A aki titeboo Aaro nako. E oti n te Baibara taekaia Aaro aika a aki kakukureia te Atua. Iai uoua aeka n Aro aika a aki kakukureia te Atua.

1: A taromauri atua aika kewe

 A kakabonganaaki n te Baibara taeka aika “baika kewe” ao “akea uaaia,” ngkana e na taekinaki taekan taromaurian atua aika kewe. (Ieremia 10:​3-5; 16:​19, 20) E tua Iehova a ae te Atua nakon te natannaomata are Iteraera rimoa, ni kangai: “Ko na tai karekeia riki atuam i rarikiu.” (Te Otinako 20:​3, 23; 23:24) E “rangi n un Iehova” irouia I-Iteraera ngke a taromauri atua riki tabeman.​—Warekaia Iteraera 25:3; Nakoaia Ibonga 20:2; Taani Motikitaeka 2:​13, 14.

 Anne naba ana namakin te Atua ni boong aikai n taromauriaia aika “tiaki atua ni koaua.” (1 I-Korinto 8:​5, 6; I-Karatia 4:⁠8) E tangiriia naake a kan taromauria bwa a na katoka te reitaki ma taani kakaraoi aia waaki aaro aika kewe, ao e kangai: “Otinako mai buakoia, ao kaokoroingkami.” (2 I-Korinto 6:​14-​17) Ngkana ngaia bwa a titeboo Aaro nako ao a bane ni kairiri nakon te Atua, e aera ngkanne ngkai e tua nakoira aei te Atua?

2: Taromaurian te Atua ae koaua n te aro ae e aki kukurei iai

 Ngke a taromauria te Atua I-Iteraera n aron ae a kakaraoia taan taromauri atua aika kewe, ao Iehova e ribai waaki aikai aika rengana te aro ae koaua ma te aro ae kewe. (Te Otinako 32:8; Te Tua-Kaua 12:​2-4) E kabuakakaia mataniwin Aaro n ana tai Iesu, ibukin aroia n taromauria te Atua. A baka n taua te Aro, ma bon taani mwamwanaa te aba bwa a “kaaki taekani baike a kakawaki riki n te Tua, n aron te motikitaeka ae riai, te nanoanga, ao te onimaki.”​—Mataio 23:⁠23.

 Ni boong aikai naba, bon tii te Aro ae aanaki ana koaua n te Baibara ae e kairiia aomata nakon te Atua. (Ioane 4:​24; 17:17; 2 Timoteo 3:​16, 17) A katikiianako aomata mairoun te Atua, Aaro aika kauntaba aia angareirei ma te Baibara. A bati angareirei aika taku aomata bwa a nako man te Baibara, n aron te Temanna n Teniman, te taamnei ae aki mamate, ao te kammarakaki n aki toki, ma ni koauana a irekereke ma taromauriaia atua aika kewe. Bon “akea bongan” aeka n taromauri aika boutokai aeka n angareirei aikai, ibukina bwa a onei mwin ana kaetieti te Atua n aia katei.​—Mareko 7:​7, 8.

 E ribaa te mwamwanaa te aba te Atua. (Tito 1:​16) A buokaki aomata n te Aro ae koaua bwa a na kaan riki ma te Atua. A na aki tii reireinaki iai katei aika irekereke ma te taromauri, ma e riai te Aro n rotii aia motinnano ma bwaai nako ake a kakaraoi i nanoni maiuia. N te katoto, e kangai te Baibara: “Ma ngkana iai ae e taku bwa e taua te Aro, ma e aki taua aron newena, ma e teimatoa ni mwamwanaia i bon irouna, ao akea manenan ana taromauri. Aio te aeka n Aro ae itiaki ae aki kamwaraeaki i matan Atuara ae Tamara: tabeakinaia ataei ake a a tia ni mate aia karo ao aine ake a a tia ni mate buuia, n rawawataia, ao te teimatoa n aki kabarekaaki naba teutana ni bwain aon te aba.” (Iakobo 1:​26, 27; te kabwarabwara mai nano) N te King James Version ao e kabonganaaki te taeka ae “te Aro ae itiaki” ibukin rairan te taromauri ae itiaki ao n aki mwamwanaa te aba.