Akea ae ataa kaekaana i nanoni nga ma nga te ririki, ao mirion ma mirion ake a mate ni butinakon aoraki aika kamamate. Ma imwina riki ao a ataa te koaua i aon aei taan rabakau. A a kunea bwa a rereke aoraki mani mannaoraki aika bingingi, n aron te bacteria ke te virus. Kunean te koaua anne, a a buokaki iai aomata bwa a na totokoi ke ni katoki aoraki aika bati, ao ai birion ma birion ngkai aika a abwabwaki riki maiuia ao ni marurung riki.

Ma tera aron titiraki aika kakawaki aika tabeua aikai? Ao e na tera aron rotakim ni kakaaeani kaekaan raoi titiraki aikai?

• Antai te Atua?

• Antai Iesu Kristo?

• Tera Ana Tautaeka n Uea te Atua?

• Tera kanoan taai aika imwaira?

Mirion ma mirion ake a a tia ni kunei kaekaan titiraki aikai ao e a nakoraoi riki maiuia. Ko kona naba ngkoe ni buokaki ni kaekaan titiraki aikai.

Ko bae n iango ni kangai, ‘E kona n reke ataakin te koaua?’ Bwa e a taraa ni kangaanga riki kunean te koaua i aoni baika bati. Bukin tera?

A a bati aomata aika aikoa onimakini tautaeka, bitineti, ke taabo ni kanakorongorongo, bwa a na taekina te koaua. A noria bwa e a kangaanga ataakin te kaokoro i marenani baika koaua, koaua aika aki tabwanin raoi, ao ai keewe aika aongkoa a kona n onimakinaki. N te waaki ae e a taabangaki iai te babakanikawai ao rongorongo aika kewe, a aikoa inanoi aomata n te bae e boni koaua raoi ao kakawakina ibukia.

Ma e ngae n anne, a boni kona n reke kaekaan raoi titiraki aika rangi ni kakawaki ibukin te maiu. N te aro raa? Ngkana ko kabonganai rabakaum ake ko taneiai ni kabonganai ni katoabong.

Ko kakakaaea te koaua ni katoabong. Iangoa te bae rinanona Jessica. E taku: “E rangi ni korakora rabwarabwatakin natiu n te peanut, ao e kona ni kabuanibwai ngkana tii teutana naba.” E riai n tarai raoi amwarake Jessica ake e karekei bwa a raoiroi ibukin natina. “Te moanibwai ae I karaoia I wawareki baike a mwakoro i aon amwarake ao n nori renganaia. Imwina, I a manga karaoa riki au kakaae ao I bon reitaki naba ma te tabo ni karaoamwarake, ni kamatoaa raoi bwa bon akea te peanut n te amwarake aei. I kabatiaa naba au kakaae i aoni bwaai tabeua bwa I aonga n ae l boni koaua raoi bwa I tau n onimakina te kambwana ni karaoamwarake aei ke I aki.”

A kona n aki bati ni kakawaki kaekaan titiraki ake ko kataia ni kakaaei ni katoabong, ni kabotauaki ma baike e kaaitarai Jessica, ma ko kona ni kabonganai baika i nano aikai, ni kakaaei iai kaekaan titiraki n aron are e karaoia Jessica:

• Ataa raoi te rongorongo.

• Karaoa riki am kakaae.

• Taraia raoi bwa a boni koaua baike ko kabotoa am kakaae i aoia.

E kona naba ni buokiko te aeka ni kakaae aei bwa ko na kunei raoi kaekaan titiraki aika rangi ni kakawaki ibukin te maiu. N te aro raa?

Ngkana e kakaaei koaua man te Baibara Jessica, e kabongana naba te aeka ni kakaae are e kakaraoia ni kaineti ma te amwarake are e rabwatabwataki iai natina. E taku, “E buokai te wareware raoi ao te kakorakora ni kakaae bwa N na kunea ana koaua te Baibara.” N aron Jessica, iai mirion ma mirion ake a a tia n reiakina ana kaeka te Baibara ibukin titiraki aikai:

• E aera ngkai ti mena ikai?

• Tera ae riki n te mate?

• Bukin tera ngkai e riki te rawawata?

• Tera ae e karaoia te Atua ibukini katokan rawawata ni kabane?

• Ti na kangaa ni karekea te kukurei n ara utu?

Ko kona ni karekei kaekaan raoi titiraki aikai ao tabeua riki mani warekan te Baibara ao karaoani kakaae riki tabeua n te atureti n te intanete ae www.pr2711.com.