E mwanenaki ara mwakuri ae katobibia te aonnaba ni bwaintangira aika aki tebonaki mairouia Ana Tia Kakoaua Iehova n tatabemania nako. a A tauraoi bwaoki ni bwaintangira n ara tabo n taromauri, ao a karinanaki naba aanga ni bwaintangira, i aani Bwaintangira n ara atureti n te intanete. A katauraoaki aanga ni bwaintangira aika kakaokoro ibukin ara mwakuri ae katobibia te aonnaba, bwa e aonga n rineia te aomata bwa e na bwaintangira ibukini kabanemwane n te aono, ke ni kauoua.

A aki kantaningaaki Ana Tia Kakoaua Iehova bwa a na anga te kabwianibwai ke a na anga te mwaiti ae katauaki ke iraua te katebubua man aia karekemwane. (2 I-Korinto 9:7) Ti aki rikomwane ke n anaa te kanrin n ara taromauri, a aki naba kabooaki ara taani kairiri ibukini karaoani bwabetito, taunimate, maare, ke waakin ara Aro riki tabeu. Ti aki karikirake ni kaboonakoan taiani kabuki, bwaai ni boobwai, te takaakaro n te bingko, bukamaru, kaboonakoani katairiki, tiiketi ni katekeraoi, ke bwaai riki tabeua n aron aikai, ao ti aki naba bubutii te mwane ni buoka. A aki kakatanoataaki rongorongoia naake a aanga aia bwaintangira. (Mataio 6:2-4) Akea taiani katanoata n anainano n ara atureti n te intanete ao ni baika ti boretii.

A kakatauraoi ni katoa namwakaina ribooti ibukin te mwane aia ekaretia ni kabane Ana Tia Kakoaua Iehova n tain te taromauri, ao a kona n noria aomata nako. E katoatai n tuoaki mwin ana akaunti te ekaretia teuana ma teuana bwa a aonga n roko raoi ni nneia taiani bwaintangira.​—2 I-Korinto 8:​20, 21.

• Bwaoki ni bwaintangira: Ko kona ni karina am bwaintangira te mwane ke te tieke ni bwaoki ni bwaintangira n Taabo n Taromauri, n Taabo n Runga, ke te tabo riki teuana ae boo iai ara taromauri.

• Bwaintangira rinanon te intanete: N aaba aika bati, ko kona n anga am bwaintangira i aani “Bwaintangira Nakoia Ana Tia Kakoaua Iehova,” rinanon te credit card, te debit card, kamwaingan am mwane man te bangke, ao tabeua riki rinanon te intanete. b Tabeman taani Kakoaua a ‘kaokoroa aia bwai ni kawakinna’ ni katoa namwakaina rinanon teuana man aanga ni bwaintangira aikai.​—1 I-Korinto 16:2.

• Bwaintangira aika baireaki: Iai tabeua aanga ni bwaintangira aika kainnanoa te moantaai ni babaire ao te ibuobuoki mairoun te rooia. Aeka ni babaire aikai, a kona ni kauarerekea mwaitin te taekiti ae ko riai ni kabwakaa n abam. Iai ake e bwabwaka te mwane nakoia mani botaki tabeua n aia tai maiu, ke imwini mateia. Taiaoka reitaki ma aia aobiti n tararua Ana Tia Kakoaua Iehova n am aono ibukin rongorongona riki ngkana ko kani bwaintangira rinanoni baikai:

  • te mwane n te bangke

  • te kabwakamwane ibukin te kaboomwi ao te babaire ibukin te mwane n ritaea

  • te tibwa n te kambwana ao te boraraoi ibukin te tangomwane

  • reeta ni kaburebwai ao te mwane n tania

  • wills and trusts

Ibukin rongorongon riki aanga ni bwaintangira aika tauraoi n am aono, nora “Bwaintangira Nakoia Ana Tia Kakoaua Iehova.”