Afɔ mi yɛ Baku, ni ji maŋ ko ni yɔɔ Azerbaijan lɛ mli; wɔyi enyɔ pɛ afɔ, ni miji gbekɛ. Mitsɛ ji Muslimnyo, ni minyɛ ji Yudanyo. Akɛni mifɔlɔi sumɔɔ amɛhe waa hewɔ lɛ, amɛkpɛlɛ hemɔkɛyelii srɔtoi ni amɛyɔɔ lɛ nɔ. Kɛ́ mitsɛ miihi ŋmãa yɛ Ramadan beaŋ lɛ, minyɛ hu hiɔ ŋmaa, ni kɛ́ minyɛ hu miiye Hehoo lɛ mitsɛ fĩɔ esɛɛ. Wɔyɛ Koran, Tora, kɛ Biblia lɛ fɛɛ eko yɛ wɔshĩa lɛ.

Mibuɔ mihe akɛ Muslimnyo. Eyɛ mli akɛ miheɔ miyeɔ akɛ Nyɔŋmɔ yɛ shihilɛ mli moŋ, shi nibii komɛi yɛ ni minuuu shishi. Mibiɔ mihe akɛ, ‘Mɛni hewɔ Nyɔŋmɔ bɔ adesai, ni mɛɛ sɛɛnamɔ yɔɔ he akɛ mɔ ko baana nɔ yɛ ewala shihilɛ mli fɛɛ kɛkɛ lɛ apiŋ lɛ yɛ Hɛl la mli kɛtee naanɔ hu?’ Akɛni mɛi kɛɔ akɛ nɔ fɛɛ nɔ ni baa lɛ ji Nyɔŋmɔ suɔmɔnaa nii hewɔ lɛ, mibiɔ mihe akɛ, ‘Ani Nyɔŋmɔ ni hãa adesai naa nɔ, ni enáa miishɛɛ kɛ́ amɛmiipiŋ?’

Be ni miye afii 12 lɛ, mibɔi namaz, ni ji Muslimbii asɔlemɔ ni amɛsɔleɔ shii enumɔ daa gbi lɛ sɔlemɔ. Nakai beaŋ lɛ, mitsɛ hã mi kɛ minyɛmiyoo lɛ bɔi Yudafoi askul yaa. Atsɔɔ wɔ Tora kusumii kɛ Hebri wiemɔ afata nibii ni wɔkaseɔ lɛ he. Daa kɛ́ wɔbaaje skul nikasemɔ shishi lɛ, ahãa wɔsɔleɔ taakɛ Yudafoi lɛ akusum biɔ ni afee lɛ. No hewɔ lɛ, misɔleɔ namaz yɛ shĩa leebi, ni kɛ́ mitee skul lɛ, mifataa Yudafoi lɛ ahe kɛsɔleɔ.

Mitao waa akɛ maná hetoi ni nilee yɔɔ mli mahã misanebimɔi lɛ. Mifɔɔ rabifoi ni tsɔɔ nii yɛ skul lɛ bimɔ akɛ: “Mɛni hewɔ Nyɔŋmɔ bɔ adesai? Te Nyɔŋmɔ naa mitsɛ ni ji Muslimnyo lɛ ehãa tɛŋŋ? Eji gbɔmɔ kpakpa, no hewɔ lɛ mɛni hewɔ abuɔ lɛ akɛ ehe tseee lɛ? Mɛni hewɔ Nyɔŋmɔ bɔ lɛ?” Hetoi fioo ni minine shɛ nɔ lɛ bɛ faŋŋ ni enyɛɛɛ ehã miyiŋ atsɔ.

