MWAKORO 8
Ngkana A Riki Kabuanibwai
“Kam a rangi ni kimwareirei ibukini baikai, e ngae ngkai kam riai ni karawawataaki moa i nanon tabeua te tai, ni kataaki aika kakaokoro.”
E ngae ngke ko kabanea am kona bwa e na kakukurei tekatekam n taanga imwin am mare ao am utu, ma a kona n riki baika a aki kantaningaaki aika kona ni kanakobuakaa kukureimi. (Te Minita 9:11) E tatangira Atuara ni katauraoa te ibuobuoki ibukira ngkana ti kaaitara ma kangaanga. Ngkana ko maiuakini booto n reirei aikai man te Baibara, ko na kona ni kekeiaki ribuakoni kangaanga ma am utu, e ngae naba ngkana a rangi ni karawawata.
1 ONIMAKINA IEHOVA
TE BAE E TAEKINAKI N TE BAIBARA: “Kabanei ami iango n raraoma ni kaaki i aona bwa e mumutiakiningkami.” (1 Betero 5:7) Uringnga n taai nako are e aki riai ni bukinaki te Atua ni baika ko kataaki iai. (Iakobo 1:13) E na boni buokiko n te aro ae te kabanea n raoiroi ngkana ko kaaniko ma ngaia. (Itaia 41:10) “Nurakin nanomi i matana.”
Ko na karekea naba raun nanom ngkana ko katoabong ni wareka ao n reirei n te Baibara. Ibukin anne, ko na ataa aron Iehova ni “kabebeteira n rawawatara nako.” (2 I-Korinto 1:3, 4; I-Rom 15:4) E berita bwa e na anganiko te “rau are mairoun te Atua ae riaon aia iango aomata.”
TE BAE KO KONA NI KARAOIA:
-
Tataroa ana ibuobuoki Iehova bwa ko na teimatoa n rau ao n iangoraoi
-
Rinanoi baika kaokoro nako aika ko na karaoi ao rinea te anga ae te kabanea n tamaroa ibukim
2 TARARUAA RAOI MARURUNGIM AO AM UTU
TE BAE E TAEKINAKI N TE BAIBARA: “E reke te atatai iroun te aomata ae nanowanawana; Ao a ukoukora te atatai taningaia akana rabakau.” (Taeka N Rabakau 18:15, BG) Karekei koaua ni kabane. Ukeri baika a kainnanoi kaain am utu n tatabemania nako. Maroro ma ngaiia ao ongora irouia.
Tera arom ngkana e mate ae tangiraki iroum? Tai maaku ni kaota rawawatam. Uringnga are “a tiinako [naba] rannimatan” Iesu. (Ioane 11:35; Te Minita 3:4) E kakawaki karekean te motirawa ao te matu ae tau. (Te Minita 4:6) E na kona ni kabebeteaki iai uotam ni kekeiaki ribuakoni kangaanga aika rawawata.
TE BAE KO KONA NI KARAOIA:
-
Imwain rikini kabuanibwai, kataneiako n reitaki ma am utu. Ngkana a riki kangaanga, ane a na kukurei ni maroro ma ngkoe
-
Maroro ma tabeman aika a a tia ni kaaitara ma baika a riiriki n aron akanne
3 KAREKEA TE IBUOBUOKI AE KO KAINNANOIA
TE BAE E TAEKINAKI N TE BAIBARA: “E tangiriko n tai nako raraom, e riki ba tarim ni koaua n am tai n rawawata.” (Taeka N Rabakau 17:17, BK) A kani buokiko raoraom ma a bae n aki ataa te bae a na karaoia. Tai tabwara n tuangia te bae ko rangi ni kainnanoia. (Taeka N Rabakau 12:25) Ukera naba buokam ni kaineti ma am onimaki mairouia te koraki ake iai aia atatai n te Baibara. Ko kona ni buokaki ngkana a anganiko te kairiri man te Baibara.
Ko na karekea te ibuobuoki ae ko kainnanoia ngkana ko aki toki n reitaki ma aomata aika onimakina raoi te Atua ao n onimakini ana berita nako. Ko na karekea naba kabebetean nanom ae korakora ngkana ko buokiia te koraki aika kainnanoa kaungaakia. Maroroakina ma ngaiia onimakinan Iehova iroum ao ana berita nako. Teimatoa ni katabetabeko ni buokia aomata tabemwaang aika kainnanoa anne ao tai kararoako mairouia te koraki aika tangiriko ao n tabeakiniko.
TE BAE KO KONA NI KARAOIA:
-
Maroro ma raoraom ae ko rangi ni kinaa ao kariaia bwa e na buokiko
-
Kamataata ao kaotii raoi baika ko kainnanoi
