NIKASEMƆ 32
Nyɔŋmɔ Maŋtsɛyeli Lɛ Miiye Nɔ Bianɛ!
Nyɔŋmɔ Maŋtsɛyeli lɛ bɔi nɔyeli yɛ ŋwɛi, yɛ afi 1914 mli. Nakai beiaŋ nɔŋŋ ni adesai anɔyeli lɛ naagbee gbii lɛ je shishi. Mɛni hewɔ wɔkɛɔ nakai? Biblia mli gbalɛi ni eba mli, je lɛŋ shihilɛ, kɛ sui ni mɛi ejie lɛ kpo kɛjɛ afi 1914 kɛbaa lɛ hewɔ wɔkɛɔ nakai lɛ.
1. Mɛni Biblia lɛ egba efɔ̃ shi?
Biblia mli wolo ni ji Daniel lɛ hãa wɔnaa akɛ, Nyɔŋmɔ Maŋtsɛyeli lɛ baabɔi nɔyeli be ni be ko ni atsɛɔ lɛ “bei kpawo” lɛ eba naagbee. (Daniel 4:16, 17) Afii ohai abɔ sɛɛ lɛ, Yesu tsɛ nakai be lɛ nɔŋŋ akɛ, “jeŋmaji lɛ abei ni ato lɛ,” ni ehã ana akɛ, yɛ egbii lɛ amli lɛ no mli lɛ, ebako naagbee. (Luka 21:24) Wɔbaana yɛ nikasemɔ nɛɛ mli akɛ, bei kpawo lɛ ba naagbee yɛ afi 1914 mli.
2. Te je lɛŋ shihilɛ efee tɛŋŋ kɛjɛ afi 1914 kɛbaa, ni mɛɛ sui mɛi ejie lɛ kpo?
Yesu kaselɔi lɛ bi lɛ akɛ: “Mɛni baafee be ni oba lɛ kɛ je lɛ naagbee gbii lɛ he okadi lɛ?” (Mateo 24:3) Be ni Yesu hãa amɛ hetoo lɛ, egba nibii pii ni baaba kɛ́ ebɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ Maŋtsɛ. Nibii nɛɛ ekomɛi ji ta, hɔmɔ, kɛ shikpɔŋhosomɔi. (Kanemɔ Mateo 24:7.) Biblia lɛ gba hu akɛ, sui ni mɛi baajie lɛ kpo yɛ “naagbee gbii lɛ” amli lɛ baahã je lɛŋ ‘shihilɛ awa.’ (2 Timoteo 3:1-5) Kɛjɛ afi 1914 kɛbaa lɛ, nibii ni yaa nɔ yɛ je lɛŋ kɛ sui ni mɛi jieɔ lɛ kpo lɛ kɛ nɔ ni Biblia lɛ gba lɛ yaa pɛpɛɛpɛ.
3. Kɛjɛ be ni Nyɔŋmɔ Maŋtsɛyeli lɛ bɔi nɔyeli lɛ, mɛni hewɔ je lɛŋ shihilɛ efite kwraa lɛ?
Be ni awó Yesu Nyɔŋmɔ Maŋtsɛyeli lɛ Maŋtsɛ lɛ sɛɛ etsɛɛɛ lɛ, ekɛ Satan kɛ daimonioi lɛ wu ta yɛ ŋwɛi. Aye Satan nɔ kunim. Biblia lɛ kɛɛ “ashɛ lɛ afɔ̃ shikpɔŋ, ni ashɛrɛ ebɔfoi lɛ hu ashwie afata ehe.” (Kpojiemɔ 12:9, 10, 12) Satan mli efu waa diɛŋtsɛ, ejaakɛ ele akɛ abaakpãtã ehiɛ. No hewɔ lɛ, lɛ ehã mɛi piŋɔ ni amɛnaa nɔ yɛ je lɛŋ fɛɛ lɛ. Enɛ hãa wɔnaa nɔ hewɔ ni je lɛŋ shihilɛ efite kwraa lɛ. Nyɔŋmɔ Maŋtsɛyeli lɛ baahã naagbai nɛɛ fɛɛ sɛɛ afo.
KASEMƆ PII OFATA HE
Obaana nɔ hewɔ ni wɔkɛɔ akɛ Maŋtsɛyeli lɛ bɔi nɔyeli yɛ afi 1914 mli lɛ, kɛ nɔ ni esa akɛ no atsirɛ wɔ ni wɔfee.