Yɛ afi 2002 lɛ, hemɔkɛyeli ni miyɔɔ yɛ Nyɔŋmɔ mli lɛ fɛɛ tã. No mli lɛ wɔfã kɛtee Germany etsɛko, ni otsi pɛ sɛɛ lɛ, mitsɛ baná stroki, ni nɔ nyɔ enɔ. Mikɛ afii pii esɔle ehã Nyɔŋmɔ koni ehã miweku lɛ aná  gbɔmɔtsoŋ hewalɛ kpakpa ni amɛná miishɛɛ. Akɛni mile akɛ Ofe lɛ pɛ ji mɔ ni yɔɔ hewalɛ yɛ wala kɛ gbele nɔ hewɔ lɛ, daa gbi lɛ mikpaa lɛ fai ni ebaa mitsɛ wala yi. Misusu akɛ, ‘Eji nɔ ko bibioo kɛhã Nyɔŋmɔ akɛ ebaafee gbekɛ yoo fioo ko tsuinaa nii ehã lɛ.’ Miná nɔmimaa akɛ ebaatsu minibimɔ lɛ he nii. Shi mitsɛ gbo.

Akɛni efee tamɔ nɔ ni Nyɔŋmɔ susuuu mihe hewɔ lɛ, ehe fee mi naakpɛɛ, ni enɛ hã mitsui kumɔ waa. Misusu akɛ, ‘Ekolɛ gbɛ ni mitsɔɔ nɔ misɔleɔ lɛ ni ejaaa, loo ekolɛ Nyɔŋmɔ bɛ.’ Minaa kpɛ mihe waa, ni minyɛɛɛ masɔle namaz sɔlemɔ lɛ dɔŋŋ. Minaaa akɛ nilee yɛ jamɔi krokomɛi lɛ atsɔɔmɔi lɛ amli, no hewɔ lɛ mimu sane naa akɛ Nyɔŋmɔ bɛ.

Nyɔji ekpaa sɛɛ lɛ, Yehowa Odasefoi ba wɔshĩa lɛ. Akɛni wɔsusuɔ akɛ Kristofoi leee nɔ ko kwraa hewɔ lɛ, mi kɛ minyɛmiyoo lɛ to akɛ wɔbaajɛ bulɛ mli wɔhã amɛle akɛ amɛtsɔɔmɔi lɛ ejaaa. Wɔ bi amɛ akɛ: “Mɛni hewɔ Kristofoi jáa Yesu, krɔɔs, Maria, kɛ amagai krokomɛi be ni Kitai Nyɔŋma lɛ wieɔ eshiɔ nifeemɔi ni tamɔ nakai lɛ?” Odasefoi lɛ jɛ Ŋmalɛi lɛ amli amɛgbala mli amɛhã wɔ faŋŋ akɛ anɔkwa Kristofoi jáaa amagai, ni akɛ, esa akɛ asɔle ahã Nyɔŋmɔ pɛ. Enɛ fee mi naakpɛɛ waa.

Kɛkɛ ni wɔ bi amɛ akɛ: “Ni Triniti lɛ hu? Kɛ́ Yesu ji Nyɔŋmɔ lɛ, te fee tɛŋŋ ni ebahi shikpɔŋ lɛ nɔ ni adesai gbe lɛ lɛ?” Shi kome ekoŋŋ lɛ, amɛjɛ Biblia lɛ mli amɛgbala mli amɛhã wɔ akɛ jeee Yesu ji Nyɔŋmɔ, ni asaŋ ekɛ Nyɔŋmɔ yeee egbɔ. Odasefoi lɛ tsɔɔ mli akɛ, enɛ hewɔ lɛ, amɛheee Triniti lɛ amɛyeee. Enɛ hã minaa kpɛ mihe waa, ni mikɛɛ mihe akɛ, ‘Esoro Kristofoi nɛɛ kwraa.’

Loloolo lɛ, miitao male nɔ hewɔ ni mɛi gboiɔ kɛ nɔ hewɔ ni Nyɔŋmɔ ŋmɛɔ piŋmɔ gbɛ. Odasefoi lɛ kɛ wolo ni ji Nilee ní Kɛ Mɔ Yaa Naanɔ Wala Mli * lɛ tsɔɔ mi, ni emli saneyitsei lɛ ekomɛi wieɔ misanebimɔi lɛ ahe. Amrɔ nɔŋŋ ni amɛkɛ mi bɔi Biblia lɛ kasemɔ.

