YƐ October 28, 2017 lɛ, nɔ ko ni sa kadimɔ waa tee nɔ yɛ Yehowa webii lɛ ateŋ: Ajie Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ kpo yɛ Ga mli.

Amrɔ nɛɛ Ga Jeŋ Hee Shishitsɔɔmɔ lɛ ebafata Bibliai ni mɛi ni sheɔ Nyɔŋmɔ gbeyei lɛ kɛtsu nii be saŋŋ yɛ Ghana lɛ ahe. Mɛni hewɔ ehe bahia ni ana Biblia shishitsɔɔmɔ kroko yɛ Ga mli? Namɛi fee? Ni te ooofee tɛŋŋ oná nɔmimaa akɛ Jeŋ Hee Shishitsɔɔmɔ lɛ ja jogbaŋŋ lɛ?

Nyɛsɛɛ nɛɛ, afee Biblia shishitsɔɔmɔi babaoo. Shishitsɔɔmɔi nɛɛ ekomɛi ehã aná Nyɔŋmɔ Wiemɔ lɛ yɛ wiemɔi ni tsutsu ko lɛ abɛ eko yɛ amɛmli lɛ amli. Shi yɛ wiemɔi ni ayɔɔ Biblia lɛ yɛ amɛmli momo lɛ po amli lɛ, aafee ekrokomɛi yɛ nakai wiemɔi lɛ amli nɔŋŋ kɛmiifata he. Mɛni hewɔ? Wolo ko ni atsɛɔ lɛ So Many Versions? ni Sakae Kubo kɛ Walter Specht ŋma lɛ tsɔɔ mli akɛ: “Biblia shishitsɔɔmɔ ko bɛ ni abaanyɛ akɛɛ yɛ he akɛ, esɛɛ lɛ eko baŋ ni baafe no. Be ni Biblia lɛ he nilee yaa hiɛ ni wiemɔi tsakeɔ lɛ, esa akɛ atsake Bibliai ni yɔɔ lɛ koni ekɛ nilee ni aná lɛ kɛ tsakemɔi ni eba yɛ wiemɔi amli lɛ akpã gbee.”

Nyɛsɛɛ nɛɛ, nilee ni ayɔɔ yɛ Hebri, kɛ Aramaik, kɛ Greek, ni ji wiemɔi ni aŋma Biblia lɛ yɛ mli klɛŋklɛŋ kwraa lɛ he lɛ etee hiɛ. Agbɛnɛ hu, ana Biblia wolokpoi ni etsɛ ni ja fe wolokpoi ni Biblia shishitsɔɔlɔi lɛ kwɛ nɔ kɛtsɔɔ Bibliai ni yɔɔ momo lɛ ashishi lɛ. No hewɔ lɛ, amrɔ nɛɛ abaanyɛ atsɔɔ Nyɔŋmɔ Wiemɔ lɛ shishi jogbaŋŋ fe tsutsu lɛ!

Declan Hayes, ni ji majimaji ateŋ jarayeli he nilelɔ kpanaa lɛ ŋma akɛ, “Daa afi lɛ, Biblia lɛ ji wolo ni ahéɔ fe woji krokomɛi fɛɛ.” Bei komɛi lɛ, akɛni Biblia shishitsɔɔlɔi miitao ni ahé amɛ-Biblia lɛ waa hewɔ lɛ, amɛtsɔɔ shishi eko kɛ eko kɛkɛ. Yɛ Biblia ko mli lɛ, ajie ŋmalɛi komɛi ni Biblia shishitsɔɔlɔi lɛ susuɔ akɛ mɛi nyaŋ ekanemɔ he lɛ kɛje mli. Biblia kroko hu etsake saji komɛi ni amɛsusuɔ akɛ ebaawo Biblia kanelɔi komɛi amlifu lɛ hiɛ. Akɛ nɔkwɛmɔnɔ, akɛni amɛmiitao amɛsa mɛi komɛi ahiɛ hewɔ lɛ, amɛtsɛɔ Nyɔŋmɔ akɛ “Ataa-Naa.”

