Ti aki. E kaotia te Baibara bwa ti riai n tataro tii nakon te Atua, rinanon aran Iesu. E tuangia taan rimwina Iesu ni kangai: “Kam na tataro ni kangai: Tamara are i karawa, e na tabuaki aram. (Mataio 6:9, New American Bible) Bon akea ana taeka ae e tua iai nakoia taan rimwina bwa a na tataro nakoia taian santo ke santa, anera, ke nakon temanna riki ae tiaki te Atua.

 E tuangia naba taan rimwina Iesu ni kangai: “Ngai te kawai ao te koaua ao te maiu. Akea ae nakon te Tama ngkana e aki rirou.” (Ioane 14:6, NAB) Bon tii Iesu ae kariaiakaki iroun te Atua bwa e na riki bwa te tia raoi ibukira.—Ebera 7:25.

Ao ngkana I tataro nakon te Atua ao nakoia naba taian santo ke santa?

 E taku te Atua ni kaineti ma Tuua Ake Tebwina: “Ngai, ae te UEA ae Atuam, te Atua ae tauaninne ngai.” (Te Otinako 20:5, NAB) N te aro raa ae e “tauaninne” iai te Atua? E oti n te kabwarabwara mai nano n te New American Bible bwa “e tangira ae e na kakaonimaki te aba tii nakoina.” E tua te Atua bwa tii ngaia ae riai ni kakaonimaki te aba nakoina ke n taromauriaki n ikotaki ma te tataro.—Itaia 48:11.

 Ti kauna te Atua ngkana ti tataro nakon temanna riki, taian santo ke santa naba ke anera aika tabu. Ngke e kataia te abotoro Ioane n taromauria te anera temanna, ao e totokoia te anera arei ni kangai: “Tai karaoa anne! Bon te toro naba ngai n ai arom ao n ai aroia tarim ake a kaotiota Iesu. Taromauria te Atua.”—Te Kaotioti 19:10, NAB.