Be fɛɛ be ni wɔbaakase nii lɛ, minaa hetoo ni hãa mitsui nyɔɔ mimli yɛ Biblia lɛ mli. Mibaná mile akɛ Nyɔŋmɔ gbɛ́i ji Yehowa. (Lala 83:19) Esu titri ji suɔmɔ ni osato bɛ mli. (1 Yohane 4:8) Ebɔ adesai, ejaakɛ eesumɔ ni amɛ hu amɛná wala mli ŋɔɔmɔ. Mibanu shishi akɛ, eyɛ mli akɛ Nyɔŋmɔ ŋmɛɔ jalɛsane ni ayeee gbɛ moŋ, shi eji enihiinii, ni etsɛŋ ebaafo sɛɛ kwraa kɛya naanɔ. Mikase akɛ Adam kɛ Hawa atuatsemɔ lɛ ji nɔ ni kɛ adesai wo oshara mli lɛ. (Romabii 5:12) Nibii ni yɔɔ mɔbɔ ni ejɛ mli kɛba lɛ eko ji wɔsuɔlɔi ni gboiɔ, tamɔ bɔ ni mitsɛ gbo lɛ. Shi Nyɔŋmɔ baajie amanehului ni tamɔ nɛkɛ lɛ kɛya yɛ jeŋ hee ni baaba lɛ mli, ni mɛi ni egboi lɛ baaba wala mli ekoŋŋ.—Bɔfoi lɛ Asaji 24:15.

Biblia mli anɔkwalei lɛ hã miná misanebimɔi lɛ ahetoo. Mibɔi hemɔkɛyeli namɔ yɛ Nyɔŋmɔ mli ekoŋŋ. Be ni miyaa nɔ mileɔ Yehowa Odasefoi lɛ jogbaŋŋ lɛ, mibayɔse akɛ amɛyɛ nyɛmimɛi yɛ jeŋ fɛɛ. Minya ekomefeemɔ kɛ suɔmɔ ni yɔɔ amɛteŋ lɛ he waa. (Yohane 13:34, 35) Nɔ ni mikase yɛ Yehowa he lɛ tsirɛ mi koni masɔmɔ lɛ, ni no hewɔ lɛ, mikpɛ miyiŋ akɛ matsɔ Yehowa Odasefonyo. Abaptisi mi yɛ January 8, 2005.

Bɔ ni Biblia lɛ kɔne miyiŋ lɛ hã miná jwɛŋmɔ kpakpa yɛ shihilɛ lɛ he. Hetoi ni anyɛɔ akɛhe fɔ̃ɔ nɔ ni miná kɛjɛ Nyɔŋmɔ Wiemɔ lɛ mli lɛ hã mitsui nyɔ mimli. Gbohiiashitee he shiwoo ni Nyɔŋmɔ Wiemɔ lɛ kɛhãa lɛ shɛjeɔ mimii, ni ehãa mináa hiɛnɔkamɔ akɛ mana mitsɛ ekoŋŋ, ni enɛ hãa minaa miishɛɛ waa.—Yohane 5:28, 29.

Afii ekpaa nɛ ní mikɛ miwu Jonathan ni sheɔ Nyɔŋmɔ gbeyei lɛ hi shi, ni wɔyɛ miishɛɛ waa. Mi kɛ lɛ fɛɛ ekase akɛ anɔkwale ni kɔɔ Nyɔŋmɔ he lɛ shishinumɔ waaa, ni yɛ nakai beaŋ nɔŋŋ lɛ eji jwetri ni nɔ bɛ. No hewɔ ni wɔkɛ mɛi krokomɛi gbaa wɔ hemɔkɛyeli kɛ wɔhiɛnɔkamɔ ni nɔ bɛ lɛ he sane lɛ. Ŋmɛnɛ lɛ, miná mile akɛ Yehowa Odasefoi jeee ‘mɛi srɔto’ ko, shi moŋ amɛji anɔkwa Kristofoi.