Ekolɛ nɔ ni ehiii fe fɛɛ ni Biblia shishitsɔɔlɔi komɛi efee lɛ kɔɔ Nyɔŋmɔ gbɛ́i ni ji Yehowa lɛ he. (Biblia he nilelɔi komɛi tsɔɔ Nyɔŋmɔ gbɛ́i lɛ shishi akɛ “Yahweh.”) Yɛ blema Biblia wolokpoi lɛ amli lɛ, akɛ Hebri kɔnsonant YHWH loo JHVH damɔɔ shi kɛhãa Nyɔŋmɔ gbɛ́i lɛ. Gbɛ́i ni yɔɔ srɔto nɛɛ jeɔ kpo aaafee shii 7,000 yɛ nɔ ni mɛi tsɛɔ lɛ Kpaŋmɔ Momo lɛ pɛ mli. (2 Mose 3:​15; Lala 83:18) Belɛ ekã shi faŋŋ akɛ, wɔ-Bɔlɔ lɛ miitao ni mɛi ni jáa lɛ lɛ ale egbɛ́i lɛ ni amɛkɛtsu nii!

Shi afii ohai abɔ ni eho nɛ ni Yudafoi lɛ kpa Nyɔŋmɔ gbɛ́i lɛ tsɛmɔ yɛ hemɔkɛyeli gbonyo ko hewɔ. Sɛɛ mli lɛ, hemɔkɛyeli gbonyo nɛɛ babote Kristojamɔ hu mli. (Bɔfoi 20:29, 30; 1 Timoteo 4:1) Biblia shishitsɔɔlɔi babaoo kɛ gbɛnaa gbɛ́i ni ji “Nuŋtsɔ” lɛ yeɔ Nyɔŋmɔ gbɛ́i lɛ najiaŋ. Ŋmɛnɛ lɛ, ajie Nyɔŋmɔ gbɛ́i lɛ kwraa kɛje Bibliai babaoo amli. Yɛ Yohane 17:6 lɛ, Yesu kɛɛ akɛ: “Mijie ogbɛ́i lɛ shi mitsɔɔ,” shi Blɔfo Bibliai komɛi ni afee nyɛsɛɛ nɛɛ ejie wiemɔ ni ji “ogbɛ́i” lɛ kɛje ŋmalɛ nɛɛ mli. Biblia ko ni atsɛɔ lɛ Good News Translation lɛ tsɔɔ ŋmalɛ nɛɛ shishi akɛ: “Mihã ale bo.”

Mɛni hewɔ Biblia shishitsɔɔlɔi nɛɛ sumɔɔɔ ni amɛkɛ Nyɔŋmɔ gbɛ́i lɛ tsuɔ nii lɛ? Susumɔ saji komɛi ni awie yɛ wolo ko ni atsɛɔ lɛ Practical Papers for the Bible Translator lɛ mli lɛ he okwɛ. Mɛi ni fee wolo nɛɛ ji United Bible Societies (UBS) ni ji mɛi ni kwɛɔ Biblia shishitsɔɔmɔ ni yaa nɔ yɛ jeŋ fɛɛ lɛ ateŋ babaoo anɔ lɛ. Sane lɛ eko kɛɛ akɛ: “Akɛni ekã shi faŋŋ akɛ YHWH ji gbɛ́i diɛŋtsɛ hewɔ lɛ, kulɛ nɔ ni sa jogbaŋŋ ni esa akɛ afee ji ni atsɔɔ shishi akɛ, YHWH.” Shi sane lɛ bɔ kɔkɔ akɛ: “Shi dani abaafee nakai lɛ, esa akɛ asusu anɔkwa saji komɛi ahe dã.”

Ani saji ni akɛɛ amɛji “anɔkwa saji” lɛ yɛ mli nakai? Aŋma yɛ nakai wolo lɛ mli akɛ, Biblia he nilelɔi komɛi kɛɔ akɛ: “Kɛ́ wɔkɛ gbɛ́i ni ji Yahweh lɛ tsu nii lɛ ebaahã mɛi aná susumɔ ni ejaaa . . . , amɛbaasusu akɛ ‘Yahweh’ ji maŋ ko nɔ bii a-Nyɔŋmɔ, loo Nyɔŋmɔ hee ko ni aleee ni esoro lɛ yɛ Nyɔŋmɔ ni amɛle lɛ momo lɛ he.” Shi Biblia lɛ feɔ lɛ faŋŋ akɛ, esoro Yehowa Nyɔŋmɔ yɛ nyɔŋmɔi ni mɛi ni jeee Kristofoi lɛ jáa lɛ ahe!​—Yesaia 43:10-​12; 44:​8, 9.

