I bungiaki i Ciudad Mante, ae te aono ae rangi n tamaroa n te aba ae Tamaulipas i Mexico. A tituaraoi ao a akoi kaain te kaawa aei. Ma e kananokawaki bwa e a rangi ni karuanikai te aono aei ibukin te kakeru ae kakaraoaki iai.

Te kauoman ngai i buakoia tariu aika teniman. A tuatua au karo bwa N na bwabetitoaki n te Aro ni Katorika, ao imwina riki I a kaaina te kuaea n te baeriti. I kani kakukureia te Atua ibukina bwa I rangi ni maaka ae e na motikaki taekau ao ni kabuekaki n aki toki i moone.

Ngke ai nimaua au ririki ao e a kitanira tamara. Anne are e a karika nanokawakiu ae rangi ni bati ao I a tiku ma iangoan ae akea uaau. I aki kona n ota bwa bukin tera ngkai e kitanira ao ti rangi n tangiria. E mwamwakuri tinau i nanon aoa aika bati ibukini kamaiuara ngaira ake aman mwaane.

I karekea angau n te bwai ae riki aei ao I a aki rereirei ma I a nanako n airiri ma ataei aika ikawai riki. A a reireinai n taetaebuaka, ni moko, n iraa, ao n oro n au timoi. Kioina ngkai I kani bwaobwaotinia tabemwaang, I a reireinai te itau, te kaunrabwata, ao te iranikai, ao aron naba kabonganaani bwaai ni kamamate. I a riki bwa te roro n rikirake ae iowawa. I aki toki n irekereke ma te kakatii, ao n tabetai I a raraabuabua ao ni kitanaki bwa N na mate n te kawai. Ai korakorara nanokawakin tinau irou ngke e a norai n arou aei ao n anaai ma n ienikuri n uotai nakon te onnaoraki!

Ngke ai 16 au ririki ao e a kawara mwengara raoraou ngke I uarereke ae arana Jorge. E tuangira ae ngaia temanna Ana tia Kakoaua Iehova ao e kan tibwaa te rongorongo ae kakawaki nakoira. E a kabwarabwaraa ana onimaki ni kabongana te Baibara. I tuai mani wawareka te Baibara, ngaia are I ingainga n reiakina taekan aran te Atua ma ana kantaninga nako. E tuatua Jorge bwa e na reirei n te Baibara ma ngaira ao ti a kariaia.

I rangi ni kabebeteaki n reiakinan te koaua ibukin te ai ni moone, ae ngaia bon tiaki te reirei man te Baibara. (Taian Areru 146:4; Te Minita 9:5) Ngke I a ataa anne ao I a aikoa manga namakinna ae kakamaaku te Atua. Ma I a taraia bwa te Tama ae tatangira, ae e tangira ae te kabanea n raoiroi ibukia natina.

Ngke I a tabe n ririkirake n au reirei n te Baibara, ao I noria bwa  I a riai ni bitii aroarou. I riai ni karikirakea te nanorinano ao ni katoka te iowawa. E buokai te reirei ni kairiri ae koreaki n 1 I-Korinto 15:33. E taekinaki iai ae kangai: “A urui aroaro aika raraoi taian iraorao aika bubuaka,” ke e kangai n te kabwarabwara mai nano, “a kabuakakai aroaro ni maiu aika raraoi.” I a ataia ae ngkana I kani bita aroarou, I riai ni katoka te iraorao ma aomata ake a kairaraangai nakoni baika bubuaka. Ngaia are I a onei mwia raoraou nikawai irouia kaain te ekaretia ni Kristian ni koaua, ake aomata ake a kaekaetii baike a kakaokoro n iango iai ni kamanenaan ana boto n reirei te Baibara ao tiaki n te un ke waaki n iowawa riki tabeua.

Te kibu riki teuana ae I rotaki iai bon I-Rom 12:17-19. E taekinaki iai ae kangai: “Tai kabooa ana buakaka te aomata n te buakaka. . . . Karaoa ami kabanea ni konaa ni karekea te rau ma aomata ni kabane. . . . Tai irantangaingkami . . . bwa e koreaki ae kangai: ‘E taku Iehova: “Au bwai te karekekai, N na kabooi mwin aia mwakuri aika buakaka.”’” I a kakoauaa ae e na boni katoka te ribuaka Iehova, n te anga are e bon taku ao n te tai are e baireia. I a tabe n tokanikai teutana imwin teutana i aon anuani maiuu ae te iowawa.

