1 Tamuera 2:1-36
2 E tataro ngkanne Anna ni kangai:
“E kimwareirei nanou iroun Iehova,+E karietataaki korou* iroun Iehova,E kauremangangaeaki wiu n ekiianako akana kairiribai nakoiu,Bwa I kimwareirei n am mwakuri ni kakamaiu.
2 Akea temanna ae tabu n aron Iehova,Akea riki temanna bwa tii ngkoe,+Ao akea te bwaa ae ai aron Atuara.+
3 Tai teimatoa n taetae ma te kainikatonga,Tai kariaia bwa e na nako te kamoamoa mai wim,Bwa Iehova bon te Atua ae nibwan te atatai,+Ao a neneraki n te aro ae eti taiani mwakuri irouna.
4 A uruaki aia kainikatebe mwaane aika korakora,Ma a kakorakoraaki te koraki ake a bwaka.+
5 A na anga ngaiia te koraki aika nuai bwa a na mwakuri ni kabooaki n te amwarake,Ma a nang aki manga baki akana baki.+
E bungia natina aika itiman te aine ae kanoabo,+Ma e a kamaroaeaki* neiere a bati natina.
6 E kamamate Iehova ao e kateimatoa te maiu,*E karuoa rikaaki te aba nakon te Ruanimate,* ao e kateirakea te aba.+
7 E karekea te maiu ni kainnano Iehova ao e karekea te kaubwai.+
E karinanoa te aba ao e karietataa te aba.+
8 E kateirakea ane e mangori man te tano,E tabekaarake ane e maiu ni kainnano man te bwariko ni mannang,*+Bwa e na katekatekaia ma natinuea aika mwaane,Ao n angania te kaintekateka ae mena iai te karineaki.
Bon ana bwai Iehova bouan nako te aonnaba,+Ao e katokaa te aba ae maiureirei i aoia.
9 E tararuai nakonakoia ana aomata aika kakaonimaki ni koaua,+Ma a na aki kakarongoa n te rotongitong akana buakaka+,Bwa e aki tokanikai te aomata ni korakorana+.
10 E na kamaenakoia Iehova te koraki akana un ni kaitaraa,*+Ngkana e kaota unna nakoia ao e na rebwe te baa i karawa.+
E na motikitaeka Iehova nako tabon nako aonnaba,+E na anga te mwaaka nakon te uea ae e rineia,+Ao ni karietataa koron* ana aomata ae kabiraki.”+
11 Ao e a nako Erekana nakoni batana i Rama, ma e a riki te teei arei bwa ana tabonibai* Iehova+ i matan Eeri are te ibonga.*
12 Boni mwaane aika buakaka natin Eeri,+ ao a aki mutiakina Iehova.
13 Aio te bwai ae a kakaraoia ma tibwangaia ibonga are reke mairouia aomata:+ Ngkana iai te mwaane ae anga te karea teuana, ao e a roko naba ana tia mwakuri te ibonga ma te kainiwaiteke i baina ae bubura ae tennai wina ngkana e a kaburoaki te irikomaiu,
14 ao e ewaria nako nanon te bwaata ni kuuka teuana. Ane e reke n te kainiwaiteke, ao ai ngaia naba anne ae e anaia te ibonga ibukina. Anne te bwai ae a kakaraoia i Tiro nakoia tibun Iteraera ni kabane ake a roko ikekei.
15 Ao imwain naba ae e kabueka te mwaete ni kabubua teuare angakarea,+ e na bae n roko ana tia mwakuri te ibonga ao ni kangai nakoina: “Ko na angan te ibonga te irikomaiu bwa e na umunaki. E na aki anaa mairoum te irikomaiu ae kaburoaki, ma tii ae oraora.”
16 Ao ngkana e kangai teuarei nakoina: “Ke a kabueka moa raoi mwaetena ni kabubua,+ ao imwina ko a anaa ane ko tangiria,” ao e na kangai: “Tiaki ngaia anne, ma anganai naba ngkai, ao ngkana ko aki, ao N na anaia ma te matoa!”
17 Mangaia are e a rangi ni korakora i matan Iehova aia bure taani mwakuri,+ bwa a bwainnataea te karea nakon Iehova mwaane aikai.
18 Ao e a bebeku Tamuera+ i matan Iehova e ngae ngke bon te teei ngaia, ao e kunnikainna* n te ebota+ ae te rinen.
19 Ao tinana e kakaraoa ana kunnikai* ae uarereke, ao e ninikiria irouna n te ririki teuana ma teuana ngkana e roko ma buuna n anga te karea ni katoa ririki.+
20 Ao Eeri e kakabwaiaa Erekana ma buuna ao e taku: “Ke e anganiko Iehova natim mairouni buum aei bwa oneani mwin are e anga nakon Iehova.”+ Ao a a okira mwengaia.