Biblia he nilelɔi komɛi kɛɔ akɛ kɛ́ amɛkɛ gbɛnaa gbɛ́i ni ji “Nuŋtsɔ” lɛ ye Nyɔŋmɔ gbɛ́i lɛ najiaŋ lɛ, amɛfeko nɔ ko hee, shi moŋ lɛ, amɛmiitsa blema kpãa nɔ. Shi Yesu kɛɛ esaaa akɛ wɔnyiɛɔ kusumii ni wooo Nyɔŋmɔ hiɛ nyam lɛ asɛɛ. (Mateo 15:6) Agbɛnɛ hu, nɔ ko nɔ ko bɛ Ŋmalɛ lɛ mli ni tsɔɔ akɛ abaanyɛ akɛ gbɛnaa gbɛ́i aye gbɛ́i diɛŋtsɛ najiaŋ. Yesu Kristo yɛ gbɛnaa gbɛ́i babaoo, ekomɛi ji “Nyɔŋmɔ Wiemɔ Lɛ” kɛ “maŋtsɛmɛi a-Maŋtsɛ.” (Kpojiemɔ 19:11-​16) Ani esa akɛ, akɛ gbɛnaa gbɛ́i nɛɛ eko aye gbɛ́i ni ji Yesu lɛ najiaŋ?

Aŋma yɛ sane kroko ni je kpo yɛ nakai wolo lɛ nɔŋŋ mli akɛ: “Esaaa akɛ akɛ gbɛ́i ni ji ‘Yehowa’ lɛ tsuɔ nii.” Mɛni hewɔ? “Biblia he nilelɔi babaoo heɔ amɛyeɔ akɛ gbɛ́i ni ji ‘Yahweh’ lɛ ja jogbaŋŋ fe gbɛ́i krokomɛi ni akɛtsuɔ nii lɛ.” Shi Biblia mli gbɛ́i ni ale waa tamɔ Yesaia, Yeremia, kɛ Yesu lɛ tamɔɔɔ bɔ ni atsɛ amɛ yɛ Hebri mli lɛ kwraa (Yeshaʽ·yaʹhu, Yir·meyahʹ, and Yehoh·shuʹaʽ). Akɛni gbɛ́i ni ji “Yehowa” lɛ ji bɔ ni mɛi ekpɛlɛ nɔ akɛ atsɔɔ Nyɔŋmɔ gbɛ́i lɛ shishi, ni no ji nɔ ni akɛtsu nii yɛ Blɔfo kɛ wiemɔi krokomɛi amli afii ohai abɔ hewɔ lɛ, ejaaa akɛ abaawie ashi. Anɔkwa, jeee Biblia he nilee ko ni aná hewɔ mɛi komɛi sumɔɔɔ ni amɛkɛ Nyɔŋmɔ gbɛ́i lɛ tsuɔ nii lɛ, shi moŋ bɔ ni amɛnuɔ he amɛhãa, kɛ mɛi ni kɛ Nyɔŋmɔ gbɛ́i lɛ tsuɔ nii lɛ ahe jwɛŋmɔ ni ejaaa ni amɛyɔɔ lɛ hewɔ ni.

