Mida yɛ akrowa bibioo ko ni atsɛɔ lɛ Warialda, ni yɔɔ New South Wales lɛ mli. Tooi kɛ tsinai alɛɛ, kɛ abele kɛ ehenɔi kɛ ŋmɔshi nii bibii komɛi adũmɔ ji nitsumɔi ni atsuɔ yɛ Warialda akrowa lɛŋ. Maŋ lɛŋ tse jogbaŋŋ, ni juu kɛ fɔ̃ fioo pɛ yɔɔ jɛi.

Akɛni miji kromɔ yɛ bii nyɔŋma ateŋ hewɔ lɛ, beni miye afii 13 lɛ mibɔi nitsumɔ koni mikɛye mibua kɛkwɛ weku lɛ. Miskulyaa ni faa kwraa hewɔ lɛ, mitsu nii yɛ kooloi alɛɛhei. Beni miye afii 15 lɛ, no mli lɛ miitsu nii akɛ kooloi akwɛlɔ, ni mijɔɔ okpɔŋɔi ni hiɛ yɔɔ laŋlaŋ lɛ ahe koni amɛfee kpoo.

Kooloi akwɛmɔ nitsumɔ lɛ fee miishɛɛ kɛ haomɔ fɛɛ. Efee miishɛɛ ejaakɛ, minya nitsumɔ lɛ he waa, ni misumɔɔ bɔ ni jɛmɛ yɔɔ lɛ. Kɛ́ eshɛ gbɛkɛ lɛ, miwereɔ la ni mikwɛɔ nyɔŋtsere kɛ atatu ni ŋulamii eje yɛ mli lɛ; kɔɔyɔɔ ni tswaa lɛ hu haa anuɔ tsei ni yɔɔ jɛi niiaŋ lɛ aŋma. Mikaiɔ akɛ, susumɔ ko bayi mijwɛŋmɔŋ akɛ Mɔ ko kɛ̃ ji mɔ ni bɔ nakai nibii fɛfɛji lɛ fɛɛ. Shi ebafee haomɔ eha mi ejaakɛ, mikɛ shihilɛi gbohii komɛi kpe yɛ kooloi alɛɛhei lɛ. Minu shii abɔ ni mɛi miijɛjɛɛ amɛhe, ni zigareti hu ebu yɛ jɛmɛ. Etsɛɛɛ kɛkɛ ni zigareti shɛremɔ kɛ mɔjɛmɔ batsɔ misu.

Beni miye afii 18 lɛ, mifã kɛyahi Sydney. Mika akɛ mabote asraafoi anitsumɔ lɛ mli, shi akɛni miskulyaa faaa kwraa hewɔ lɛ aheee mi. Miná nitsumɔ, ni mihi Sydney afi sɔŋŋ. Nakai be lɛ mli ni mikɛ Yehowa Odasefoi kpe klɛŋklɛŋ kwraa. Afɔ̃ mi nine kɛtee amɛkpeei lɛ eko, ni mitee; oya nɔŋŋ ni miyɔse akɛ amɛtsɔɔmɔi lɛ ji anɔkwale.

No sɛɛ etsɛɛɛ lɛ, mikpɛ miyiŋ akɛ maku misɛɛ kɛya ŋa lɛ nɔ ekoŋŋ. Naagbee lɛ, mitee maŋ ni ji Goondiwindi ni yɔɔ Queensland lɛ. Mibaná nitsumɔ, ni mibote gbalashihilɛ mli, shi dɔlɛ sane ji, mibɔi dãanumɔ shɛii.

 Mikɛ miŋa fɔ bii enyɔ. Bihii enyɔ ni wɔfɔ nɛɛ sɛɛ lɛ, mibabɔi bɔ ni mishihilɛ naa baayakpa aha lɛ he susumɔ waa. Mikai saji ni minu yɛ Odasefoi akpee ni mitee yɛ Sydney lɛ shishi lɛ, ni mikpɛ miyiŋ akɛ mafee he nɔ ko.

Mina Buu-Mɔɔ momo ko ni Yehowa Odasefoi anitsumɔhe nine ni yɔɔ Australia lɛ adrɛs yɔɔ mli. Miŋma kɛbi yelikɛbuamɔ. No ha Odasefonyo mlihilɔ ko, ni sumɔɔ mɔ waa basara mi. Etsɛɛɛ kɛkɛ ni ekɛ mi bɔi Biblia lɛ kasemɔ.

Beni mikaseɔ Biblia lɛ, mibayɔse akɛ esa akɛ mafee tsakemɔi wuji komɛi yɛ mishihilɛ mli. Biblia ŋmalɛ ko ni ta mitsuiŋ waa ji 2 Korintobii 7:1 lɛ. Nakai ŋmalɛ lɛ woɔ wɔ hewalɛ koni ‘wɔtsuu wɔhe kɛjɛ heloo muji fɛɛ he.’

