Te Baibara bon te boki ae manena ibukin te ibuobuoki ma tiaki bokin te bwainnaoraki. Taeka n reirei ake iai, a kona ni buoka temanna ae kabokorakora ma aorakin ana iango. Iangoi katoto tabeua.

“A aki kainnanoa te taokita aomata aika marurung, ma a kainnanoia akana aoraki.”—MATAIO 9:12.

E taekinaki n te Baibara bwa ti riai n ukera te ibuobuoki man te onnaoraki. A bati aika buokaki n ataakin ae a kona ni karekei buokaia ibukin aorakin aia iango rinanoni booki ao mairouia taokita aika mwaatai.

“E manena teutana kakorakoran te rabata.”—1 TIMOTEO 4:8, BG

Karaoani bwaai ibukini kamarurungan te rabwata, e kona ni buoka kanakoraoan marurungin am iango. E nanonaki naba iai kateimatoaan te kakammwakuri, kanakin te amwarake ae baeranti, ao ai te matuu ae bon tau.

“Bon te bwainnaoraki ae raoiroi te nano ae kimwareirei, ma e kamamaraa te rabwata te nano ae rawawata.”—TAEKA N RABAKAU 17:22.

Warekani kiibu aika kaungaunga man te Baibara ao katean tiia ake ko kona n uaiakin, a kona ni buokiko ni kateimatoa kimwareireim. Kaatuuan am iango i aoni baika  raraoi ao kakoauaan ae a na tabe n ririkirake n raoiroi n te tai ae imwaim, e na kona ni buokiko ni kaaitarai kangaanga ni kaineti ma aorakin am iango.

“E mena te wanawana irouia akana nanorinano.”—TAEKA N RABAKAU 11:2.

Ko bae n noria bwa ko aki kona ni karaoi baike ko kani karaoi i bon iroum, ngaia are butimwaea aia ibuobuoki tabemwaang. A bae ni kani buokiko raoraom ao am utu, ma a kona n aki ataa te bae a na karaoia. Tuangia bwa tera ae a na buokiko riki iai. Tai kantaningaia bwa a na karaoaki baika bati ibukim, ao kakaitau n taai nako ibukin aia ibuobuoki.

“I namakinna bwa iai au kangaanga, ngaia are I a kawara te taokita. E tuangai aorakiu te taokita ao I a ataa raoi au kangaanga, ao n reiakin aanga n ibuobuoki man te onnaoraki ibukini kanakoraoan riki marurungiu.”—Nicole, a are e rotaki n aorakin te iango ae te bipolar disorder.

“I noria bwa warekan te Baibara ni katoatai ma kaainnabau, e buokai bwa N na iaiangoi baika raraoi ma ni kaungaunga ni katoabong. Ao n taai ake I kabokorakora iai ma au kangaanga, I a bon ururinga naba te kibu teuana ae na kabebeteai.”—Peter, are e rotaki n aorakin te iango ae te rawawatannano.

“E kangaanga taekinan aorakiu ibukina bwa I rangi ni maamaa iai. Ma e kakauongo raoi raoraou ni kaan temanna, ao e kataia n ota n au namakin. E boni buokai bwa N na ataia ae I tabeakinaki raoi ao tiaki tii ngai n rinanon aei.”—Ji-yoo, are rotaki n te aoraki ae kaineti ma aron amwarakena.

“I buokaki n te Baibara bwa N na bwaina te wanawana, N na karekea motirawau ae tau, ao N na aki kakorakaiai. E a bon tia te wanawana man te Baibara ni buokai bwa N na teimatoa ni kaitaraa au kangaanga.”—Timothy, are e rotaki n aorakin te iango ae te OCD.