Shi sane nɛɛ jeee sane ni abaanyɛ ataa naa bɔ ni asumɔɔ yɛ nilelɔi ateŋ kɛkɛ. Akɛ nɔkwɛmɔnɔ lɛ, mɔ ko ni woɔ UBS ŋaa ni yɔɔ India lɛ tsɔɔ nɔ hewɔ ni esaaa akɛ abaajie Nyɔŋmɔ gbɛ́i lɛ yɛ Bibliai ni tsutsu ko lɛ akɛ gbɛ́i lɛ tsu nii yɛ amɛmli lɛ amli. Ekɛɛ akɛ: “Jeee Nyɔŋmɔ gbɛnaa gbɛ́i ji nɔ ni Hindubii lɛ taoɔ amɛle; amɛmiitao amɛle Nyɔŋmɔ gbɛ́i diɛŋtsɛ, ni kɛ́ amɛleee gbɛ́i lɛ diɛŋtsɛ lɛ, amɛnyɛŋ amɛkɛ lɛ ashara.” Lɛɛlɛŋ, nakai nɔŋŋ eji yɛ mɛi fɛɛ ni taoɔ Nyɔŋmɔ sɛɛ gbɛ lɛ ahe. Ehe miihia ni wɔle Nyɔŋmɔ gbɛ́i diɛŋtsɛ dani wɔbaanyɛ wɔle lɛ jogbaŋŋ akɛ mɔ ko ni yɔɔ diɛŋtsɛ ni wɔbaanyɛ wɔkɛ lɛ abɔ, shi jeee akɛ hewalɛ ko kɛkɛ. (2 Mose 34:​6, 7) No hewɔ lɛ, Biblia lɛ kɛɔ akɛ: “Mɔ fɛɛ mɔ ni boɔ tsɛɔ Yehowa gbɛ́i lɛ, abaahere eyiwala.” (Romabii 10:13) Esa akɛ mɛi ni jáa Nyɔŋmɔ lɛ kɛ egbɛ́i lɛ atsu nii!

No hewɔ lɛ, be ni ajie Kristofoi A-Greek Ŋmalɛ Lɛ​—Jeŋ Hee Shishitsɔɔɔmɔ lɛ kpo klɛŋklɛŋ kwraa yɛ Blɔfo mli yɛ afi 1950 lɛ, no mli lɛ, eji nɔ ko ni nɔ bɛ kwraa. Yɛ afii nyɔŋma ni nyiɛ sɛɛ kɛba lɛ amli lɛ, ajie Hebri Ŋmalɛ lɛ loo nɔ ni mɛi tsɛɔ lɛ Kpaŋmɔ Momo lɛ kpo fiofio. Yɛ afi 1961 lɛ, ajie Biblia muu lɛ fɛɛ kpo yɛ Blɔfo mli. Nɔ ni sa kadimɔ ji akɛ, yɛ Jeŋ Hee Shishitsɔɔmɔ lɛ mli lɛ, atsɔɔ Nyɔŋmɔ gbɛ́i lɛ shishi akɛ Yehowa yɛ hei aaafee 7,000 ni ejeɔ kpo yɛ Kpaŋmɔ Momo lɛ mli lɛ. Ni nɔ ni sa kadimɔ waa ji akɛ, akɛ Nyɔŋmɔ gbɛ́i lɛ tsu nii shii 237 yɛ Kristofoi A-Greek Ŋmalɛ lɛ loo nɔ ni mɛi tsɛɔ lɛ Kpaŋmɔ Hee lɛ mli.

Jeee Nyɔŋmɔ hiɛ nyam kɛkɛ Nyɔŋmɔ gbɛ́i lɛ ni akɛtsu nii yɛ Biblia lɛ mli lɛ woɔ, shi moŋ lɛ, ehãa anuɔ Biblia lɛ shishi jogbaŋŋ hu. Akɛ nɔkwɛmɔnɔ lɛ, yɛ Bibliai babaoo amli lɛ, atsɔɔ Mateo 22:44 lɛ shishi akɛ: “Nuŋtsɔ lɛ kɛɛ mi-Nuŋtsɔ lɛ akɛ.” Shi namɔ kɛ namɔ wieɔ yɛ ŋmalɛ nɛɛ mli lɛ? Yɛ Jeŋ Hee Shishitsɔɔmɔ lɛ mli lɛ atsɔɔ Mateo 22:44 lɛ shishi akɛ: “Yehowa kɛɛ mi-Nuŋtsɔ lɛ akɛ,” tamɔ bɔ ni eji pɛpɛɛpɛ yɛ Lala 110:1 lɛ ni ji ŋmalɛ ni atsɛ sane nɛɛ yisɛɛ kɛjɛ mli lɛ. Enɛ baahã mɛi ni baakane lɛ ana srɔto ni yɔɔ Yehowa Nyɔŋmɔ kɛ e-Bi lɛ teŋ.

