E KAKORAKORAA Don ae Ana Tia Kakoaua Iehova temanna ni maroro ma aomata aika maeka i rarikin te kawai. E taku Don ibukin temanna i buakoia aomata aikai: “Peter bon te mwaane ae akea mwengana, ao bon temanna i buakoia naake taiani kabanea ni burinana ae I a tia n noriia, aika maeka i rarikin te kawai. E riribaiia aomata ao e aki kan reitaki teutana ma ngaiia. E rarawa ni butimwaei aia mwakuri n akoi.” Ma e teimatoa Don n taotaona nanona n te maan ae raka i aon 14 te ririki, ni kaota te akoi nakon te mwaane ae akea mwengana aei.

N te bong teuana ao e taku Peter nakon Don: “E aera ngkai ko kakawarai? A bane n aki tabe ma ngai aomata. E aera ko tabe irou?” E taetae ma te akoi Don ni kaotii kiibu aika tenua n anaa iai nanon Peter. Te moan, e titirakina Peter bwa e ataia ae iai aran te Atua ke e aki, ao e butiia bwa e na wareka Taian Areru 83:18 man te Baibara. Imwina, e kaota bukin tabeakinana ngke e tuanga Peter bwa e na wareka I-Rom 10:13, 14, ae kaotaki iai bwa “ane e taboa aran Iehova ao e na kamaiuaki.” Te kabanea, e wareka Mataio 9:36 Don ao imwina e tuanga Peter bwa e na warekia i bon irouna. E taku te kibu anne: “Ngke e noriia [Iesu] te koraki ae bati ao e nanoangaiia ibukina bwa a karawawataaki ma ni kananoanga, ao a uamaenako n aroia tiibu aika akea te tia kawakinia.” E taku ngkanne Peter ma rannimatana: “Ngai naba temanna i buakoia tiibu akanne?”

E a moanna ni karaoi bitaki Peter. E a tebotebo, e korobuai, ao e a bwaini kunnikai aika raraoi riki ake e anganna Don. E kateimatoa itiakin taraakina Peter.

Iai ana boki Peter ae e kokorei iai rongorongona. A kananokawaki moani kanoan ana boki aei, ma e a kaokoro kanoana ake e a tibwa korei. E taku kanoana teuana: “I a ataa aran te Atua n te bong aei. I a kona n tataro ngkai nakon Iehova. E rangi n tamaroa ataakin arana. E taku Don bwa e kona n riki Iehova bwa Raoraou ni kaan, ao e kona n ongora irou n aki ongeia bwa n ningai ke tera ae I taekinna.”

 E korei kabanean ana taeka Peter nakoni mwaanena ao tarina. E taku:

“I a aki marurung n te bong aei. I taku bwa e a bon roko te kara irou. Ma e ngae ngkana ai au kabanea ni bong aei, I ataia ae N na manga kaitiboo ma raoraou [ae Don] n te bwaretaiti. Ngkana ko wareka te reta aei, ngkanne ai akea ngai. Ma ngkana ko nora te mwaane temanna ae ira te taunimate ibukiu ae ko aki kinaa, kataetaea, ao taiaoka wareka te boki ae uarereke ae buruu aei [ae te boki ae aanaki n te Baibara ae “The Truth That Leads to Eternal Life” are e anganaki tabeua te ririki n nako]. * E taekinaki iai bwa N na manga kaitiboo ma raoraou n te Bwaretaiti. I kakoauaa aei ma nanou ni kabane. Mwaanem ao tarim ae tangiriko, Peter.”

Imwin te taunimate ao e taku mwaanen Peter ae Ummi: “Tao uoua te ririki n nako ao e a reitaki ma ngai Peter. Ai tibwa te moantai i nanon ririki aika bati ae e taraa ni kukurei iai. E boni moangare naba.” E tuanga Don neiei ni kangai: “N na wareka te boki anne ibukina bwa e na boni bae ni kakawaki te baere e rotaki iai nanoni mwaaneu.” E kukurei naba Ummi ni maroro n te boki ae boou ae Tera Ana Reirei ni Koaua te Baibara? ma Ana Tia Kakoaua Iehova temanna.

Ti kona naba ngaira n aki kaatuua taraan tinanikuia aomata, ma ti na kaota te tangira ni koaua, ao n taotaon nanora nakoia aeka n aomata nako. (1Tim. 2:3, 4) Ni karaoan anne, ti a kona iai n anai nanoia aomata aika ai aroni Peter, ake tao a aki taraaraoi i mataia aomata, ma a raoiroi nanoia. Ti kona ni koaua raoi bwa te Atua ae “nora te nano” e na karikirakea te koaua i nanoia naake a tauraoi ni butimwaea te koaua.—1Tam. 16:7; Ioa. 6:44.