Novembr 2011-ant, Jehovachea Sakxeanim Manhattan-achea lokank Bible-antli bori khobor porgott korunk, ek novi vatt apnnaili. Tannim mez ani ttroli uzar korun, pustokam ani masikam lokank dista toxim dovorlim. Hem kam tannim New York xarant aslolea, Manhattan-achea dokxinn bhagant suru kelem. Thoimsor khub lokanchem ievop-vochop zatalem.

Tannim ho zago char bhagamnim vanttlo. Dor eka bhagant zaite lok ieta-voita thoim, Bible-acher adarit prokaxonam, mez ani ttrolincher bore toren manddlolim. Ani lokanchea prosnanche zobab diunk ek Jehovacho Sakxi thoim ubo ravtalo. Bos sttand ani railway sttexon-a lagim dor disa hozaramnim lok ieta-voita dekhun, him mezam ani ttroleo thoim dovorloleo.

Hea zagear, lokanchea monant aslolea prosnanche zobab Bible-antlean mellttat. Jea lokam lagim vell na, te apleak zai tem prokaxon gheun magir vachunk xoktat.

Him prokaxonam veg-vegllea bhasamnim asat. Tumchea bhaxent prokaxon na zalear, tumi tem magonk zata ani tumkam tem thoddea disamnim mellttolem.

Hem kam polloun lok, toxench sorkari odhikari khoxi zaleat. Eka pulisan oxem mhunnttlem: “Tumi itlo temp khoim aslim? Lokank zai ti mahiti tumchea lagim asa.”

Anink ek dadlo, Bible khorench kitem xikoita? hem pustok polloun ravlo ani mhunnttlem ki, rostea voilean voitale te lok hem pustok vachta tem tannem polloilolem. Hem tankam khoim mell’llem astolem mhunn to chintunk laglo, ani atam taka koll’llem.

Ek tornatto munis sodanch hea vatten kamak voitalo. Sov sumanam uprant, meza lagim ieun tannem mhunnttlem, “Mhaka modot zai.” Meza lagim aslolea Sakxeanim taka Bible dilo ani tantuntlean taka, jivitant koxi modot mellonk xokta tem dakhoilem.

Deva vixim zannam zaunk sodtat tosle lok hanga ieun mahiti ghetat. Hea toren halinch eka mhoineant, Jehovachea Sakxeanim Manhattan-antlea lokank, 3,797 masikam ani 7,986 pustokam dileant.