1. Gbalashihilɛ

Mɛi hiɛ susumɔi srɔtoi yɛ gbalashihilɛ kɛ nɔ ni baahã esɔ lɛ he.

NƆ NI ETSƆƆ: Nyɔŋmɔ ji mɔ ni to gbalashihilɛ shishi, hewɔ lɛ ele nɔ ni esa akɛ wu kɛ ŋa afee koni amɛná miishɛɛ. (Marko 10:​6-9) Kɛ́ wu fee nibii ni baahã eŋa aná miishɛɛ, ni ŋa lɛ hu fee nakai nɔŋŋ ehã ewu lɛ, amɛyi enyɔ lɛ fɛɛ amɛbaaná miishɛɛ. Wu ni sumɔɔ eŋa lɛ, baakwɛ eŋa lɛ jogbaŋŋ ni ekɛ lɛ baaye jogbaŋŋ hu. Ni ŋa ni buɔ ewu lɛ, baafi ewu sɛɛ, ni ekɛ lɛ baawie yɛ bulɛ mli.

BIBLIA MLI GBƐTSƆƆMƆ WAA WƆ: Quang kɛ eŋa Thi, ni jɛ Vietnam lɛ nu he akɛ amɛnáŋ miishɛɛ kɔkɔɔkɔ yɛ amɛgbãla lɛ mli. Kulɛ, Quang kɛ Thi yeee jogbaŋŋ. Ewie akɛ: “Miku mihiɛ mishwie bɔ ni Thi nuɔ he ehãa lɛ nɔ, ni bei pii lɛ, mishwieɔ ehiɛ shi.” Ebashɛ he ko ni Thi miitao etse gbãla. Ekɛɛ akɛ: “Minu he akɛ minyɛŋ mahe miwu maye loo ni mabu lɛ dɔŋŋ.”

Sɛɛ mli lɛ, Quang kɛ Thi kase nɔ ni Biblia lɛ wieɔ yɛ gbalashihilɛ he lɛ, ni amɛkɛ ŋaawoo ni yɔɔ Efesobii 5:33 lɛ tsu nii. Quang kɛɛ akɛ: “Ŋmalɛ nɛɛ ye ebua mi ni mina akɛ esa akɛ mikɛ Thi aye jogbaŋŋ, ni mihã lɛ nibii ni he hiaa lɛ lɛ koni ená miishɛɛ ni enu he akɛ misumɔɔ lɛ. Kɛ́ mifee nibii nɛɛ, no hãa esumɔɔ mi ni ebuɔ mi waa.” Ni Thi hu wie akɛ, “Kɛ́ mikɛ ŋaawoo ni yɔɔ Efesobii 5:33 lɛ tsu nii ni mibu miwu lɛ, miwu lɛ hu feɔ nibii ni hãa minuɔ he akɛ esumɔɔ mi, ni mitsui nyɔɔ mimli ni minuɔ he akɛ miyɛ shweshweeshwe.”

 2. Bɔ Ni Esa Akɛ Wɔkɛ Mɛi Aye Ahã

Bei pii lɛ, mɛi kɛ mɛi ni esoro amɛhewolonɔ su, amɛhesaamɔ, maŋ nɔ ni amɛjɛ, jamɔ mli ni amɛyɔɔ loo hii ni sumɔɔ ni amɛkɛ hii aná bɔlɛ loo yei ni sumɔɔ ni amɛkɛ yei aná bɔlɛ lɛ yeee jogbaŋŋ.

NƆ NI ETSƆƆ: Biblia lɛ etsɔɔɔ wɔ ni wɔnyɛ mɛi ni esoro amɛhewolonɔ su, maŋ nɔ ni amɛjɛ, loo ni wɔnyɛ hii ni kɛ hii krokomɛi náa bɔlɛ loo yei ni kɛ yei krokomɛi náa bɔlɛ. Moŋ lɛ, ewoɔ wɔ hewalɛ ni wɔbu gbɔmɛi srɔtoi fɛɛ, ekɔɔɔ he eko amɛhewolonɔ su, maŋ nɔ ni amɛjɛ, loo shihilɛ ni amɛyɔɔ mli. (Bɔfoi 10:34) Kɛ́ wɔkɛ mɛi komɛi kpãaa gbee yɛ amɛhemɔkɛyeli loo bɔ ni amɛfeɔ amɛnii amɛhãa lɛ hewɔ po lɛ, loloolo lɛ, wɔbaanyɛ wɔkɛ amɛ aye jogbaŋŋ ni wɔbu amɛ.—Mateo 7:12.

BIBLIA MLI GBƐTSƆƆMƆ WAA WƆ: Yɛ he ni Daniel da yɛ lɛ, mɛi naa mɛi ni jɛ Asia lɛ akɛ mɛi ni baanyɛ agba amɛmaŋ lɛ naa. Kulɛ enyɛɔ mɛi ni jɛ Asia loo amɛshishi jɛ Asia lɛ, ni bei pii lɛ kɛ́ ekɛ amɛ kpe yɛ mɛi ateŋ po lɛ, ejɛɔ amɛ. Ewie akɛ, “Miyasusu akɛ nɔ ni mifeɔ lɛ tsɔɔ akɛ midɔɔ mimaŋ lɛ he. Ebaaa mijwɛŋmɔ mli shi kome po akɛ misusumɔ lɛ loo nɔ ni mifeɔ lɛ ehiii.”