Watch Tower Bible and Tract Society, ni ji mla naa nitsumɔ kuu ni Yehowa Odasefoi kɛtsuɔ nii lɛ ji mɛi ni fee Jeŋ Hee Shishitsɔɔmɔ lɛ. Yehowa Odasefoi kɛ nɔ ni fe afii oha ekala Bibliai ni amɛja yɛ jeŋ fɛɛ. Kristofoi akuu fioo ko ni atsɛɔ amɛ Jeŋ Hee Biblia Shishitsɔɔmɔ Ajinafoi ji mɛi ni fee Jeŋ Hee Shishitsɔɔmɔ lɛ amɛhã Yehowa Odasefoi. Akɛni ajinafoi nɛɛ taooo hiɛnyam amɛhãaa amɛhe hewɔ lɛ, amɛbi ni akahã ale amɛ gbɛ́i kɛyashi amɛbaagboi, ni yɛ amɛgbele sɛɛ po lɛ akahã ale amɛ gbɛ́i.​—1 Korintobii 10:31.

Mɛni hewɔ atsɛɔ Biblia nɛɛ akɛ Jeŋ Hee Shishitsɔɔmɔ lɛ? Biblia ni ajie lɛ kpo yɛ afi 1950 lɛ hiɛkpamɔ lɛ tsɔɔ mli akɛ wɔyɛ nɔmimaa waa akɛ “eshwɛ fioo” ni adesai anine baashɛ “jeŋ hee” ni awo he shi yɛ 2 Petro 3:​13 lɛ nɔ. No hewɔ lɛ, ajinafoi lɛ ŋma akɛ, “kɛjɛ he ni wɔshɛ yɛ jeŋ momo nɛɛ mli kɛyashi jalɛ jeŋ hee lɛ baaba” lɛ, ehe miihia ni Biblia shishitsɔɔlɔi ahã “Nyɔŋmɔ Wiemɔ lɛ mli anɔkwale krɔŋŋ lɛ” akpɛ ahã mɛi.

Oti titri ni mɛi ni tsɔɔ Biblia nɛɛ shishi lɛ kɛma amɛhiɛ ji ni amɛhã shishinumɔ ni yɔɔ wiemɔi lɛ asɛɛ lɛ aje kpo faŋŋ. Mɛi ni tsɔɔ Blɔfo nɔ lɛ shishi lɛ tsɔɔ shishi kɛjɛ Hebri, kɛ Aramaik, kɛ Greek ni ji wiemɔi ni aŋma Ŋmalɛ lɛ yɛ mli klɛŋklɛŋ kwraa lɛ mli, ni amɛkwɛ ŋmalɛi ni yɔɔ wiemɔi nɛɛ amli lɛ ateŋ nɔ ni ja fe fɛɛ lɛ anɔ kɛfee nakai. * Amɛkwɛ jogbaŋŋ ni amɛtsɔɔ blema wiemɔi nɛɛ ashishi bɔ ni eji lɛ pɛpɛɛpɛ​—shi amɛkɛ wiemɔi ni mɛi ni baakane lɛ kɛtsuɔ nii tsɔɔ shishi koni kɛ́ amɛkane lɛ amɛnu shishi oya.

Ebɛ naakpɛɛ mɔ akɛ, Biblia he nilelɔi komɛi ewie Jeŋ Hee Shishitsɔɔmɔ lɛ he akɛ atsɔɔ shishi jogbaŋŋ ni akɛ nɔ ko ni bɛ Ŋmalɛ lɛ mli wooo mli. Yɛ afi 1989 lɛ, tsɔɔlɔ kpanaa ko ni atsɛɔ lɛ Benjamin Kedar ni eji Hebri wiemɔ lɛ he nilelɔ ni eyɔɔ Israel lɛ kɛɛ akɛ: “Kɛ́ miitao nii amli yɛ bɔ ni atsɔɔ Hebri Ŋmalɛ lɛ shishi ahã yɛ wiemɔi krokomɛi amli lɛ he lɛ, bei pii lɛ mikwɛɔ Blɔfo Biblia ni atsɛɔ lɛ Jeŋ Hee Shishitsɔɔmɔ lɛ mli. Be fɛɛ be ni mafee nakai lɛ, minaa akɛ mɛi ni fee Biblia nɛɛ bɔ mɔdɛŋ waa koni amɛtsɔɔ shishi jogbaŋŋ bɔ ni shishinumɔ ni yɔɔ wiemɔi lɛ asɛɛ lɛ baaje kpo faŋŋ.”

