I AAN te Tua Rinanoni Mote, a kaai ni kariaiakaki taobe ao bitin bwa karea nakon Iehova. A uaia n tataekinaki mannikiba aikai n taian tua ibukin te angakarea, ao e kona ni kamanenaaki are temanna n oneani mwin are temanna. (NakIbo. 1:14; 12:8; 14:30) Ma e aera ngkai bon te kakabwaia aei? Bukina teuana, bwa e kuri ni kangaanga riki karekeaia taian taobe. E aera ngkai e riki aei?

Boni mannikiba aika mwamwananga taian taobe ao a maeka ni kabutaa Iteraera n namwakaina ake a kabuebue riki. N te namwakaina ae Okitobwa ni katoa ririki, a mwamwananga nako aiaki nakon aaba aika kabuebue riki, ao a okira Iteraera n tain te abue. (AneTor. 2:11, 12; Ier. 8:7) Ae nanona bwa i aon Iteraera rimoa, e kangaanga irouia tibun Iteraera bwa a na anga taian taobe bwa aia karea n tain te kamwaitoro.

N te itera are teuana, a aki bati ni mwamwananga taiani bitin, ngaia are a rangi ni kai reke n taai nako i Iteraera. Irarikin anne, a rangi ni manana taiani bitin. (Kabotaua ma Ioane 2:14, 16.) E taekinaki n te boki ae Bible Plants and Animals, bwa “e rangi ni korakora kamananaan taiani bitin ni kaawani Baretain. A bane n toa auti ma nnen te taobe ni maeka, ke te bwangabwanga n te oo are a a kona ni maeka i nanona mannikiba aikai.”—Kabotaua ma Itaia 60:8.

Ngaia are e kaotia Iehova n aei bwa e bon tatangira ao e atataiaomata n arona ni butimwaei karea aika mannikiba ake a kai reke irouia tibun Iteraera i nanon te ririki.