Iangoia bwa ko a tibwa roko n te aba ae ko ianena iai. Ko a kaitiboo ma aomata, taiani katei, amwarake, ao te mwane, aika ko aki taneiai iai. E boni bae n ebu nanom iai.

Ko bae naba n namakina anne ngke ko moani wareka te Baibara. Ai aron ae ko a oki rikaaki iai nakon taai ake ngkoangkoa aika ko aki atai. Ikanne are ko a boo iai ma aomata aika aranaki bwa I-Biritia, ao n nora te katei ae boou ae ‘raeuaakan taiani kunnikai,’ ke ko a ataa iai te amwarake ae te manna ao te mwane ae te turakemwa. (Te Otinako 16:31; Iotua 13:2; 2 Tamuera 3:31; Ruka 15:9) A kona ni kaminonano baikai ni kabane. Tao ni kaineti ma kawaran te aba ae ko ianena iai, tiaki ko na kakaitau ngkana iai ae buokiko ni kabwarabwarai bwaai nakoim?

Man te tai are a koreaki iai koroboki aika tabu n te ka-16 n tienture B.C.E., ao iai te ibuobuoki ae karaoaki bwa a aonga n ota aomata iai. N te katoto, e ‘kabwarabwarai’ baika koreaki n te koroboki ae tabu Mote are aia moan tia kairiri kaain te natannaomata ae Iteraera.—Te Tua-Kaua 1:5, BK.

Tebwi tabun te tienture imwina ao bon iai naba taan angareirei n te Koroboki ae Tabu. N 455 B.C.E., ao a a ikotaki ni maraen te kaawa ae Ierutarem te koraki teuana ae bubura aika I-Iutaia ao raoia ataei aika bati. Ao a “wareware n te boki [ae tabu]” ni kabaibati taan angareirei man te Baibara n te tai anne. Ma iai riki te bwai ae a karaoia. A buokiia aomata ‘bwa a na ataa nanon te wareware.’—Neemia 8:1-8, BG.

Nimaua te tienture imwina, ao e a karaoa te aeka ni mwakuri n angareirei anne Iesu Kristo. E bon ataaki riki irouia aomata bwa te tia reirei. (Ioane 13:13) E reireinia te koraki ae bati, ao e reireina naba temanna ma temanna. N te tai teuana, ao e a taetae nakoia aomata aika uanao, ike e a karaoa iai te kabwarabwara ae rangi n ataaki ae te Kabwarabwara i aon te Maunga, ao “a a miroaroa te koraki n arona n angareirei.” (Mataio 5:1, 2; 7:28) N tain te abue n 33 C.E. ao e a “kabwarabwaraa raoi nanon te Koroboki ae Tabu” Iesu nakoia uoman taan rimwina, ngke a nakonako n te kawai nakon te kaawa ae uakaan ma Ierutarem.—Ruka 24:13-15, 27, 32.

Bon taan angareirei naba taan rimwin Iesu man Ana Taeka te Atua. N te tai teuana, ao e a wareka kanoan te Koroboki ae Tabu te mataniwi temanna ae te I-Itiobia. E kawaria te tia rimwin Iesu temanna ae Biribo ao e titirakinna ni kangai: “Ko bon ota n te bwai ane ko warekia?” E kaeka te I-Itiobia ni kangai: “N na kanga n ota ngkana akea ae reireinai?” Ngaia are e a kabwarabwaraa nakoina nanon te koroboki anne.—Mwakuri 8:27-35.

N aroia taan angareirei n te Baibara rimoa, a uataboa naba te mwakuri n angareirei man te Baibara Ana Tia Kakoaua Iehova, n aaba aika 239 n te aonnaba. (Mataio 28:19, 20) A katoa wiki ni buokiia aomata aika e riaon ruaiwa te mirion mwaitiia, bwa a na ota ni kanoan te Baibara. Angina mai buakoia aomata aika reiakinaki aikai bon tiaki Kristian mai mwaina. Bon akea boon te angareirei aei ao e kona ni karaoaki n am auti ke n te tabo ane ko tangiria. A kukurei tabeman n reirei i aon te tareboon ke n te viteo rinanon te kaombiuta ke te mobwaao.

Taiaoka ma reitaki ma Ana Tia Kakoaua Iehova temanna bwa ko aonga ni karekea kakabwaiaam man te waaki aei. Ane ko na noria bwa te Baibara bon tiaki te boki ae kangaanga te ota iai, ma e “manena ibukin te angareirei, ao ibukini boaan te aomata, ibukini kaetani bwaai, ao ibukin te reirei ni kaetieti ae boraoi ma ana kaetitaeka te Atua,” bwa ko aonga n “taubobonga . . . ma n tauraoi raoi nakoni mwakuri aika raraoi ni kabane.”—2 Timoteo 3:16, 17.