E taekinaki n ana Euangkerio Ruka bwa Iesu e kauka te nira ni boki ae Itaia ma ni warekia, ao e a manga niria ni kainna. Ni kabanean ana Euangkerio Ioane, e a taekina te nira ni boki are e aki kona ni karin iai ana mwakuri Iesu aika kamimi ni kabane.​—Ruka 4:16-20; Ioane 20:30; 21:25.

A kangaa ni karaoaki nira ni boki? A bane ni kanimwaki mwakorokoroni kunin te man, ke te babirati ike e a riki iai te bwai ae irariki ma n ananau, ke te ninira teuana. E a kona ngkanne n niraki ni katobibia te kai ma iterana ae korobokiaki e mena i nanona. E taraaki te koroboki aei bwa e tei n eti rikaaki ni bangaki n raababan te nira ni boki. Iai kaai mai tabona ni kauaitera ike e kona ni kabongana te tia wareware ni kaukia nakon are e tangiria ni baina teaina ao n niria rake ma baina are teaina ni karokoa e reke te kibu.

E taekinaki n te boki ae The Anchor Bible Dictionary bwa “iai raoiroin te nira ni boki ngkai e ananau (angiin te tai tao 10 te mita) bwa e boni babane iai kanoan te boki teuana.” N te katoto, e iangoaki ana Euangkerio Ruka bwa e kainnanoa te roora ae tao 9.5 te mita abwakina. N taai tabetai, a boni koreaki taboia ake i eta ao ake i nano ni kaboraoaki n atibun te warekeno, ao ni kataaeaki.

Ni moanakin te nakoa n ibonga irouia I-Iteraera, tii temanna te mwaane are e beku bwa te ibonga ae rietata, ae te mwioko ae ko anganaki n uaa matem. (Warekaia Iteraera 35:25) E moani beku iai Aaron. Imwina e a oneaki mwin te karo iroun natina te mwaane ae te karimoa. (Te Otinako 29:9) A bati mai buakoia kanoan Aaron aika mwaane ake a beku bwa ibonga, ma tii tabeman ake a riki bwa ibonga aika rietata.

Ngke a tautaekanaki I-Iteraera irouia ianena, ao iai taan tautaeka aika tiaki I-Iteraera ake a rineiia ke a kakerikaakia ibonga aika I-Iutaia n oin nanoia. Ma e taraa n ae a rineaki ibonga aika boou man utu aika kakannato, ma n angiin te tai mai buakoia kanoan Aaron. E mataata bwa te taeka ae “mataniwi n ibonga” e kaineti nakoia ibonga aika bubura nakoaia. Tao e nanonaki naba iai mataniwia koraki n ibonga ake 24, aomata ake a kakannato i buakoia utu n ibonga ake iai temanna i buakoia ae riki bwa te ibonga ae rietata, ao ibonga aika rietata rimoa ake a a tia ni kakerikaakaki n aron Annati.​—1 Rongorongo 24:1-19; Mataio 2:4; Mareko 8:31; Mwakuri 4:6.