I aki kona ni mwaninga te tairiki teuana, i aoni kawaiu n okira mwengau. I boni kamwaruaaki irouia kaain te kaeng n roro n rikirake teuana ae I unun ngkoa ma ngaiia, ao e a kibarai naba aia bwaoti n orea akuu ao e takarua ni kangai: “Katokaa kaim!” N te tai anne ao I kakimototoa au tataro nakon Iehova ni butiia bwa e na buokai bwa N na nanomwaaka ni kiarakiu aei. E ngae ngke I rangi ni kani katokai kaiu, ma e bon reke angau n rabanako. N te bong are imwina ao I a tii kaitiboo naba ma te bwaoti n te kaeng arei n tii ngaia. I un ao e korakora nanou ni kan raira kaiu, ma I a manga tataro naba ni bubutiia Iehova bwa e na buokai n taotaona uniu. I rangi ni mimi bwa e a keerakeai naba te roro n rikirake arei ao e taku: “Kabwaraa au bure n te bwai are riki ngkebong. Ni koauana raoi, I rangi ni kani katotongko. I kan reirei n te Baibara.” Ai kukureira ngai ngke I kona n taotaona uniu! I kakaitau ibukin anne bwa ti a uaia ni moana ara reirei n te Baibara.

E kananokawaki bwa a aki reitaanako aia reirei n te Baibara au utu n te tai anne. Ma I kamatoaa nanou bwa N na reitaanako au reirei ao N na aki kariaia temanna ke te bwai teuana bwa e na katokai. I ataia ae te ikoikotaki ma ana aomata te Atua e na boni kabebetea nanou ao n anganai te utu ae I kainnanoia. I teimatoa n ririkirake ao n 1991 I a bwabetitoaki bwa temanna Ana tia Kakoaua Iehova.

I rangi ni kiunun, I kani bwaobwaotinia aomata, ao I iowawa. Ma e boni bita raoi maiuu ana Taeka te Atua. I a titibwaa ngkai rongorongon te rau man te Baibara nakon ane e kan ongora. I kakabwaiaaki bwa ai 23 au ririki ni beku ni kabwanina au tai.

I nanon tabeua te tai ao I kakaraoa te mwakuri n anganano n aia aobiti n tararua Ana tia Kakoaua Iehova i Mexico. Ni menau iai ao I a kaitiboo ma te tari te aine temanna ae rangi n ingainga nanona ae Claudia, ao ti mare n 1999. Ai kakaitaura ngai nakon Iehova ngkai e kakabwaiaai n anganai raou ae kakaonimaki ni koaua aei!

Ti kaai ni beku n te ekaretia ni Mexico ae a kabongana te taetae n te bai, ni buokiia iai bonotaninga n reireinia taekan Iehova. Imwina riki ao ti a kaoaki bwa ti na mwaing nako Belize bwa ti na angareirei n te Baibara nakoia kaain te aba anne. E ngae ngke e aki rangi ni bati ara bwai riki ikai, ma ti karekei bwaai ni kabane aika ti kainnanoi aika ti na kukurei iai. Ti aki kona n iangoia bwa ti na bita aroni maiura ae kakukurei aei.

Imwina riki ao e a manga reita ana reirei tinau n te Baibara ao e a bwabetitoaki. E a riki naba ngkai tariu are karimoau ma buuna ao natiia, bwa kaain Ana tia Kakoaua Iehova. A a beku naba ibukin Iehova raoraou tabeman rimoa ake I tibwaa rongorongon te Tautaeka n Uea nakoia.

E kananokawaki bwa iai tabeman kaain au utu ake a a tia ni mate ibukina bwa a aki roko n te bita anuaia ae te iowawa. Ngke arona bwa I teimatoa n toua te kawai anne, ao N na boni bae naba n tia ni mate. I rangi ni kakaitau ngkai e katikai Iehova nakoina ao nakoia taan taromauria, ake a a tia n reireinai ma te taotaonakinnano ao te akoi bwa N na maiuakin ana boto n reirei te Baibara.