4. Biblia gbalɛ tsɔɔ akɛ, Maŋtsɛyeli lɛ bɔi nɔyeli yɛ afi 1914 mli
Nyɔŋmɔ hã blema Babilon maŋtsɛ Nebukadnezar la lamɔ ko ni ji gbalɛ. Bɔ ni Daniel tsɔɔ nakai lamɔ lɛ mli ehã lɛ hãa wɔnaa akɛ, ekɔɔ Nebukadnezar nɔyeli lɛ kɛ Nyɔŋmɔ Maŋtsɛyeli lɛ fɛɛ he.—Nyɛkanea Daniel 4:17 lɛ. a
Nyɛkanea Daniel 4:20-26 lɛ, ni nyɛkɛ akrabatsa lɛ ahãa sanebimɔi ni nyiɛ sɛɛ nɛɛ hetoo:
-
(A) Mɛni Nebukadnezar na yɛ elamɔ lɛ mli?—Kwɛmɔ kuku 20 kɛ 21 lɛ.
-
(B) Mɛni abaafee tso lɛ?—Kwɛmɔ kuku 23 lɛ.
-
(D) Kɛ́ “bei kpawo” lɛ ba naagbee lɛ, mɛni baaba?—Kwɛmɔ kuku 26 lɛ.
Bɔ Ni Tso Lɛ He Lamɔ Lɛ Kɔɔ Nyɔŋmɔ Maŋtsɛyeli Lɛ He
GBALƐ LƐ (Daniel 4:20-36)
Nɔyeli
(A) Tso ko ni da agbo
Afo nɔyeli lɛ sɛɛ
(B) “Nyɛfoa tso lɛ nyɛfɔ̃a shi,” ni nyɛhãa ‘bei kpawo ahoa’
Ato nɔyeli lɛ shishi ekoŋŋ
(D) “Omaŋtsɛyeli lɛ baatsɔ onɔ ekoŋŋ”
Yɛ gbalɛ nɛɛ klɛŋklɛŋ mlibaa lɛ mli lɛ . . .
-
(E)Namɔ tso lɛ damɔ shi kɛhã?—Kwɛmɔ kuku 22 lɛ.
-
(Ɛ)Mɛɛ gbɛ nɔ afo enɔyeli lɛ sɛɛ?—Nyɛkanea Daniel 4:29-33 lɛ.
-
(F)Be ni “bei kpawo” lɛ ba naagbee lɛ, mɛni ba Nebukadnezar nɔ?—Nyɛkanea Daniel 4:34-36 lɛ.
GBALƐ LƐ KLƐŊKLƐŊ MLIBAA
Nɔyeli
(E) Nebukadnezar, Babilon maŋtsɛ
Afo nɔyeli lɛ sɛɛ
(Ɛ) Afi 606 D.Ŋ.B. sɛɛ lɛ, Nebukadnezar ye sɛkɛ, ni afii kpawo ho ni enyɛɛɛ eye nɔ
Ato nɔyeli lɛ shishi ekoŋŋ
(F) Nebukadnezar hiɛ tserɛ lɛ, ni ebɔi nɔyeli ekoŋŋ
Yɛ gbalɛ nɛɛ mlibaa ni ji enyɔ lɛ mli lɛ . . .
-
(G) Namɛi tso lɛ damɔ shi kɛhã?—Nyɛkanea 1 Kronika 29:23 lɛ.
-
(H) Mɛɛ gbɛ nɔ afo amɛnɔyeli lɛ sɛɛ? Te wɔfeɔ tɛŋŋ wɔleɔ akɛ be ni Yesu yɔɔ shikpɔŋ lɛ nɔ lɛ, no mli lɛ, atoko amɛnɔyeli lɛ shishi ekoŋŋ lɛ?—Nyɛkanea Luka 21:24 lɛ.
-
(I) Mɛɛ be ato nɔyeli nɛɛ shishi, ni nɛgbɛ ato shishi yɛ?
GBALƐ LƐ MLIBAA NI JI ENYƆ
Nɔyeli
(G) Blema Israel maŋtsɛmɛi ni damɔ shi kɛhã Nyɔŋmɔ nɔyeli lɛ
Afo nɔyeli lɛ sɛɛ
(H) Akpãtã Yerusalem hiɛ, ni no fo blema Israel maŋtsɛmɛi lɛ anɔyeli lɛ sɛɛ afii 2,520
Ato nɔyeli lɛ shishi ekoŋŋ
(I) Yesu bɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ Maŋtsɛ
Mɛni bei kpawo lɛ damɔ shi kɛhã?
Biblia lɛ hei komɛi hãa wɔnuɔ ehei krokomɛi ashishi. Akɛ nɔkwɛmɔnɔ lɛ, Biblia mli wolo ni ji Kpojiemɔ lɛ kɛɛ bei etɛ kɛ fã feɔ gbii 1,260. (Kpojiemɔ 12:6, 14) Bei kpawo ji nakai yibɔ lɛ toi enyɔ, loo gbii 2,520. Bei komɛi lɛ, Biblia lɛ kɛ gbi kome damɔɔ shi kɛhãa afi kome. (Ezekiel 4:6) No hewɔ lɛ, bei kpawo lɛ ni awie he yɛ Daniel wolo lɛ mli lɛ damɔ shi kɛhã afii 2,520.