No hewɔ lɛ, ehi jogbaŋŋ akɛ Yehowa Odasefoi efee Jeŋ Hee Shishitsɔɔmɔ lɛ yɛ wiemɔi krokomɛi hu amli. Amrɔ nɛɛ afee Jeŋ Hee Shishitsɔɔmɔ Biblia muu lɛ fɛɛ loo efã ko yɛ wiemɔi ni fa fe 150 mli. Bɔ ni afee ni enɛ aya nɔ jogbaŋŋ lɛ, ato gbɛjianɔ ko ni baahã atsɔ kɔmpiuta ni akɛ Biblia mli wiemɔi ni ato amɛhe gbɛjianɔ jogbaŋŋ ewo nɔ lɛ nɔ atsɔɔ Biblia lɛ shishi. Ato nitsumɔhe ko ni atsɛɔ lɛ Translation Services shishi koni amɛye amɛbua mɛi ni tsɔɔ Biblia lɛ shishi lɛ. Yehowa Odasefoi lɛ Agbɛtsɔɔmɔ Kuu lɛ tsɔɔ eniŋmaa ajinafoi lɛ nɔ ekwɛɔ Biblia shishitsɔɔmɔ nitsumɔ lɛ nɔ. Shi te afeɔ tɛŋŋ atsɔɔ Biblia lɛ shishi yɛ wiemɔi krokomɛi lɛ amli?

Klɛŋklɛŋ lɛ, ahalaa Yehowa Odasefoi komɛi akɛ wiemɔ shishitsɔɔmɔ kuu. Akpa shi ana akɛ kɛ́ wiemɔi shishitsɔɔlɔi tsu nii akɛ kuu lɛ amɛtsɔɔ wiemɔi lɛ shishi jogbaŋŋ bɔ ni mɔ fɛɛ mɔ baana he sɛɛ fe nɔ ni abaahã amɛtsɔɔ shishi aŋkro aŋkro. (Abɛi 11:14) Bei pii lɛ, mɛi ni ahalaa lɛ ji mɛi ni kɛ afii saŋŋ etsɔɔ Yehowa Odasefoi awoji ashishi. No sɛɛ lɛ, atsɔɔ amɛ otii komɛi ni he hiaa ni esa akɛ amɛle yɛ Biblia shishitsɔɔmɔ mli, ni agbɛnɛ hu atsɔɔ amɛ bɔ ni amɛkɛ kɔmpiuta program srɔtoi ni afee kɛhã Biblia shishitsɔɔmɔ lɛ baatsu nii.

