E a kaman riki te iuniweeti?

E koreaki ae kangai ni Karikani Bwaai 1:1: “N te moantai ao e karika karawa ma te aonnaba te Atua.”

Tao imwain 1950, ao a bati taan rabakau aika kinaaki aika a kakoauaa bwa e a kaman riki te iuniweeti. Ma ni kaineti ma kukune n taai aika tibwa nako, ao angia taan rabakau, a a kakoauaa ngkai ae ara iuniweeti aei e a kaman riki.

Tera aron taraan te aonnaba n te moantai?

E kabwarabwaraaki ni Karikani Bwaai 1:2, 9 bwa “e tuai ni bwai te aonnaba ao akea kanoana,” ao e rabunaki n te ran.

A boraoi naba n iango taan rabakau i aon anne. E taekina ae kangai te tia rabakau ni bwain te rabwata ae Patrick Shih: “Ngke e moan riki te aonnaba ao bon akea te oxygen ae ti kona n ikeikenna . . . ao e rangi ni kamimi taraana.” E koreaki naba ae kangai n te maekatin ae te Astronomy: “Ni kakaae aika boou ao te aonnaba e rabunaki n te ran, n te aro are e a kuri n akea te aba ae mwau.”

 E kangaa ni bitaki karawan aonnaba i nanon te tai ae maan?

E taekinaki ni Karikani Bwaai 1:3-5 bwa ngke e moan rin te oota ni karawan te aonnaba, e aki roko ootana i aon te aba. Imwina riki, e a kona n noraki taai ao namwakaina n te aonnaba.—Karikani Bwaai 1:14-18.

E taekinna te Smithsonian Environmental Research Center bwa karawan te aonnaba e tii karina te oota nakon te aonnaba. E kangai: “E rabunaki te aonnaba ni kabutaa n te aoi ae matenten.” Imwina riki, “e a moanna n itiaki te aoi ae matenten ao e a buruu karawa.”

Tera aroni bairean te maiu n te aonnaba?

E taekinaki ni Karikani Bwaai 1:20-27 bwa a karikaki iika, mannikiba, manin te aonnaba ao ai aomata. A kakoauaa taan rabakau bwa e a kaman riki te ika imwain rikini manin aon te aba ao imwina riki ai tibwa aomata.

A taekinna tabeman bwa te Baibara e rangi ni kaokoro ma te bwai are a a tia n noria taan rabakau. Ma e ngae n anne, iango akanne a boto raoi man te aki ota n te bae taekinaki n te Baibara.

E aki taekinaki n te Baibara bwa te iuniweeti ke te aonnaba ai 6,000 te ririki maanna. Ma e tii taekinaki iai bwa e karikaki te aonnaba ao te iuniweeti “n te moantai.” (Karikani Bwaai 1:1) E aki kabwarabwaraa raoi te Baibara bwa maanra te tai anne.

E aki taekinaki n te Baibara bwa a karikaki baika maiu n te aonnaba i nanon onoua te bong ae 24 te aoa maanna.Ma e kamanena te taeka ae “bong” ni kaota iai te tai ae maan. N te katoto, e taekinaki bwa ngke e karikaki ara buraneti ma baika maiu iai— i nanoni “boong” ni karikibwai ake onoua are taekinaki ni Karikani Bwaai mwakoro 1—a riki i nanon te tai ae maan ae aranaki bwa “te bong are e karaoa iai te aonnaba ma karawa Iehova * ae te Atua.” (Karikani Bwaai 2:4) Ngaia are ni “boong” ni karikibwai akana onoua akanne, are ngke e katauraoa iai te aonnaba te Atua ibukin te maiu ao aomata naba, e kona n nanona ngkanne te tai ae rangi ni maan.

E aki taekinaki n te Baibara bwa baika maiu a aki kona ni bitaki aron rabwataia.E taekinaki n te boki ae Karikani Bwaai bwa a karikaki maan “n aekaia nako.” (Karikani Bwaai 1:24, 25) Te taeka ae “aekaia” n te Baibara, bon tiaki te taeka ae onoti nakon te aeka ni bwai teuana, ma e kona ni kaineti nakon te utu ni man ke aroka. Ngaia are te taeka ae “aekana” e kona n nanonaki iai maan ke aroka aika mwaiti aika kakaokoro nako. Ngkanne e oti n te taeka aei, bwa i nanon te tai ae maan, a kona ni bitaki maan aika kaain te aeka n utu ni man anne.

 Tera am Iango?

N aron ae oti mai eta, e kabwarabwaraaki n te Baibara n te aro ae kai ota ao n eti raoi, moan rikin te iuniweeti, te aonnaba, ao baika maiu naba. Nanona ngkanne e a kaotaki n te Baibara n te aro ae eti raoi taekan Teuare e karikii baikanne? E taekinaki n te Encyclopædia Britannica, bwa “moan rikin te maiu e nako raoi mairoun Teuare nibwani mwaakaia aomata ae rianako, ao a inanoi naba taan rabakau ma anne.” *