TE KATANGITANG bon te bwai ae rangi ni kakawaki n aia katei ngkoa tibun Iteraera. E bati te tai ae oti iai taekani bwaai ni katangitang ao anene n te Baibara. Ni koauana, tao teuana katebwinani mwakoron te Baibara aika taian anene, n aroni booki aika Taian Areru, Ana Anene Toromon, ao Bwaebwaeti. E taekinna te boki ae Music in Biblical Life bwa e kaotaki raoi n te Baibara bwa a kamanena te katangitang tibun Iteraera n aia mwakuri aika bati ni maiuia.

Te katangitang i nanoni maiuia ni katoabong. A katangi bwaai ni katangitang ao n anene tibun Iteraera ni kaotii aia namakin. (Ita. 30:29) A katangitangi tamboriin aine, a anene ni kimwareirei ao ni mwaie n taini kaueaan te uea ae boou, n taian toa, ao ngkana e tokanikai te aba n te buaka. (MotiTae. 11:34; 1Tam. 18:6, 7; 1Uea 1:39, 40) A anenei naba anene aika kananokawaki tibun Iteraera ngkana a tanginiwenei. (2Rong. 35:25) E taekina aei McClintock ao te Strong’s Cyclopedia, “A tatangira te katangitang taian Ebera.”

Te katangitang n ana auti te uea. A kukurei uean Iteraera n ongongora te katangitang. E wetea Tawita te Uea are Tauro nakon ana auti bwa e na riki bwa te tia katangitang. (1Tam. 16:18, 23) Imwina riki ngke e a riki Tawita bwa te uea, e a karaoi bwaai ni katangitang, e korei anene aika tamaroa, ao e barongaa te katangitang are aneneaki n ana tembora Iehova. (2Rong. 7:6; Amota 6:5) Iai taan anene mwaane ao aine n ana auti te Uea are Toromon.—TeMin. 2:8.

Te katangitang n te taromauri. Ae kakawaki riki, a kamanena te katangitang tibun Iteraera n taromauria iai Iehova. Ni koauana, 4,000 mwaitiia taani katangi bwaai ni katangitangi n te tembora i Ierutarem. (1Rong. 23:5) A katangi timbara, bwaai ni katangitang aika iai karaiia, abi, ao taiani buu. (2Rong. 5:12) Ma tiaki tii taan katangitang aika mwaatai aikai aika a taromauria Iehova ma te katangitang. A bati tibun Iteraera aika anenea te Anene n Ararake i nanoni mwanangaia ni kaei taian toa n te ririki i Ierutarem. (TaiAre. 120–134) Ao ni kaineti ma te koroboki n Iutaia, a anenenei taian Areru n Nebonebo a tibun Iteraera n taini kanakin amwaraken te Toa ae te Riao.

E bon teimatoa naba ni kakawaki te katangitang irouia ana aomata te Atua. (Iak. 5:13) Ti anene ibukina bwa bon iteran naba ara taromauri. (IEbe. 5:19) Ti katiteuanaaki ma raora ni Kristian n te katangitang. (IKoro. 3:16) Ao ti kakorakoraaki iai ngkana ti taonaki ni kangaanga. (Mwa. 16:25) Te katangitang bon te anga ae tamaroa ae ti kaota iai onimakinan Iehova iroura ao tangirana.