A kona n uaia ni kukurei ao n rotaki nanoia taanga ni bungian natiia. Ngkai kam a riki bwa kaaro, kam na bae ni mimi n ataakin ae kam a kabanea angiin ami tai ao korakorami n tabeakinan natimi. E kona n ruanikai ami itoman n te aki mamatu raoi n ikotaki naba ma te bitaki ni baika kam iangoi. Kam kona ni kaai ni karaoi bitaki ibukin tabeakinan natimi ao kateimatoaan tekatekami n taanga imwin ami mare. A kanga taeka n reirei man te Baibara ni buokiko ni kaaitarai kangaanga akanne?

TE BAE E TAEKINAKI N TE BAIBARA: “E taotaonakinnano te tangira ao e akoi.” E aki [naba] ukera oini kabwaiana, [ao] e aki kakaiun.” (1 I-Korinto 13:4, 5) Ko bae n rangi ni mwannanoa natim kioina ngkai ko a riki bwa te tina. Ma e kona buum ni moanna n namakinna bwa e a aki tabeakinaki, ngaia are tai mwaninga are e kainnanoa naba tabeakinana. Ko kona ni buoka buum ma te taotaonakinnano ao te akoi bwa e na namakinna ae e kainnanoaki ao iai irekerekena ma tararuaan natimi.

“Ngkami buumwaane . . . teimatoa ni maeka ma buumi n te aro naba anne ma te atatai.” (1 Betero 3:7) Ko riai n ataia ae e na kabanea riki korakorana buum iroun natimi. Bon iai mwiokoana aika boou ao e kona n tabeaianga, n rawawata, n rotaki n te kua, ke ni bwarannano naba. N tabetai, e kona naba ni maraki nanona iroum ma kataia ni kateimatoa te rau ibukina bwa “ane aki kakaiun ao e raoiroi riki nakon te aomata ae korakora.” (Taeka N Rabakau 16:32, BG) Kaota te wanawana ao boutokaia ni baike e kainnanoi.—Taeka N Rabakau 14:29.

TE BAE KO KONA NI KARAOIA:

• Taama: Buoka buum n tabeakina natimi n te tairiki naba. Tiatiana te tai ae ko na kabanea ni karaoani bwaai tabeua bwa ko aonga ni kabanea am tai ae bati riki ma buum ao natim

• Tiina: Butimwaea ana ibuobuoki buum ibukin natimi ngkana e kani buokiko. Tai tiribureia ngkana e aki nakoraoi te mwakuri ae karaoia ma kaota aroni karaoana nakoina ma te akoi

TE BAE E TAEKINAKI N TE BAIBARA: “A na riki n ti te irikona nakai..” (Karikani Bwaai 2:24, BG) E ngae ngke e a manga reke kaain ami utu riki temanna, uringnga are bon “ti te irikona” ngkoe ma buum. Karaoa ami kabanea ni kona ni kateimatoa korakoran ami iraorao.

Buu aine, kakaitau n aia ibuobuoki ao aia boutoka buumi. E kona n riki kaotani kukurein nanom bwa “te bwai n aoraki.” (Taeka N Rabakau 12:18, BG) Buu mwaane, tuangia buumi korakoran tangiraia ao kakawakia iroumi. Kamoamoaa buum n arona n tabeakina te utu.—Taeka N Rabakau 31:10, 28.

“Ke e tai ukera oini kabwaiana temanna ma temanna, ma e na ukera ae e na kabwaia iai raona.” (1 I-Korinto 10:24) Katoatai ni karaoa te kabanea n tamaroa ibukini buum. Ngkai bon taanga ngkami, kam riai ni karekea ami tai ni maroro, ni kaungaunga ao n uaia ni kakauongo i marenami. Tai tii iaiangoiko n te wene n taanga. Iangoa naba kainnanoni buum. E taekinaki ae kangai n te Baibara: “Tai rarawa i marenami n anga te baere kam riai n anga.” (1 I-Korinto 7:3-5) Ngaia are maroroakina anne i marenami ma te karinerine. E na kakorakoraaki ami iraorao n ami taotaonakinnano ao ami atatai.

TE BAE KO KONA NI KARAOIA:

• Tai mwaninga ni karekea ami tai i marenami ni kauoman

• Karaoi baika uarereke ae e na namakina iai tangirana buum, n aroni kanakoan am rongorongo nakoina ke am bwai n tangira ae uarereke

TE BAE E TAEKINAKI N TE BAIBARA: “Ko a kaman ataa te koroboki ae tabu mangke te merimeri ngkoe bwa e kona ni kawanawanako bwa e aonga ni kamaiuko.” (2 Timoteo 3:15) Babairea te bae ko na karaoia ibukin reiakinan natim. E kamimi arona ni karekea rabakauna, e ngae naba ngke e tuai ni bungiaki. E kona natim ni kinaa bwanaam ao n namakina te bae ko karaoia, e ngae naba ngke e mena i nanon te biroto. Wareware nakoina man uarerekena.

E ngae ngke e aki ota n te baere ko warekia, ma e kona ni buokaki iai bwa e na tangira te wareware ngkana e a ikawai riki. E boni kona natim n ongoraea taekan Iehova, e ngae naba ngkana e rangi n uarereke. Kariaia bwa e na ongoraea am tataro nakon Iehova. (Te Tua-Kaua 11:19) Ngkana kam uaia n takaakaro, maroroakina taekan ana karikibwai te Atua. (Taian Areru 78:3, 4) E kona natim n nora tangiran Iehova iroum ao n reiakinna ngkana e a ikawai.

TE BAE KO KONA NI KARAOIA:

• Tataroakina te wanawana ibukin reireinan natim

• Kaokiokii baika ko tangiria bwa e na atai ao ane e na waekoa iai n reiakin