Tera te Bwabetito?
Ana kaeka te Baibara
Te taeka ae bwabetito e nanonaki iai kateboan te aomata i aan te ran ao e a manga waerake. a Anne bukina ae e bwabetitoaki Iesu n te karaanga. (Mataio 3:13, 16) N aron naba anne, e tuatua te mwaane are te I-Tiobia bwa e na bwabetitoaki ngke a a roko “n te tabo ae e bon tau te ran iai.”—Mwakuri 8:36-40.
Ae nanonaki n te bwabetito
E kabotauaki te bwabetito ma te taunimate n te Baibara. (I-Rom 6:4; I-Korote 2:12) Bwabetitoan temanna n te ran, e kaotaki iai bwa e a tia ni mate ni kaineti ma aroarona rimoa, ao e nang moana maiuna ae boou bwa te Kristian ae katabuaki nakon te Atua. Te bwabetito ma mwaneka nako ake a kairiri nakon te bwabetito, bon ana babaire te Atua ibukia aomata, bwa e aonga temanna ni karekea mataniwin nanona ae itiaki, ae boto i aon onimakinan ana karea ni kaboomwi Iesu Kristo. (1 Betero 3:21) Ngaia are e angareirei Iesu bwa a riai ni bwabetitoaki taan rimwina.—Mataio 28:19, 20.
E kamaunaaki te bure n te bwabetito n te ran?
E aki. E taekinaki n te Baibara bwa ti kona n itiaki man te bure tii rinanon raraan Iesu are kawawaeaki. (I-Rom 5:8, 9; 1 Ioane 1:7) Ngaia are ngkana e na kakabwaiaaki temanna n ana karea ni kaboomwi Iesu, e riai te aomata anne ni kaotiota onimakinan Iesu, ni bita maiuna nakoni maiuakinan ana angareirei nako Iesu, ao ni bwabetitoaki.—Mwakuri 2:38; 3:19.
E boto man te Baibara te waaki ae bwabetitoan te merimeri?
E bon aki. Bon akea n te Baibara taekan te waaki ae bwabetitoan te merimeri. Tabeua Aaro a karaoa te taromauri ae e bwabetitoaki iai te merimeri, (n aroia ni katimtimwa ke ni kabwaroa te ran i atuna) ao ni katokaa arana. Te bwabetito ni Kristian bon ibukia ikawai aika a ota ao ni kakoauaa “te rongorongo ae raoiroi ibukin ana Tautaeka n Uea te Atua.” (Mwakuri 8:12) E irekereke ma te kona n ongoraea ana taeka te Atua, butimwaeana, ao te rairannano, ae baika a aki kona ni karaoi merimeri.—Mwakuri 2:22, 38, 41.
E kaotaki naba n te Baibara bwa e taraiia ataei aika Kristian te Atua bwa a itiaki, man aia kakaonimaki aia karo. (1 I-Korinto 7:14) Ngkana e riai bwabetitoaia merimeri, a aki ngkanne kainnanoa ana kakaonimaki temanna bwa a na rotaki iai. b
Iango aika kairua ni kaineti ma te bwabetito ni Kristian
Te iango ae kairua: Katimtimwan ke kabwaroan te ran i aon te aomata, bon titeboo naba ma are ko katebonakoaki n te ran.
Te koaua: Te bwabetito ae taekinaki n te Baibara e nanonaki iai katebonakoan temanna n te ran. N te katoto, ngke e bwabetitoa te I-Tiobia arei te tia rimwin Iesu are Biribo, a “ruo rikaaki nako nanon te ran.” Imwina “a aerake man te ran.”—Mwakuri 8:36-39. c
Te iango ae kairua: E kaotaki n te Baibara bwa a a bwabetitoaki naba merimeri ngkana a bwabetitoaki kaaini bataia. N te katoto, e taekinaki ae kangai ibukin te tia tararuaia buure are i Biribi: “E a bwabetitoaki naba ngkekei ngaia ma kaaini batana ni kabane.”—Mwakuri 16:31-34.
Te koaua: E oti n rongorongon te tia tararuaia buure aei bwa a bane n ota n “ana taeka Iehova” naake a bwabetitoaki ao e ‘korakora kimwareireia.’ (Mwakuri 16:32, 34) E oti ni koaua akanne bwa a bon aki kona ni bwabetitoaki merimeri ngke e bwabetitoaki teuaei ma kaaini batana, bwa a aki kona n ota merimeri n ana taeka Iehova.
Te iango ae kairua: Bon ana angareirei Iesu bwabetitoaia merimeri, bwa e taekinna ae aia bwai ataei te Tautaeka n Uea.—Mataio 19:13-15; Mareko 10:13-16.
Te koaua: E aki maroroakina taekan te bwabetito Iesu ngke e taekin taeka akanne. Ma e kaotia ae akana kakairi n ai aroia ataei, n nimamannei ao ni kani butimwaea te reirei, a na boni bwaibwai n te Tautaeka n Uea.—Mataio 18:4; Ruka 18:16, 17.
a Te taeka ni Kuriiti ae rairaki bwa “bwabetito” e nako man te taeka ae “kateboa.” Nora te Theological Dictionary of the New Testament, Volume I, iteraniba 529.
b E taekinaki ae kangai n The International Standard Bible Encyclopedia: “Bon akea n Te N[u] T[etemanti] taekani bwabetitoan te merimeri.” E taekinaki naba iai bwa e a tibwa riki te waaki anne ngke e “kabureaki ao ni karakarakaaki taekani kakawakin te bwabetito” bwa aongkoa e kona ni kamaunai buure.—Volume 1, iteraniba 416-417.
c I aan te taeka ae “Bwabetito (n te Baibara),” e taekinaki iai ae kangai n te New Catholic Encyclopedia: “E mataata bwa te bwabetito n taai ake e moan tei iai te Aro e boni katebonakoaki iai te aomata i aan te ran.”—Volume 2, iteraniba 59.
Ko Bae Naba n Tangira
TITIRAKI AIKA KAEKAAKI MAN TE BAIBARA
Titeboo Aaro Nako? A Bane ni Kairiri Nakon te Atua?
Iai n te Baibara bwaai aika uoua aika kaekaa te titiraki anne.
REIREI AIKA RANGI NI KAKAWAKI N TE BAIBARA
E Butimwaei Aeka n Taromauri Nako te Atua?
A bati aika kakoauaa bwa e aki kakawaki bwa tera te Aro ae ko kaainna.