E kaota kakawakira te Atua n anganakira inaomatara n rinea ae ti na karaoia, ae te konaa ni karaoi oin ara motinnano, ao e aki kamani bairei baika ti na karaoi ke baika a na riki nakoira. Iangoi ana reirei te Baibara aikai.

•   E karikiia aomata te Atua ni katotongana. (Karikani Bwaai 1:26) Ti kaokoro ma maan, bwa maan a kakaraoi bwaai ni kaineti ma aroni karikaia, ma ngaira ti katotonga ara tia Karikiriki ni kona ni kaotiotii aroaro aika te tangira ao te kaetitaeka ae riai. Ao ti katotonga naba ara tia Karikiriki bwa iai iroura te inaomata n rinea ae ti na karaoia.

•   Ti boni kona ni bairea arora nakon taai aika a na roko. E kaungaira te Baibara bwa ti na ‘rinea te maiu n arora n ongo ni bwanaan te Atua,’ ae taekan ae ti na rinea ae ti na ongeaba n ana tua. (Te Tua-Kaua 30:19, 20) Ngke arona bwa akea inaomatara n rinea ae ti na karaoia, e na bon akea uaan te kaungaunga aei, ao bon te bwai naba ni karawawata. N oneani mwin are e na kairoroira te Atua bwa ti na karaoa ae e taku, e bubutiira ma te tangira ni kangai: “Ko bia kaman irii nanon au tua! Ao e na riki raun nanom n ai aron te karaanga.”—Itaia 48:18.

•   E aki kamani baireaki maiura bwa e na nakoraoi ke e na kabwaka. Ngkana ti kani kakorakoraira ni kanakoraoa maiura, ti riai ni mwakuri korakora. E taku te Baibara: “Bwaai nako ake e na karaoi baim, ao karaoia ma korakoram ni kabane.”(Te Minita 9:10) E kangai naba: “A na bon nakoraoi ana babaire te aomata ae mwakuri korakora.”—Taeka N Rabakau 21:5.

 Te inaomata n rinea ae ti na karaoia bon te bwaintangira ae rangi ni kakawaki mairoun te Atua, bwa ti kairaki iai bwa ti na tangiria ma ‘nanora ni kabane’ tii ibukina bwa ti kani karaoia.—Mataio 22:37.

 E angareirei te Baibara bwa Moan te Mwaaka te Atua ao akea temanna ae kona n tiatiana mwaakana bwa bon tii ngaia. (Iobi 37:23; Itaia 40:26) Ma e aki kabongana mwaakana ni kamani bairei iai aroni bwaai ni kabane. N te katoto, e taku te Baibara bwa e ‘taua baangina’ te Atua nakoni Baburon ngkoa, ae te tia kairiribai nakoia ana aomata. (Itaia 42:14) N aron naba anne, e iangoia ngkai bwa e na taona nanona nakoia naake a kabongana buaka inaomataia n aroia ni karuanikaia aomata. Ma tiaki n ae e na teimatoa ni karaoa aei te Atua.—Taian Areru 37:10, 11.