Te Otinako 15:1-27
15 N te tai anne ao a anenea te anene aei nakon Iehova Mote ma tibun Iteraera ni kangai:+
“N na anene nakon Iehova bwa e rangi ni karietataaki.+
E tewenakoia aoti ma taan toka i aoia i taari.+
2 Boni korakorau ao mwaakau Iah,* kioina ngkai e riki bwa te tia kamaiuai.+
Bon Atuau aei ao N na karaoiroia,+ bon Atuan tamau+ ao N na karietataa.+
3 Bon te tia buaka ae korakora Iehova.+ Bon Iehova arana.+
4 E tewenakoi ana kaa ni buaka ma ana taanga ni buaka Barao i taari,+Ao a iinako ana tia buaka aika rangi ni mwaatai n Taari ae Uraura.+
5 A rabunaki n naao, ao a iinako i nano kaanga te atibu.+
6 Iehova, e korakora baim ae te atai,+Iehova, e kona baim ae te atai n ibea te tia kairiribai ni kamaeinikunna.
7 Ao ko kona ni karenakoia akana tei imwaim n ekikonako, ni korakorani mimitongim,+E urarake unim ao e kabuekiia kaanga uteute aika mwau.
8 A kateaki raan kaanga te oo n ikeikeni bwairim,A tei n etirake n tuka te ran,A riki ni bwanin naao i nukani marawa.
9 E taku te tia kairiribai, ‘N na kaeiia! N na ooiia!
N na tibwaa konau ni buaka ni karokoa ae I* rauaki!
N na buuta au kabaang! N na kataenikaiia ni baiu!’+
10 Ko ukiia n ikeikem ao e rabunia taari,+A iinako kaanga te buange n taari ae naonao.
11 Antai ae ai arom Iehova i buakoia atua?+
Antai ae ai arom, ae ko kaotiko bwa te Atua ngkoe ae rianako tabum?+
Bon Teuare riai ni karineaki n taian anene n nebonebo ao Teuare karaoi baika kamimi.+
12 Ko arora baim ae ataim, ao e a kabwautiia naba aontano.+
13 Ko kairiia n am tangira ae koaua* aomata aika ko a manga kabooia,+Ko na kaiririia ni korakoram nakon am tabo ni maeka ae tabu.
14 A na ongo botannaomata+ ao a na ruru,A na taonaki kaaini Biritia n te maraki* ae korakora.
15 N te tai anne ao a na maakunrang mataniwin* Etom,Ao a na taonaki n te rurubenebene taan tautaeka aika korakora* i Moaba.+
A na bwara nanoia kaaini Kanaan ni kabane.+
16 A na bwakaraki n te maaku ma te raraoma.+
Ibukini korakorani baim, a aki kona ni kakammwakuri kaanga te atibuNi karokoa ae a a rimoa am aomata, ngkoe ae Iehova,Ni karokoa ae a a rimoa+ am aomata aika ko karikiia.+
17 Ko na kairiia ao ni kateiia* n am maunga are ko abanna,+Ae te tabo ae teimatoa ae ko katauraoia bwa ko na maeka iai, ngkoe ae Iehova,Te tabo ae tabu ae kateia baim, ngkoe ae Iehova.
18 E na tautaeka Iehova bwa te uea n aki totoki.+
19 Ngke a ruo nako taari ana aoti Barao ma ana kaa ni buaka ma ana tautia ake a toka i aoia aoti,+Ao e kaoka taari Iehova nako aoia,+Ma a nakonako tibun Iteraera i aon te tano ae mwau n rinukan taari.”+
20 E anaa ngkanne te tamboriin* Miriam are te burabeti n aine are mwaanen Aaron, ao a rimwina aine ni kabane ni katangi tamboriin ao ni mwaie.
21 E anene Miriam ni kaekaia mwaane ni kangai:
“Anene nakon Iehova bwa e rangi ni karietataaki.+
E tewenakoia aoti i taari ma taan toka i aoia.”+
22 Imwina riki ao e kairiianako tibun Iteraera Mote man Taari ae Uraura, ao a a nakon rereuan Tiura ao ni mwananga i nanon tenibong i nanon te rereua, ma e aki reke irouia te ran.
23 A roko i Mara*+ ma a aki kona n nima ranin Mara bwa e mao. Anne bukina ae e aranna iai bwa Mara.
24 Mangaia are a a ngurengure aomata nakoni Mote+ ao a kangai: “Tera ae ti nang nimma?”
25 E tang teuaei nakon Iehova,+ ao e kairia Iehova nakon te aroka ae uarereke. Ngke e kabwakaa te aroka arei Mote nako nanon te ran ao e a riki ni mam te ran iai.
Ao E katea ikekei te moti ao te tua ibukia ao E kataiia naba ikekei.+
26 E taku: “Ngkana ko ongo raoi ni bwanaan Iehova ae Atuam ao ngkana ko karaoa ae eti i matana ao ngkana ko mutiakin ana kaetieti ma ni kawakin ana moti ni kabane,+ N na bon aki karokoa i aom teuana mai buakon aoraki ake I karokoi i aoia I-Aikubita,+ bwa I kamaiuko ngai ae Iehova.”+
27 Imwin anne ao a a roko i Erim, ike a mena iai koburake n ran aika 12 ao aroka aika baam aika 70. Mangaia are a a nako ni kaembwa ikekei i rarikin te ran.
Taiani Kabwarabwara Mai Nano
^ “Iah” boni kauarerekean te ara ae Iehova.
^ Ebera, ne’phesh, nora Nanon Taeka.
^ Ke, “tangira ae kona n onimakinaki.”
^ Ebera, “te ariri.”
^ Te mataniwi bon te mataniwi n te baronga.
^ Ke, “taan tautaeka aika iowawa.”
^ Ebera, “unikiia.”
^ Nora Nanon Taeka.
^ Ae nanona, “Mao.”