Mibakpɛ miyiŋ akɛ makpa zigareti shɛremɔ kɛ dãanumɔ shɛii. Mináaa tsakemɔi nɛɛ afeemɔ mlɛo kwraa, ejaakɛ jeee ŋmɛnɛ nakai su lɛ batsɔ mishihilɛ fã. Shi no mli lɛ, mitswa mifai shi akɛ mahi shi bɔ ni saa Nyɔŋmɔ hiɛ. Ni nɔ ni ye ebua mi waa ji shishitoo mla ni yɔɔ Romabii 12:2 lɛ ni mikɛtsu nii lɛ, ekɛɔ akɛ: “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ní etsɔ ehee lɛ atsakea nyɛhe.” Mibayɔse akɛ, dani manyɛ matsake mijeŋba lɛ, ehe baahia ni matsake misusumɔ koni mana mijeŋba bɔ pɛ ni Nyɔŋmɔ naa lɛ lɛ—akɛ eji jeŋba gbonyo. Kɛtsɔ Nyɔŋmɔ yelikɛbuamɔ nɔ lɛ, minyɛ mikpa zigareti shɛremɔ kɛ dãanumɔ shɛii.

Shi nɔ ni bawa kɛha mi fe fɛɛ akɛ makpa ji mɛi ajɛmɔ. No mli lɛ, mile Biblia ŋaawoo ni yɔɔ Efesobii 4:29 lɛ, ekɛɔ akɛ: “Wiemɔ sha ko wiemɔ sha ko akaje nyɛnaa kwraa.” Fɛɛ sɛɛ lɛ, jeee nɔŋŋ kɛkɛ ni minyɛ mikpa wiemɔ sha kɛnitsumɔ. Mina akɛ kɛ́ mijwɛŋ Yesaia 40:26 lɛ mli wiemɔi lɛ anɔ lɛ, ebaaye ebua mi. Nakai ŋmalɛ lɛ wie yɛ ŋwɛiniiaŋ he akɛ: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii; enyɛmɔ ni fa kɛ ehewalɛ kpele lɛ hewɔ lɛ amɛteŋ ekome folo po eshwɛɛɛ.” Mishwie miyiŋ akɛ, kɛ́ Nyɔŋmɔ yɛ hewalɛ ni ekɛbɔ jeŋ muu nɛɛ fɛɛ—ní minyaa he waa akɛ makwɛ lɛ—no lɛ bɔ fɛɛ bɔ ni fee lɛ, ebaanyɛ eha mi hewalɛ koni mikɛfee tsakemɔi bɔni afee ni masa ehiɛ. Mɔdɛŋ ni mibɔ kɛ sɔlemɔ ni mitee nɔ misɔle lɛ ye ebua mi, ni fioo fioo lɛ, minyɛ mikudɔ wiemɔi ni jɛɔ minaa lɛ.

Ákɛ kooloi akwɛlɔ lɛ, no mli lɛ mináaa mɛi tsɔ mikɛgba sane, ejaakɛ mɛi faaa tsɔ yɛ ŋa lɛ nɔ he ni mitsu nii yɛ lɛ. Kɛlɛ, kɛtsɔ tsɔsemɔi ni akɛhaa yɛ Yehowa Odasefoi akpeei lɛ ashishi lɛ nɔ lɛ, minyɛ mikase bɔ ni akɛ mɛi wieɔ. Sɛɛnamɔi lɛ eko hu ji akɛ, nakai tsɔsemɔ lɛ eye ebua mi ni minyɛɔ mishiɛɔ Nyɔŋmɔ Maŋtsɛyeli lɛ he sanekpakpa lɛ mitsɔɔ mɛi.—Mateo 6:9, 10; 24:14.

Mikɛ afii komɛi esɔmɔ akɛ onukpa yɛ asafo lɛ mli. Mibuɔ enɛ akɛ hegbɛ ni miná ni mikɛbaafee nɔ fɛɛ nɔ ni manyɛ kɛye mabua nyɛmimɛi krokomɛi. Kɛlɛ, jɔɔmɔ ni fe fɛɛ ni miná ji, mikɛ miŋa ni ekpɛtɛ mihe kɛbashi amrɔ nɛɛ, ni sumɔɔ mɔ waa lɛ, kɛ wɔbii fɛfɛji lɛ etsa yaa kɛmiisɔmɔ Yehowa.

Miida Yehowa shi akɛ mi—ni miskulyaa faaa kwraa lɛ—miná hegbɛ akɛ eetsɔɔ mi nii. (Yesaia 54:13) Mikɛ sane ni yɔɔ Abɛi 10:22 lɛ kpãa gbee diɛŋtsɛ, ekaneɔ nɛkɛ: “Yehowa jɔɔmɔ lɛ, no feɔ mɔ niiatsɛ.” Mikɛ miweku lɛ gbɛkpamɔ ji akɛ, wɔbaaya nɔ wɔkase Yehowa he nii koni wɔsɔmɔ lɛ kɛya naanɔ.