Eng, iai te Riaboro. Boni ngaia “te tia tautaekania kaain te aonnaba,” ae te anera ae karikaki are e a manga riki ni buakaka ao ni karitei nakon te Atua. (Ioane 14:30; I-Ebeto 6:11, 12) A kaotaki anuan te Riaboro n te Baibara rinanon aara aikai ma kabwarabwaraaia:

•   Tatan, ae nanona “te tia Kaaitara.”—Iobi 1:6.

•   Te Riaboro, ae nanona “te tia Uarao.”—Te Kaotioti 12:9.

•   Te naeta, ae kabonganaaki n te Baibara ae nanona “te tia Bureburea te aba.”—2 I-Korinto 11:3.

•   Te tia Kariri.—Mataio 4:3.

•   Te tia Kewe.—Ioane 8:44.

Tiaki kaikonakan te buakaka ae mena i nanora

 Tabeman a iangoa Tatan te Riaboro bwa tii kaikonakan te buakaka ae mena i nanora. Ma iai n te Baibara ana maroro te Atua ma Tatan. E kororaoi te Atua, ngaia are akea te buakaka ae mena i nanona. (Te Tua-Kaua 32:4; Iobi 2:1-6) E kaririaki naba iroun Tatan Iesu are e aki rotaki n te bure. (Mataio 4:8-10; 1 Ioane 3:5) Mangaia are e kaotaki n te Baibara bwa bon iai te Riaboro, ao tiaki tii kaikonakan te buakaka.

 Ti riai ni mimi ngkai a bati aomata aika aki kakoauaa ae bon iai te Riaboro? Ti aki, bwa e taku te Baibara bwa Tatan e mwamwanaiia aomata ibukin uaiakinan te bae e tangiria. (2 I-Tetaronike 2:9, 10) Anne teuana ana bwai ni kamwane ae rangi n nakoraoi, are e a kamatakia iai aomata aika bati bwa a na aki kakoauaa ae iai ngaia.—2 I-Korinto 4:4.

  Te otokaraki: Rutibeero bon aran naba teuana te Riaboro.

 Te koaua: Te taeka n Ebera ae rairaki ni Baibara tabeua bwa “Rutibeero” nanona “ngkoe ae ko raneanea.” (Itaia 14:12) E oti n te rongorongo bwa te taeka aei e kaineti nakon te utu n uea, ke bwaanuea i Baburon, ake e kabwainrangia te Atua ibukini kainikatongaia. (Itaia 14:4, 13-20) E kabonganaaki te taeka ae “ngkoe ae ko raneanea” ni kakanikoaki iai te utu n uea i Baburon imwini kabwakaakia.

  Te otokaraki: E beku Tatan iroun te Atua bwa kaanga “te tia motiki taekaia aomata.”

 Te koaua: Te Riaboro bon te tia kairiribai nakon te Atua, ao tiaki ana toro te Atua. Bon Tatan te Riaboro ae e ekianako ao ni kabuakakaia aomata ake a beku iroun te Atua.​—1 Betero 5:8; Te Kaotioti 12:10.