Atsɔɔ Biblia shishitsɔɔmɔ kuu lɛ bɔ ni amɛbaatsɔɔ Biblia lɛ shishi yɛ gbɛ ni ja nɔ, kɛ agbɛnɛ hu bɔ ni kɛ́ mɔ fɛɛ mɔ kane lɛ ebaanu shishi oya. Kɛ́ ashɛ hei komɛi ni ana akɛ abaanyɛ atsɔɔ shishi pɛpɛɛpɛ tamɔ bɔ ni eyɔɔ yɛ wiemɔi ni aŋma Biblia lɛ yɛ mli lɛ amli lɛ, afeɔ nakai, shi akwɛɔ jogbaŋŋ koni shishinumɔ ni yɔɔ sɛɛ lɛ akalaaje. Te afeɔ enɛ ahãa tɛŋŋ? Hã wɔkɛ Ga Jeŋ Hee Shishitsɔɔmɔ Biblia lɛ afee he nɔkwɛmɔnɔ. Klɛŋklɛŋ lɛ, Biblia shishitsɔɔlɔi lɛ tsɔɔ Biblia mli wiemɔi titrii ni yɔɔ Blɔfo nɔ lɛ mli lɛ ekomekomei ashishi kɛbaa Ga mli. Kɔmpiuta program ni ji Watchtower Translation System lɛ buaa Biblia mli wiemɔi ni wieɔ sane oti kome too lɛ he loo wiemɔi ni hiɛ shishinumɔ kome lɛ anaa koni shishitsɔɔlɔi lɛ atsɔɔ shishi. Agbɛnɛ hu lɛ, program nɛɛ hãa Biblia shishitsɔɔlɔi lɛ naa Greek loo Hebri wiemɔi ni akwɛ nɔ atsɔɔ Blɔfo wiemɔi lɛ ashishi lɛ koni Biblia shishitsɔɔlɔi lɛ ana bɔ ni atsɔɔ nakai Greek loo Hebri wiemɔi lɛ ashishi yɛ Blɔfo mli yɛ ŋmalɛi krokomɛi amli. Enɛ yeɔ ebuaa amɛ ni amɛnaa Ga wiemɔ ni sa kɛhã Blɔfo wiemɔ fɛɛ wiemɔ. Kɛ́ Biblia shishitsɔɔlɔi lɛ na Ga wiemɔi ni sa lɛ fɛɛ lɛ, amɛjeɔ Biblia lɛ shishitsɔɔmɔ shishi, ni kɛ́ amɛshɛ ŋmalɛ mli kuku ko nɔ lɛ, kɔmpiuta program lɛ hãa amɛnaa Ga wiemɔi ni amɛhala kɛhã wiemɔi ni yɔɔ nakai kuku lɛ mli lɛ.

Shi enɛ etsɔɔɔ akɛ Biblia shishitsɔɔlɔi lɛ kɛ Ga wiemɔi lɛ yeɔ Blɔfo wiemɔi lɛ anajiaŋ kɛkɛ. Amɛbɔɔ mɔdɛŋ waa koni Ga wiemɔi ni amɛkɛbaatsu nii lɛ ajie shishinumɔ ni ja ni yɔɔ ŋmalɛ mli kuku fɛɛ kuku sɛɛ lɛ kpo jogbaŋŋ. Amɛkwɛɔ jogbaŋŋ koni amɛto wiemɔi lɛ yɛ bɔ ni awieɔ Ga lɛ naa koni eŋɔɔ toi hu naa kɛ́ aakane. Kɛ́ okane Ga Biblia nɛɛ, bo diɛŋtsɛ obaana nɔ ni wɔwieɔ lɛ. Atsɔɔ Ga Jeŋ Hee Shishitsɔɔmɔ lɛ shishi bɔ ni baahã mɛi aná Nyɔŋmɔ Wiemɔ lɛ kanemɔ he miishɛɛ, ni akɛ wiemɔi ni shishinumɔ waaa ni mli kã shi faŋŋ tsu nii. Agbɛnɛ hu, akwɛ jogbaŋŋ ni atsɔɔ shishi ni ekɛ blema nɔ ni aŋma lɛ anyiɛ pɛpɛɛpɛ. *

Wɔmiiwo bo hewalɛ ni bo diɛŋtsɛ okane Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ. Obaanyɛ oná eko yɛ mɛi ni fee magazin ni okaneɔ nɛɛ adɛŋ loo kɛjɛ Yehowa Odasefoi asafo ni yɔɔ he ni oyɔɔ lɛ adɛŋ. Kɛ́ ookane lɛ, obaanyɛ oná nɔmimaa akɛ eji Nyɔŋmɔ wiemɔi ni atsɔɔ shishi jogbaŋŋ yɛ bo diɛŋtsɛ owiemɔ mli. Ŋwanejee ko bɛ he akɛ, etsɛŋ ni obaana akɛ Ga Biblia nɛɛ ni ajie lɛ kpo lɛ ji nɔ ko ni nɔ bɛ ni akɛdro Yehowa webii lɛɛlɛŋ!