Tera Ana Taeka te Baibara Ibukin te Aki Mamatam?
Ana kaeka te Baibara
N taai ake a karakinaki n te Baibara, ao e kariaia Iehova te aki mamatam ngkana e karaoaki ni bukina ae riai. Ma ngkana e karaoaki ni bukina aika kairua, e a aki ngkanne kukurei iai te Atua. Ma e aki tua te Baibara ke ni katabuaka te aki mamatam ni boong aikai.
Taai raa ake a a aki mamatam iai tabeman aomata ake a karakinaki n te Baibara?
Ngkana a ukera ana ibuobuoki ao ana kairiri te Atua. A aki mamatam aomata ake a mwananga nako Ierutarem, ni kaota iai nanoia ae koaua n aia bubutii nakon te Atua ibukin ana ibuobuoki. (Etira 8:21-23) N tabetai a aki mamatam Bauro ma Barenaba, ngkana a rineiia unimwaane n te ekaretia.—Mwakuri 14:23.
Ngkana a kaatuui aia iango i aon ana kantaninga te Atua. E aki mamatam Iesu i nanon 40 te bong imwini bwabetitoana, bwa e katauraoia nakoni karaoan nanon te Atua n ana mwakuri ni minita.—Ruka 4:1, 2.
Ngkana a kaota aia rairannano man aia bure rimoa. E kangai te Atua nakoia I-Iteraera ake a aki kakaonimaki rinanon te burabeti are Ioera: “Kam na okirai ma nanomi ni kabane, ma te aki mamatam ao te tang ma te tanginiwenei.”—Ioera 2:12-15.
N tain te Bong ni Kabwarabure. Iai n te Tua are e anga te Atua nakon te natannaomata are Iteraera, te tua teuana ae te aki mamatam n tain te Bong ni Kabwarabure. a (Nakoaia Ibonga 16:29-31) E bon riai te aki mamatam n te tai aei, ibukina bwa a kauringaki iai I-Iteraera ae a aki kororaoi ao a kainnanoa kabwaraan aia bure iroun te Atua.
Baikara bukin te aki mamatam tabeua aika aki eti?
Anaakin nanoia tabemwaang. E angareirei Iesu bwa te aki mamatam e riai ni karaoaki tiaki i mataia aomata, ao bon tii i marenan temanna ma te Atua.—Mataio 6:16-18.
Te kan raoiroi. Tiaki nanona bwa te aki mamatam e kaota te aomata bwa e raoiroi ke e rianako riki ana onimaki.—Ruka 18:9-14.
Ibukini kabwaraan te bure ae e karaoaki n oin te nano. (Itaia 58:3, 4) E tii butimwaea te aki mamatam te Atua ae irianaki n te ongeaba ao te rairannano ni koaua ibukini buure nako ake a karaoaki.
E karaoaki bwa kaanga katein te Aro. (Itaia 58:5-7) N te itera aei, te Atua kaanga aekan te karo ae aki kukurei ngkana a kaotiota tangirana natina tii ibukina bwa a kabaeaki iai, ao e aki nako raoi mai nanoia.
A riai n aki mamatam Kristian?
A aki. E tuangia I-Iteraera te Atua bwa a na aki mamatam n te Bong ni Kabwarabure, ma e katoka te waaki anne imwini maten Iesu are e a kabwarai raoi iai aia bure aomata ake a rairi nanoia. (Ebera 9:24-26; 1 Betero 3:18) A aikoa mena Kristian i aan te Tua Rinanoni Mote, ae kanoana naba te Bong ni Kabwarabure. (I-Rom 10:4; I-Korote 2:13, 14) Ngaia are e a bon nakoia Kristian n tatabemania nako bwa a na karaoa te aki mamatam ke a na aki.—I-Rom 14:1-4.
