Nibii titrii ni yaa nɔ yɛ shihilɛ mli ji, shwɛmɔ, nitsumɔ, gbala mli botemɔ, bii akwɛmɔ, kɛ gbɔlɛ. Ani osusuɔ akɛ nibii nɛɛ pɛ hewɔ adesai yɔɔ shihilɛ mli? (Hiob 14:1, 2) Biblia lɛ tsɔɔ akɛ mɛi komɛi ni le nii waa lɛ po esusu sane nɛɛ he.—Kanemɔ Jajelɔ 2:11.

Ani yiŋtoo ko yɛ shihilɛ sɛɛ? Klɛŋklɛŋ lɛ esa akɛ wɔbi akɛ, te fee tɛŋŋ ni wala je shishi? Be ni mɛi babaoo susu bɔ ni wɔ-aŋsɔ lɛ kɛ wɔgbɔmɔtso lɛ yɔɔ naakpɛɛ hã lɛ he lɛ, amɛmu sane naa akɛ Bɔlɔ ko ni le nii ji mɔ ni fee. (Kanemɔ Lala 139:14.) Kɛ́ nakai ji sane lɛ, belɛ ebɔ wɔ yɛ yiŋtoo ko hewɔ! Nakai yiŋtoo lɛ he nii ni oookase lɛ baanyɛ ahã oná miishɛɛ yɛ shihilɛ mli.

Nyɔŋmɔ jɔɔ klɛŋklɛŋ adesai enyɔ lɛ, ni ehã amɛ nitsumɔ ko ni yɔɔ miishɛɛ waa. Eyiŋtoo ji, ni amɛshwere yɛ shikpɔŋ lɛ nɔ, amɛfee lɛ paradeiso, ni amɛhi shi kɛya naanɔ.—Kanemɔ 1 Mose 1:28, 31.

Be ni adesai tse atua amɛshi Nyɔŋmɔ nɔyeli lɛ, eyiŋtoo lɛ sɛɛ gbala shi. Shi Nyɔŋmɔ kpooo wɔ, ni etsakeee eyiŋ ni eto kɛhã adesai kɛ shikpɔŋ lɛ hu. Biblia lɛ hãa wɔleɔ akɛ, Nyɔŋmɔ miifee nibii ni baahã ehere adesai anɔkwafoi lɛ ayiwala, koni eyiŋ ni eto yɛ shikpɔŋ lɛ he lɛ hu aba mli! No hewɔ lɛ, Nyɔŋmɔ miisumɔ ni oná shihilɛ mli ŋɔɔmɔ taakɛ eto he gbɛjianɔ lɛ! (Kanemɔ Lala 37:29.) Kasemɔ bɔ ni obaanyɛ oná Nyɔŋmɔ yiŋtoo kɛhã shikpɔŋ lɛ he sɛɛ yɛ Biblia lɛ mli.