Sɛɛ mli lɛ, Daniel kase Biblia lɛ. Daniel wie akɛ, “Ehe bahia ni matsake misusumɔ kwraa. Mibana akɛ esa akɛ mana mɛi tamɔ bɔ ni Nyɔŋmɔ naa amɛ lɛ, no ji akɛ, wɔ fɛɛ lɛ, gbɔmɛi kome ji wɔ, ekɔɔɔ he eko he ni wɔjɛ.” Daniel tsɔɔ bɔ ni enuɔ he ehãa bianɛ kɛ́ ena mɛi. Ewie akɛ: “Bei pii lɛ, mikɛ mijwɛŋmɔ eyaaa he ni amɛjɛ lɛ nɔ. Bianɛ lɛ, misumɔɔ gbɔmɛi srɔtoi fɛɛ, ni miyɛ nanemɛi kpaakpai ni jɛ je lɛŋ hei srɔtoi fɛɛ.”

 3. Shika

Mɛi babaoo bɔɔ mɔdɛŋ ni amɛtsɔmɔ niiatsɛmɛi koni amɛná miishɛɛ, ni wɔsɛɛ lɛ nibii ahi ahã amɛ.

NƆ NI ETSƆƆ: Shika he miihia wɔ, shi jeee no baahã wɔná miishɛɛ loo wɔsɛɛ lɛ, nibii ahi ahã wɔ. (Abɛi 18:11; 23:​4, 5) Moŋ lɛ, ja wɔkɛ hiɛshikamɔ ni jɛ Nyɔŋmɔ ŋɔɔ ni yɔɔ Biblia lɛ mli lɛ etsu nii dani wɔbaaná miishɛɛ lɛɛlɛŋ loo wɔsɛɛ lɛ, nibii ahi ahã wɔ.—1 Timoteo 6:​17-19.

BIBLIA MLI GBƐTSƆƆMƆ WAA WƆ: Nuu ko ni yɔɔ Indonesia ni atsɛɔ lɛ Cardo lɛ bɔ mɔdɛŋ waa ni etsɔ niiatsɛ. Ewie akɛ: “Kulɛ miyɛ nibii fɛɛ ni mɛi pii sumɔɔ ni amɛná lɛ eko. Mifãa gbɛ, miheɔ nibii ni jara wala, ni miyɛ kar srɔtoi kɛ shĩai hu.” Shi eshika lɛ fɛɛ tã. Cardo wie akɛ: “Atswa mi ojo, ni trukaa lɛ, shika ni migbo deŋme afii pii kɛná lɛ tã. Migbo deŋme afii pii koni matsɔ niiatsɛ, shi minijiaŋ je wui ejaakɛ nɔ fɛɛ nɔ ni miyɔɔ lɛ je midɛŋ ni minu he akɛ sɛɛnamɔ ko bɛ mihe.”

Cardo kɛ ŋaa ni Biblia lɛ wo yɛ shika he lɛ bɔi nitsumɔ. Amrɔ nɛɛ, egbooo deŋme ni etsɔ niiatsɛ, moŋ lɛ ekɛ ejwɛŋmɔ maa nibii ni he hiaa waa yɛ shihilɛ mli lɛ pɛ anɔ. Ewie akɛ: “Bianɛ lɛ, minuɔ he akɛ mina jwetri ni hi jogbaŋŋ ejaakɛ naanyobɔɔ kpakpa yɛ mi kɛ Nyɔŋmɔ teŋ. Miwɔ ŋɔɔ minaa, ni miyɛ miishɛɛ.”

 4. Bɔlɛnamɔ

Mɛi hiɛ susumɔi srɔtoi yɛ bɔlɛnamɔ he.

NƆ NI ETSƆƆ: Biblia lɛ etsɔɔ wɔ nibii komɛi ni esaaa akɛ wɔfeɔ yɛ bɔlɛnamɔ he. Wiemɔ ni ji “ajwamaŋbɔɔ” lɛ kɔɔ gbalafitemɔ, ashawofeemɔ, nuu kɛ yoo ni boteko gbãla mli lɛ ateŋ bɔlɛnamɔ, nuu kɛ nuu loo yoo kɛ yoo teŋ bɔlɛnamɔ, kɛ gbɔmɔ kɛ kooloo teŋ bɔlɛnamɔ he. (1 Korintobii 6:​9, 10) Bɔlɛnamɔ ji nikeenii ni jɛ Nyɔŋmɔ ŋɔɔ ni eesumɔ ni eya nɔ yɛ wu kɛ eŋa pɛ teŋ.—Abɛi 5:​18, 19.

BIBLIA MLI GBƐTSƆƆMƆ WAA WƆ: Yoo ko ni yɔɔ Australia ni atsɛɔ lɛ Kylie lɛ wie akɛ: “Be ni miboteko gbãla mli lɛ, miyasusu akɛ kɛ́ mina bɔlɛ lɛ, no baahã manu he akɛ sɛɛnamɔ yɛ mihe, ni mitsui baanyɔ mimli. Shi jeee nakai eba lɛ. Mihao ni mitsui kumɔ moŋ.”

Sɛɛ mli lɛ, Kylie kase nɔ ni Biblia lɛ tsɔɔ yɛ bɔlɛnamɔ he lɛ, ni ekɛtsu nii. Ewie akɛ:“Mina akɛ Nyɔŋmɔ kɛ egbɛtsɔɔmɔi lɛ hãa koni wɔkaye wɔhe awui ni wɔpiŋ. Akɛni mifeɔ nɔ ni Yehowa sumɔɔ hewɔ lɛ, bianɛ lɛ, mitsui enyɔ mimli, ni minuɔ he akɛ sɛɛnamɔ yɛ mihe. Biblia mli ŋaawoi ni mikɛtsuɔ nii lɛ ehã miye mihe kɛje naagbai pii ahe!”