5. Je lɛŋ shihilɛ etsake kwraa kɛjɛ afi 1914 kɛbaa
Yesu gba bɔ ni je lɛŋ shihilɛ baaji kɛ́ ebatsɔ Maŋtsɛ. Nyɛkanea Luka 21:9-11 lɛ, ni nyɛsusua sanebimɔ nɛɛ he:
-
Te shihilɛi nɛɛ ateŋ nɔ ni ona loo onu he lɛ?
Bɔfo Paulo tsɔɔ sui ni mɛi baajie lɛ kpo yɛ adesai anɔyeli lɛ naagbee gbii lɛ amli. Nyɛkanea 2 Timoteo 3:1-5 lɛ, ni nyɛsusua sanebimɔ nɛɛ he:
-
Te sui nɛɛ ateŋ nɔ ni onaa akɛ mɛi jieɔ lɛ kpo ŋmɛnɛ lɛ?
6. Akɛni Nyɔŋmɔ Maŋtsɛyeli lɛ miiye nɔ hewɔ lɛ, mɛni esa akɛ wɔfee?
Nyɛkanea Mateo 24:3, 14 lɛ, ni nyɛsusua sanebimɔi nɛɛ ahe:
-
Mɛɛ nitsumɔ ni he hiaa hãa wɔnaa akɛ, Nyɔŋmɔ Maŋtsɛyeli lɛ miiye nɔ bianɛ?
-
Te ooofee tɛŋŋ okɛ ohe awo nitsumɔ nɛɛ mli lɛ?
Nyɔŋmɔ Maŋtsɛyeli lɛ miiye nɔ bianɛ, ni etsɛŋ, ebaaye shikpɔŋ muu lɛ fɛɛ nɔ. Nyɛkanea Hebribii 10:24, 25 lɛ, ni nyɛsusua sanebimɔ nɛɛ he:
-
Akɛni ‘wɔmiina akɛ gbi lɛ miibɛŋkɛ nɛɛ,’ mɛni esa akɛ wɔteŋ mɔ fɛɛ mɔ afee?
Kɛ́ oná ole nɔ ko ni baanyɛ awa mɛi, ni ehere amɛyiwala lɛ, mɛni obaafee?
EKOLƐ MƆ KO BAABI BO AKƐ: “Mɛni hewɔ Yehowa Odasefoi wieɔ afi 1914 he waa lɛ?”
-
Mɛni obaakɛɛ lɛ?
EMLI OTI
Biblia mli gbalɛ kɛ je lɛŋ shihilɛ hãa wɔnaa akɛ, Nyɔŋmɔ Maŋtsɛyeli lɛ miiye nɔ bianɛ. Kɛ́ wɔshiɛ sane nɛɛ ni wɔtee asafoŋ kpeei lɛ, no baatsɔɔ akɛ wɔheɔ enɛ wɔyeɔ.
Mɛni Okase?
-
Be ni bei kpawo ni agba yɛ Biblia mli wolo ni ji Daniel lɛ mli lɛ ba naagbee lɛ, mɛni ba?
-
Mɛni hãa oheɔ oyeɔ akɛ Nyɔŋmɔ Maŋtsɛyeli lɛ bɔi nɔyeli yɛ afi 1914 mli?
-
Mɛni kɛ́ ofee lɛ, no baatsɔɔ akɛ oheɔ oyeɔ akɛ Maŋtsɛyeli lɛ miiye nɔ bianɛ?
EHE SAJI KROKOMƐI
Obaana nɔ ni blema saji ahe nilelɔi kɛ mɛi krokomɛi ewie yɛ tsakemɔ ni ba je lɛ mli kɛjɛ afi 1914 kɛbaa lɛ he.
Obaana bɔ ni gbalɛ ni yɔɔ Mateo 24:14 lɛ tsake nuu ko shihilɛ.
Te wɔfeɔ tɛŋŋ wɔleɔ akɛ, gbalɛ ni yɔɔ Daniel yitso 4 lɛ kɔɔ Nyɔŋmɔ Maŋtsɛyeli lɛ he?
“Mɛɛ Be Nyɔŋmɔ Maŋtsɛyeli lɛ Bɔi Nɔyeli? (Fã 1)” (Buu-Mɔɔ, October 1, 2014)
Mɛni tsɔɔ akɛ “bei kpawo” ni atsĩ tã yɛ Daniel yitso 4 lɛ ba naagbee yɛ afi 1914 mli?
“Mɛɛ Be Nyɔŋmɔ Maŋtsɛyeli lɛ Bɔi Nɔyeli? (Fã 2)” (Buu-Mɔɔ, November 1, 2014)
a Kwɛmɔ naagbee saji enyɔ ni yɔɔ nikasemɔ nɛɛ fã ni ji Ehe Saji Krokomɛi lɛ shishi lɛ.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
