Itaia 7:1-25
7 Ao n ana bong Aati+ are natin Iotam are natin Utia, are uean Iuta, ao a waerake bwa a na buakana Ierutarem Retin are Uean Turia ao Bika+ are natin Remaria are uean Iteraera, ma e* aki kona n taua.+
2 Ao a kaongoaki kaaini batan Tawita te rongorongo ae kangai: “E a tia Turia n ikotiia ana taanga ni buaka ma Eberaim.”
Ao e a moanna n ruru nanon Aati ma nanoia ana aomata, n aron aroka ake n te buakonikai ngkana a mwaeiei n te ang.
3 Ao e taku Iehova nakon Itaia: “Otinako taiaoka bwa ko na kawara Aati, ngkoe ma natim are Teaiatuba,*+ n tokini kawain te ran man te karaanga are mai eta,+ i rarikin te kawai ae totouaki nakon ana tawaana te tia kaitiakii kunnikai.
4 Ko riai ni kangai nakoina, ‘Taratara raoi bwa ko na rau. Tai maaku ao e na tai bwara nanom ibukia naaka uoman aikai aika ai aroni botoni kaai aika bubu, ao ibukin uraraken unin Retin ao Turia ao natin Remaria.+
5 Bwa e babaire Turia ma Eberaim ao natin Remaria bwa a na kaikoakiko, ao a kangai:
6 “Ti na waerake n ekaanako Iuta ao n raeuaia* ao ni kataea ana kai* i bon ibukira, ao ti na rinea natin Tabeera bwa te uea iai.”+
7 “‘E kangai ana taeka te Uea ae Moan te Rietata ae Iehova:
“E na aki nakoraoi,Ao e na aki naba riki anne.
8 Bwa atun Turia bon Tamateko,Ao atun Tamateko bon Retin.
E na kamaeinikunaki raoi Eberaim ao e na aki manga riki bwa te botannaomata,Tii i nanon 65 te ririki.+
9 Atun Eberaim bon Tamaria,+Ao atun Tamaria bon natin Remaria.+
Ngkana akea ami onimaki ae nene,Ao kam na aki kamatoaaki.”’”
10 E reitia ni kangai Iehova nakon Aati:
11 “Bubutii te kanikina mairoun Iehova ae Atuam,+ ae tao e nano n aron te Ruanimate* ke e rietata n aroni karawa.”
12 Ma e taku Aati: “N na aki bubutii, ao N na aki naba kataa Iehova.”
13 E taku ngkanne Itaia: “Ongora taiaoka ngkami aika kaaini batan Tawita. E aki tau iroumi ae kam kataa aia taotaonakinnano aomata? Te koaua bwa kam riai naba ni kataa ana taotaonakinnano te Atua?+
14 Mangaia ae e na anganingkami te kanikina aei Iehova: Noria! E na bikoukou te ateiaine, ao e na bungia te nati te mwaane,+ ao e na aranna bwa Emanuera.*+
15 E na kakana te bwata ma aia karewe manibeeru* n te tai ae e ataa iai arona n rawa nakon te buakaka ao n rinea te raoiroi.
16 Bwa imwain ae e ataa arona te teinimwaane anne n rawa nakon te buakaka ao n rinea te raoiroi, ao e na kitanaki raoi abaia ueea ake uoman ake ko maakuia.+
17 Ao Iehova e na karokoa te tai iroum n ekikonako ao n ekiianako am aomata ao n ekiianako kaaini batan tamam, ae te tai ae tuai mani kaoti mai mwaina man te bong are e raurenako iai Eberaim ma Iuta,+ bwa E na karokoa uean Aturia.+
18 “N te bong anne ao e na kakatang Iehova ni weteiia naango mani karaangan te Naire are i Aikubita aika raroa, ao manibeeru n te aba ae Aturia,
19 ao a na bane n roko n tiku i aon rabeeni mwarua, i aon tabwenan taiani bwaa, i aon aroka ni kabane aika kateketeke, ao i aon taabo n ran ni kabane.*
20 “N te bong anne ao Iehova e na imana te atu ao buraen taiani wae, n te mwariro ae kabooaki tangoana man aonon te Karaanga,* rinanon uean Aturia,+ ao e na koreaki naba iai te buai ni kamaunaaki.
21 “N te bong anne ao te mwaane temanna e na kateimatoa maiun temanna te kao ae ataei man te nanai ao tiibu aika uoman.
22 Ao ane e na kakana te bwata ngkai e bati rannimamman te man, ibukina bwa a na bane ni kakana te bwata ma aia karewe manibeeru te koraki ake a tiku n te aba.
23 “N te bong anne, ao te tabo are a memena ngkoa iai kaai aika kureebe aika 1,000, ae 1,000 te mwakoro n tirewa boona, a nang tii mena iai aroka aika kateketeke ma uteute.
24 A na nako ikanne mwaane ma te kainikatebe ao kanoan te kainikatebe, ibukina bwa e nangi buta te aba n aroka aika kateketeke ma uteute.
25 Ao ane ko na aki kaaniko ma maunga ni kabane ake a kakaitiakaki ngkoa n te tibeiti, ibukini maakakin aroka aika kateketeke ma uteute. Ane a na riki bwa aia tabo kaao mwaane n amwarake, ao te tano ae toutouaki irouia tiibu.”
Taiani Kabwarabwara Mai Nano
^ Ke tao, “a.”
^ Ae nanona, “Tii te Nikira ae E na Oki.”
^ Ke tao, “kakamaakua.”
^ Ke, “kabwangabwangai oona.” Ebera, “bwenauaia ni kaukia.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Ae nanona, “E Memena Iroura te Atua.”
^ Nora Nanon Taeka.
^ Ke, “tawaana.”
^ Ae taekan te Iuberetiti.