21 Ao Iehova e mutiakina Anna n te aro are e a kona ni bikoukou,+ ao e a manga bungia riki natina mwaane aika teniman ao aine aika uoman. Ao e teimatoa n ikawairake te teei ae Tamuera i matan Iehova.+
22 Ao e a rangi ni kara Eeri, ma e a tia n ongo bwaai ni kabane ake a kakaraoi natina+ nakoia tibun Iteraera ni kabane, ma aroia ni wewene ni bure ma aine ake a bebeku i rarikini mataroan te umwa ni botaki.+
23 Ao e aki toki ni kangai nakoia: “E aera ngkai kam a kakaraoi bwaai aika ai aron aikai? Bwa a bubuaka taekami aika I ongo mairouia aomata ni kabane.
24 Katoka aromi anne natiu, bwa e aki raoiroi te rongorongo ae I ongo ae e a butanako i buakoia ana aomata Iehova.
25 Ngkana e bure te aomata nakon te aomata temanna, ao e kona temanna ni bubutii nakon Iehova ibukin te aomata anne,* ma ngkana e bure te aomata nakon Iehova,+ ao antai ae kona n tataro ibukina?” Ma a rawa ni kan ongo iroun tamaia, bwa e a tia ni motikia Iehova bwa e na kamateia.+
26 Ao e teimatoa n ikawairake te teei ae Tamuera ao e akoaki iroun Iehova ao irouia aomata.+
27 Ao e roko iroun Eeri te aomata ae kamwanangaaki iroun te Atua, ao e taku nakoina: “E kangai ana taeka Iehova: ‘Tiaki I kaotai raoi nakoia kaaini batan tamam ngke a mena i Aikubita bwa tooro irouia kaaini batani Barao?+
28 Ao a rineaki mai buakon aia baronga nako tibun Iteraera+ bwa a na beku bwa au ibonga, ao ni waerake nakon au baonikarea+ bwa a na angakarea, a na anga taiani karea aika boiarara,* ao a na bwainia n te ebota i matau. Ao I anga nakoia kaaini batan am bakatibu aia karea ni kabane tibun Iteraera, aika karea aika kareanaki n te ai.+
29 Kam aera ngkai kam bwainnataea* au karea ngkami aika aomata ma au angakarea are I a tia n tua n au tabo ni maeka?+ E aera ngkai ko teimatoa ni karineia riki natim nakoiu, ni kamarikaingkami n tibwanga aika taiani kabanea n raoiroi man aia karea nako au aomata aika tibun Iteraera?+
30 “‘Anne bukina ae e kangai iai ana taeka Iehova ae Atuan Iteraera: “I bon taekinna ngkoa bwa a na teimatoa n nakonako i matau kaaini batam ma kaaini batan am bakatibu.”+ Ma e a kangai ngkai ana taeka Iehova: “I a bon aki kona n iangoa aei, ibukina bwa N na karineia te koraki aika karineai,+ ma a na kabuakakaaki te koraki aika kakeaa bongau.”
31 Noria! A nang roko boong ake N nang koreaanako iai korakoram* ao korakoraia kaaini batan tamam, n te aro are ai akea te mwaane n am auti ae e na maiu ni karokoa ae e a kara.+
32 Ao ko na taraa te tia kairiribai* ae mena n au maeka, i buakoni bwaai ni kabane aika raraoi aika karaoaki nakoia tibun Iteraera,+ ao e na aki manga noraki ae e a kara ni batam.
33 E na kamamaarai matam ao ni karawawatako am aomata are I aki kabwakaa man te beku n au baonikarea, ma a na rangi ni bati riki kaaini batam aika a na mate n aia kabaang aomata.+
34 Ao e na riki bwa te kanikina nakoim te bwai ae e na riki nakoia natim ake uoman ake Obeni ma Bineati: A na kaai ni mate n tebongina.+
35 Ao N na kateirakea au ibonga temanna ae kakaonimaki.+ E na mwakuri n te aro ae boraoi ma ae e tangiria nanou, ao N na katea batana* ae teimatoa, ao e na nakonako n taai nako i matan teuare au kabiraki.
36 E na roko te aomata ae nikiraia kaaini batam ao e na bobaraaki nakon te ibonga anne ibukini karekean te mwane ao te mwakoro ni kariki, ao e na kangai: “Taiaoka mwiokoai nakon te mwakuri n ibonga teuana bwa e aonga n reke kanau.”’”+
Taiani Kabwarabwara Mai Nano
^ Ke, “korakorau.” Nora Nanon Taeka.
^ Ebera, “e a rai.”
^ Ke, “manga kamaiua te aba.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Ke tao, “te tabo ni maange.”
^ Ke tao, “A na maakunrang te koraki akana kaitaraa Iehova.”
^ Ke, “korakoran.” Nora Nanon Taeka.
^ Ke, “te tia beku iroun.”
^ Nora Nanon Taeka.
^ Ebera, “kabaea nukana.”
^ Ke, “ana kooti ae akea baina.”
^ Ke tao, “e na boni karaoa te babaire te Atua ibukin te aomata anne.”
^ Ke tao, “ni kabubuaarake bubun te karea.”
^ Ebera, “butiboorea.”
^ Ebera, “anganibaim.”
^ Tao e kaineti nakoni kabuanibwai n taai aika a na roko.
^ “Batana” ae taekan te rinan n ibonga.
