LÉSON 3
Ès sa vré ki Labib-a ka vini di Bondjé ?
1. Labib-a ka vini di kimoun ?
Moun-yan ké viv asou latè-a pou tout-tan : a annan Labib-a nou ka jwenn sa bon nouvèl-a (Psaume 37:29). Annan Labib-a i gen 66 liv. Bondjé fè apéprè 40 wonm plen ké lafwa ékri sa liv-ya. Senk prémyé liv-ya, a Moyiz ki ékri yé i gen apéprè 3 500 lannen. Dèrnyé liv-a, a apot Jan ki ékri l’ sa ka fè plis ki 1 900 lannen. Ès wonm-yan Bondjé itilizé ékri yépa lidé ? Non, a lidé Bondjé yé ékri. Gras a so lèspri sen, Bondjé fè yé konprann sa i té lé (2 Samuel 23:2). Atò, Labib-a ka vini di Jéova. — Li 2 Timothée 3:16 ; 2 Pierre 1:20, 21.
Gadé vidéyo Di kimoun Labib-a ka vini ?
2. Kouman nou pouvé sir ki Labib-a ka vini di Bondjé ?
Nou savé ki Labib-a ka vini di Bondjé paské i ka di èkzaktéman sa ki ké fèt dimen, é i pa ka tronpé. I pa gen pyès moun ki pouvé fè sa (Josué 23:14). A Bondjé Tou-Pwisan-an rounso ki pouvé prévwè èkzaktéman avénir sé moun-yan. — Li Isaïe 42:9 ; 46:10.
Roun liv ki ka vini di Bondjé pa pouvé kou sé ròt liv-ya. É Labib-a pa kou sé ròt liv-ya : I gen Labib annan santèn lang, é milyar labib ja enprimé. Labib-a sa roun liv ki ékri dépi lontan mé lò i ka palé di lasyans sa i ka di toujou vré. Wonm-yan ki ékri Labib-a pa kontrédi yé konpanyen *. Mésaj lanmou ki annan Labib-a pouvé vini di vré Bondjé-a rounso, Bondjé-a ki plen ké lanmou. É jòdla ankò i pouvé randé lavi sé moun-yan miyò. A pou sa, milyon moun sir ki Labib-a sa Paròl Bondjé-a. — Li 1 Thessaloniciens 2:13.
Ké tan ki pasé, ès yé pa chanjé sèrten bagaj annan Labib-a ? Sé liv Labib ki ékri dépi plis ki 2 000 lannen ka montré ki yé pa chanjé anyen annan sa liv-ya ki ka vini di Bondjé (Isaïe 40:8). Bondjé pa pèrmèt yé chanjé pyès bagaj annan so Paròl. — Li Psaume 12:6, 7 ; 1 Pierre 1:24, 25.
Gadé vidéyo Kouman nou pouvé sèrten ki Labib-a ka vini di Bondjé ?
3. Di kisa Labib-a ka palé ?
Labib-a ka palé bokou di sa bon nouvèl-a : Bondjé gen roun projè plen ké lanmou pou nou.I ka èspliké ki nou pédi posibilité viv annan paradi-a byen vit. Mé i ka èspliké ki roun jou, nou ké viv annan roun paradi asou latè-a. — Li Révélation 21:4, 5.
Annan Labib-a i gen lalwa, prensip ké konsèy. I gen osi istwè ki ka montré kouman Bondjé ka aji ké sé moun-yan. Gras a sa istwè-ya nou pouvé dékouvri pèrsonalité Bondjé. Labib-a pouvé édé ou konnèt Bondjé. I ka èspliké kouman ou pouvé divini so zanmi. — Li Psaume 19:7, 11 ; Jacques 2:23 ; 4:8.
4. Kisa ki pouvé édé ou konprann Labib-a ?
Sa brochir-a ké édé ou konprann Labib-a paské i ka swiv fason Jézi té ka ansényé. Jézi té ka sité sé Èkritir-ya épi i té ka èspliké yé. — Li Luc 24:27, 45.
Sé bon nouvèl-ya ki ka vini di Bondjé bèl toubonnman ! Pourtan i gen roun ran moun ki pa mélé ké sa. Èpi rounòt ran pa lé tandé palé di sa nouvèl-ya menm. Mé pa dékourajé. A sèlman si ou ka anprann konnèt Bondjé ki ou pouvé èspéré viv pou tout-tan. — Li Jean 17:3.
^ § 3 Gadé brochir Un livre pour tous.