A ataia Kristian ae e aki boto aia taromauri i aon te aki mamatam. E aki taekinaki n te Baibara bwa e irekereke te aki mamatam ma te kukurei. Ma e kanikinaeaki aia taromauri Kristian ni koaua n te kimwareirei, are bon aroaron Iehova, ae “te Atua ae kukukurei.”—1 Timoteo 1:11; Te Minita 3:12, 13; I-Karatia 5:22.
Iango aika kairua ni kaineti ma ana koaua te Baibara ibukin te aki mamatam
Te iango ae kairua: E tua te abotoro Bauro bwa a na aki mamatam taanga.—1 I-Korinto 7:5, King James Version.
Te koaua: Ni Baibara nikawai ake nira ni boki ao akea taekan te aki mamatam are n 1 I-Korinto 7:5. b E teretere ngkanne bwa bon taani kaewea te Baibara ake a a manga karina te aki mamatam, tiaki tii n te kibu aei ma ni Mataio 17:21, Mareko 9:29, ao ni Mwakuri 10:30 naba. Angiin rairai n te Baibara n taai aikai a aki karina taekan te aki mamatam ni kiibu aikai.
Te iango ae kairua: A riai Kristian n aki mamatam bwa kauringaani boong ake 40 ake e aki mamatam iai Iesu n te rereua imwini bwabetitoana.
Te koaua: Akea ana taeka Iesu ae tua iai karaoan te aki mamatam anne, ao akea naba n te Baibara taekan ae a karaoa naba anne Kristian ake rimoa. c
Te iango ae kairua: A riai Kristian n aki mamatam ni kauringaani maten Iesu.
Te koaua: E aki tua Iesu nakoia taan rimwina bwa a na aki mamatam ngkana a kauringa matena. (Ruka 22:14-18) E ngae ngke e taekinna Iesu ae a na aki mamatam taan rimwina ngkana e mate, ma e aki kateia bwa te tua ma e tii kaota te bae e na riki. (Mataio 9:15) Iai ana kaetieti te Baibara nakoia Kristian ake a baki, bwa a na amwarake ni mwengaia imwaini karaoani Kauringaani Maten Iesu.—1 I-Korinto 11:33, 34.
a E kangai te Atua nakoia I-Iteraera: “Kam riai ni kaota nanokawakimi ibukin ami bure,” ke “kam na karawawatai tamneimi,” n te Bong ni Kabwarabure. (Nakoaia Ibonga 16:29, 31; Te Baibara) E ataaki te taeka aei bwa e kaineti ma te aki mamatam. (Itaia 58:3) Ma te Baibara ae te Contemporary English Version e rairia ni kangai: “Kam na tai amwarake ni kaota iai nanokawakimi ibukin ami bure.”
b Nora te boki ae A Textual Commentary on the Greek New Testament, ae koreia Bruce M. Metzger, ae te Katenua n Edition, iteraniba 554.
c E taekinaki ae kangai n te New Catholic Encyclopedia ni kaineti ma te aki mamatam i nanon 40 te bong ae aranaki bwa te Karemo: “Ni moan tienture ake tenua, ao maanin te aki mamatam ae kakaraoaki imwain te bwakate [Itita] e aki kona n raka i aon teuana te wiki, ao n angiin te tai tii tebongina ke uabong. . . . E moan taekinaki te aki mamatam i nanon 40 te bong n te kanimaua n tua n te Council of Nicaea (325). Ma iai taan rabakau tabeman ake a taku bwa tiaki te Karemo ae nanonaki ikai.”—Te Kauoua n Edition, Volume 8, iteraniba 468.
Ko Bae Naba n Tangira
IESU—TE KAWAI, TE KOAUA, AO TE MAIU
E Aera A Aki Kakaraoa te Aki Mamatam Taan Rimwin Iesu?
E katauraoa te kaeka Iesu ni kamanena te kaikonaki ibukini nneni wain.
RONGORONGORA
Bubutii Reireim n te Baibara ae Aki Kabooaki ma Ana Tia Kakoaua Iehova
Discuss a Bible topic with Jehovah’s Witnesses, or try out our free Bible study program.