Taeka N Rabakau 12:1-28
12 Ane e tangira te reirei ni kaetieti ao e tangira naba te atatai,+Ma ane e ribaa te boaaki ao bon te ronnano.*+
2 E karekea te akoaki iroun Iehova te aomata ae raoiroi,Ma E kabuakakaa te aomata ae bairei baika bubuaka.+
3 Akea te aomata ae mweraoi ni buakakana,+Ma a na bon aki taewakaaki akana raoiroi.
4 Te buu te aine ae konabwai bon ana baunuea buuna,+Ma te buu te aine ae kamaamaea te aba bon ai aron te mka ae mena n riin teuaei.+
5 A eti aia iango aomata aika raoiroi,Ma e mwamwanaa te aba aia kairiri aomata aika buakaka.
6 Aia taeka aomata aika buakaka bon te kakaran ae kamamate,*+Ma wia aomata aika raoiroi e boni kamaiuia.+
7 Ngkana a kamaunaaki akana buakaka, ao ai akea naba,Ma e na teimatoa n tei aia auti akana raoiroi.+
8 E kamoamoaaki te aomata ibukin te wanawana are ni wina,+Ma e na ribaaki ane e aki eti nanona.+
9 E raoiroi riki te aomata ae mangori ao iai ana toro temanna,Nakon ane e kamoamoaa i bon irouna ao akea kanana.*+
10 E tabeakinia raoi ana man aika manana te aomata ae raoiroi,+Ma aia nanoanga akana buakaka bon te iowawa.
11 Ane e ribanaa abana ao e na rauaki n te amwarake,+Ma ane e uaiakini baika akea manenaia ao e aki ataa ae riai.*
12 E bakantang te aomata ae buakaka n te baere a karekea aomata aika buakaka ake tabeman,Ma e karikiuaa wakaaia akana raoiroi.
13 E mwane te aomata ae buakaka n oin ana taetaenikawai ae bubure,+Ma e reke birinakon ane e raoiroi man te rawawata.
14 E rauaki te aomata n te raoiroi man uaan ana taetaenikawai,*+Ao e na reke kaniwangana n ana mwakuri baina.
15 E eti aron te aomata ae nanobaba n oini matana,+Ma e butimwaei taeka n reirei* te aomata ae wanawana.+
16 E waekoa ni* kaota unna te aomata ae nanobaba,+Ma e tarariaoa* te bwai ae kaun te aomata ae ataibwai.
17 Ane e kaotioti ma te kakaonimaki ao e na taekina te koaua,*Ma e taekina te bwai ae mwamwanaa te aba te tia kakoaua ni kewe.
18 Te taetaenikawai ae aki iangoaki raoi kaanga ai aron te ewa n te kabaang,Ma bon te bwai ni kamaiu neweia akana wanawana.+
19 Riia aika tataekina te koaua a na teimatoa n aki toki,+Ma e kimototo ana tai te newe ae kewekewe.+
20 E mena te mwamwanaa te aba i nanoia te koraki aika bairea te iowawa,Ma a kimwareirei te koraki aika kauekea* te rau.+
21 Akea te bwai ae karuanikai ae e na bwakara ane e raoiroi,+Ma e na onrake maiun ane e buakaka n te kabuanibwai.+
22 A riribaaki iroun Iehova riia aika tataekina te kewe,+Ma a kakukureia nanona akana bwabwaina te kakaonimaki.
23 Te mwaane ae ataibwai e karabaa te bwai ae e ataia,Ma e kaotiota nanobabana nanon te aomata ae nanobaba.+
24 A na tautaeka baia aomata aika taningamarau ni mwakuri,+Ma a na tautoronaki baai aika taningaroti.+
25 E karawawataa* te nano te raraoma are i nanon te aomata,+Ma e unga n te taeka ae raoiroi.+
26 E neneri raoi ana tawaana te aomata ae raoiroi,Ma a tiotionako n oini kawaia akana buakaka.
27 A aki kaea konaia aomata aika taningaroti,+Ma te taningamarau ni mwakuri bon ana bwai ae rangi ni kakawaki te aomata.
28 E kairiri nakon te maiu kawain te raoiroi,+Ao akea te mate i nanoni kawaina ae totouaki.
Taiani Kabwarabwara Mai Nano
^ Ke, “akea ataakin ae riai irouna.”
^ Ebera, “te karan ibukin te raraa.”
^ Ebera, “ana kariki.”
^ Ebera, “aki tau nanona.”
^ Ebera, “wina.”
^ Ke, “reirei ni kairiri.”
^ Ke, “N te bong naba anne e.”
^ Ebera, “rabuna.”
^ Ebera, “te bwai ae raoiroi.”
^ Ebera, “te koraki aika taan angareirei ibukin.”
^ Ke, “kabwaraa.”
