? Kɛ́ nyɛmimɛi krokomɛi miihã sane hetoo lɛ, bo toi jogbaŋŋ koni kɛ́ akpa lɛ onyɛ ojie amɛ yi. Kɛ́ ojie amɛ yi lɛ, ebaawo amɛ hewalɛ waa tamɔ bɔ ni kulɛ osane hetoo lɛ hu baawo amɛ hewalɛ lɛ. (Abɛi 10:21) Enɛ ji gbɛ kroko ni wɔbaanyɛ wɔtsɔ nɔ wɔwo wɔnyɛmimɛi lɛ hewalɛ.
GBƐI KROKOMƐI NI OBAANYƐ OTSƆ NƆ OWO MƐI HEWALƐ
17. (a) Mɛɛ gbɛ nɔ fɔlɔi baanyɛ aye abua amɛbii lɛ ni amɛsaa amɛhe ni amɛnyɛ amɛhã sane hetoo yɛ afii abɔ ni amɛye lɛ naa? (b) Yɛ vidio lɛ mli lɛ, mɛni ji gbɛi ejwɛ ni abaanyɛ atsɔ nɔ asaa he koni anyɛ ahã sane hetoo? (Kwɛmɔ shishigbɛ niŋmaa lɛ hu.)
17 Kɛ́ otee asafoŋ kpeei lɛ, mɛni ji gbɛ kroko ni obaanyɛ otsɔ nɔ owo mɛi hewalɛ? Kɛ́ fɔlɔ ji bo lɛ, ye obua obii lɛ ni amɛsaa amɛhe ni amɛhã sane hetoo yɛ afii abɔ ni amɛye lɛ naa. (Mat. 21:16) Bei komɛi lɛ, asusuɔ saji ni yɔɔ hiɛdɔɔ tamɔ gbalashihilɛ mli naagbai kɛ jeŋba he nɛkɛ. Shi yɛ enɛɛmɛi amli po lɛ, kukuji komɛi yɛ ni no lɛ gbekɛbii lɛ baanyɛ ahã hetoo. Agbɛnɛ hu, ye obua obii lɛ ni amɛna akɛ, jeee be fɛɛ be ni kɛ́ amɛwó amɛnine nɔ lɛ abaatsɛ amɛ. Kɛ́ ofee nakai lɛ, kɛ́ amɛwó amɛnine nɔ ni atsɛɛɛ amɛ po lɛ, amɛnijiaŋ ejeŋ wui.—1 Tim. 6:18. d
18. Mɛni kɛ́ wɔfɔɔ feemɔ lɛ, ebaanyɛ egbala jwɛŋmɔ kɛba wɔnɔ kɛ́ wɔmiihã sane hetoo? (Abɛi 27:2)
18 Wɔ fɛɛ wɔbaanyɛ wɔsaa wɔhe jogbaŋŋ koni wɔhã saji ahetoo ni woɔ Yehowa hiɛ nyam ni baatswa wɔnyɛmimɛi Kristofoi lɛ ema shi. (Abɛi 25:11) Eyɛ mli akɛ bei komɛi lɛ, wɔbaanyɛ wɔgba niiashikpamɔ ko ni wɔná lɛ kuku moŋ, shi esa akɛ wɔkwɛ jogbaŋŋ koni ekafee akɛ daa nɛɛ wɔmiigbala jwɛŋmɔ kɛmiiba wɔnɔ. (Kanemɔ Abɛi 27:2; 2 Kor. 10:18) Moŋ lɛ, esa akɛ wɔgbala jwɛŋmɔ kɛya Yehowa, e-Wiemɔ lɛ, kɛ wɔnyɛmimɛi krokomɛi lɛ anɔ. (Kpo. 4:11) Shi kɛ́ sane ni abi lɛ biɔ ni wɔwie nɔ ko ni kɔɔ wɔ diɛŋtsɛ wɔhe lɛ, naagba bɛ he akɛ wɔbaafee nakai. Wɔbaana enɛ he nɔkwɛmɔnɔ yɛ kuku ni nyiɛ sɛɛ lɛ mli.
19. (a) Mɛni baaba kɛ́ wɔsusu mɛi krokomɛi ni eba asafoŋ kpeei lɛ ahe? (Romabii 1:11, 12) (b) Mɛni osumɔɔ waa yɛ saji ahetoohamɔ he?
19 Eyɛ mli akɛ awoko mlai yɛ bɔ ni esa akɛ wɔhã saji ahetoo wɔhã lɛ he moŋ, shi wɔ fɛɛ wɔbaanyɛ wɔkɛma wɔhiɛ akɛ wɔbaawo wɔnyɛmimɛi lɛ hewalɛ kɛ́ wɔtee asafoŋ kpeei. Ekolɛ gbɛ kome ni wɔbaanyɛ wɔtsɔ nɔ wɔfee enɛ ji, ni wɔbaafɔ saji ahetoohamɔ, loo kɛ́ wɔtee asafoŋ kpeei ni atsɛɛɛ wɔ pii po lɛ wɔhãaa egba wɔnaa, loo ni ebaaŋɔɔ wɔnaa akɛ wɔnyɛmimɛi krokomɛi lɛ ená hegbɛ amɛmiihã sane hetoo. Kɛ́ wɔfóoo wɔ pɛ wɔnɔ mli shi moŋ wɔsusu mɛi krokomɛi ahe lɛ, wɔ fɛɛ wɔbaanyɛ “wɔwowoo wɔhe hewalɛ.”—Kanemɔ Romabii 1:11, 12.
LALA 93 Jɔɔmɔ Wɔkpee Lɛ Nɔ
a Wɔ fɛɛ wɔwoɔ wɔhe hewalɛ kɛ́ wɔhã saji ahetoo yɛ asafoŋ kpeei ashishi. Shi nyɛmimɛi komɛi sheɔ gbeyei akɛ amɛbaahã saji ahetoo. Nyɛmimɛi komɛi hu sumɔɔ ni amɛhã saji ahetoo waa, shi afɔɔɔ amɛ tsɛmɔ. Kɛ́ wɔsheɔ gbeyei akɛ wɔbaahã saji ahetoo jio, wɔsumɔɔ ni wɔhã saji ahetoo waa jio lɛ, mɛni wɔ fɛɛ wɔbaanyɛ wɔfee kɛtsɔɔ akɛ wɔsusuɔ wɔnyɛmimɛi lɛ ahe ni wɔmiisumɔ ni wɔwo amɛ hewalɛ? Mɛɛ gbɛ nɔ wɔbaanyɛ wɔhã wɔsaji ahetoo lɛ akanya wɔnyɛmimɛi lɛ koni amɛjie suɔmɔ kpo ni amɛtsu nitsumɔi kpakpai? Wɔbaana yɛ nikasemɔ nɛɛ mli.
c Atsake gbɛ́i lɛ.
d Kwɛmɔ vidio ni yitso ji, Okɛ Yehowa Abɔ Naanyo—Kasemɔ Koni Ohã Hetoo ni yɔɔ jw.org lɛ nɔ lɛ.
f NƆ NI WƆNAA YƐ MFONIRI LƐ MLI: Nyɛmi nuu ko ni yɔɔ asafo ko ni mɛi ni yɔɔ mli lɛ ayi fa lɛ mli lɛ ehã sane hetoo. No sɛɛ lɛ, akɛni eetao ni mɛi krokomɛi aná hegbɛ amɛhã sane hetoo hewɔ lɛ, ewooo enine nɔ.
